Павелонь омбоце сёрмац Коринфу 9 - Од Соткс Новый Завет на мордовском-мокша языке 2016

Лезксонь кочкамась Коринф ошса

¹ Шкаень ломаттненди лезксонь максомать колга, арьсян, тейне аш мезенди сёрмадомс тейнть.

² Мон содаса тинь оцю мялентень лездомс, и мон шнаян эсонт Македониянь кемайхнень инголе: азондыне тейст, кода Ахаиясь аноклазень лезксонь максоматнень нинге ётай кизотькиге. И тинь тяфтама оцю мяленте лездомс, синь ётксостка ламотнень сргозьфтезень тя тевти.

³ Но мон сякокс кучсайне тинь ширезонт ня кемай ялганьконь, сяс мес мялезе тяфтама: улеледе анокт лездоманди, кода мон и корхнень. И эста тинь эсонт шнамазе тя тевса аф ули шавокс.

⁴ Вдь кда сайхть мархтон Македониянь кемайхне, а тинь аф аноктада, эста минь пофтама визькс шамас, мес сяшкава кемоста шнакшнедязь тинь. А конашкава визькс ули тейнть, мон ни афи корхтан!

⁵ Сяс мон лувине эрявиксокс азомс ня кемай ялганьконди: сальхть миньдонк инголи ширезонт и инголькиге аноклалезь надияфтф казнентень. Эста тя ули афкукс эсь мяльса максф казне, а аф вихца кочкаф.

⁶ Тевсь вага мезьса: кие кржа види, ся кржа и кочкай. А кие лама види, ся лама и кочкай.

⁷ Катк эрсь максы сняра, кода мярьги седиец, аф пичедезь и аф вихца кошардозь. Вдь Шкайсь кельгсы кенярдезь максыть.

⁸ Сонь ули виец вельф каземс тинь эрь кодама пароказнеса. Эста тейнть фалу и сембоса кармай улема сембе эрявикссь, и тяконь лангс нинге вельф саты эрь кодама пара тевонди.

⁹ Кода азф Сёрматфксса: «Сон аф ужяльди кядьса явондсь ашуфненди, и сонь видексшиц кирдеви пефтома пингс».

¹⁰ Шкайсь, кона максси видьмот видити и кшиса аннесы ломанть, тейнтьке максы видьмот, ламолгофтсы сянь, мезе озафттада, и касфтсыне эсонт видексшинь тефнень.

¹¹ Тяфта, тинь ульхтяда сяшкава козят сембоса, нльне максомста фалу ульхтяда мезеньге аф ужяльдикс. Сяс ламотне кармайхть азонкшнема сюконямат Шкайти тинь казнентень инкса, конат максовихть минь вельденк.

¹² Тя покодеманте лезды аф аньцек иняру ломаттненди синь ашушисост, но тяда башка, ламотнень тисыне сюконяйкс, и сяс синь седистост кармайхть шудезь шудема сюконямань валхт Шкайть шнаманцты.

¹³ Иняруфне шнасазь Шкайть сянкса, мес тинь афкукс кематада Христость колга Пара куляти, конань тинь пачфнесасть-азонкшнесасть и тя лац няеви тинь покодемастонт; и шнасазь сянкса, мес тинь седи ваксста лезттада тейст и лия кемайхненди.

¹⁴ Тяда башка, синь кармайхть озондома инксонт и сембе седиса ёрама няемс тинь, сяс мес Шкайсь казедязь тинь Эсь аф ункстави пароказненц мархта.

¹⁵ Сюконяма Шкайти аф азовомшка казненц инкса!