Павелонь омбоце сёрмац Коринфу 8 - Од Соткс Новый Завет на мордовском-мокша языке 2016

Лезкс Иерусалимонь кемайхненди

¹ Кемай ялгат, минь мяленьке: содалесть тинь, кодама пароказне Шкайсь макссь Македониянь кемаень пуромксненди.

² Хуш синь улендсть варчсефт лама стакашиса, сембе сяка синь седисна пяшкотьфтольхть кенярдемада, и прокс ашушиса эрязь, синь ульсть анокт козяста лездомс лиятненди.

³ Мон няине и азса тейнть: синь макссть тейнек эсь вийснон коряс и мянь сяда лама. Эсь пара мяльснон коряс

⁴ синь синць пшкядсть тейнек и пяк эняльдезь корхтасть: синьге ули мяльсна лездомс лия кемайхнень мархта Иерусалимонь кемайхненди.

⁵ Но синь тисть сяда лама сянь коряс, мезе минь учендоме; мянь максозь эсь пряснон, васенда Азорти, а сямольде тейнек, Шкайть мяленц коряс.

⁶ Сяс минь эняльдеме Титонди педа-пес аделамс тя лездомань пара тевть, конань сон ушедозе тинь ширесонт.

⁷ Тинь сембоса вельф козятада: кемамаса и корхтамаса, и содамошиса, и эрь кодама седиень путомаса, и тейнек кельгомаса. Сяс тя лездомань пара тевсонга уледа вельф козяста максыкс.

⁸ Мон тянди аф кошардан, но азондомок кода лиятне путозь тянь инкса эсь седиснон, мон ёран содамс, афкуксонь тинь кельгоманте али аф.

⁹ Тинь вдь содасасть, конашкава оцю Иисус Христос Азороньконь пароказнец: Сон улемок козя, тинь инксонт арась ашукс, сяс мес мялецоль Эсь ашушинц вельде козякофтомс тинь.

¹⁰ Мон азса тейнть эсь мялезень тя лездомань тевть кувалма: тейнть сяда пара улель тяни шумордамс тя тевть, конань тинь ушедость нинге ётай кизоть. Вдь тинь сонь аф аньцек васенцекс ушедость тиемонза, тинь сонь васенцекс и арьсесть.

¹¹ А тяни шумордасть тя тевть сяка аноксшиса, кона ульсь сонь арьсемстонза, и стане лац, кода саты тинь виенте.

¹² Кда ули аноксши максомс, эста Шкайсь пара мяльса сявсы максф казнеть. Вдь Шкайсь учи сянь, мезе ули, а аф сянь, мезе аш.

¹³ Корхтамась моли аф сянь колга, бта мон ёран тёждялгофтомс лиятнень эряфснон, путомок сталмоть тинь лангозонт. Аф! Монь мялезе: эряледе сембе фкя лаца цебярьста.

¹⁴ Тяни тейнть ули кода вельф уликсонтень эзда пяшкодемс синь афсатыксснон. А мзярда синь кармай улема вельф уликссна, синь пяшкодьсазь тинь афсатыксонтень. Тянь вельде сембе кармайхть эряма фкя лаца цебярьста.

¹⁵ Кода корхтави Сёрматфксса: «Кие кочкась лама, сянь ашель вельфоц, и кржа кочкайсь ашезь сода афсатыкс».

Павел азонды Титонь и тейнза лездыхнень колга

¹⁶ Сюконяма Шкайти, кона крьвястезе Титонь седиса тинь инксонт сяка лездомань мяльть, кона палы миньге седисонк.

¹⁷ Сонь седиец палы тинь инксонт, и сяс сон моли тинь ширезонт эсь мяленц коряс, а аф аньцек минь эняльдеманьконь коряс.

¹⁸ Сонь мархтонза минь кучсаськ кемай ялганьконь, кона сембе кемаень пуромксова шнави Пара кулянь кандоманкса.

¹⁹ Тяда башка, кемаень пуромксне кочказь сонь молемс минь мархтонк и лездомс тейнек тя пара тевса, конаса минь покоттяма Азороньконь лемонц кеподеманкса и тинь лездомань мялентень няфтеманкса.

²⁰ Минь аш мяленьке макссемс ломаттненди туфталхт апрякамс минь сянкса: кода и мезе тиенттяма тяфтама оцю казьф ярмакнень мархта.

²¹ Вдь минь ваттама сянь мельге: сембось улель кода эряви аф аньцек Азорть сельминголенза, но ломаттнень сельминголестка.

²² Ня кафттнень мархта минь кучсаськ тейнть нинге фкя кемай ялгать. Минь лама тевса аф весть варжаськ сонь и няеськ сонь седиень путоманц. А тяни сон нинге сядонга пяк седиень путозь ащи, сяс мес кемоста надияй лангозонт.

²³ Кда корхтамс Титонь колга, азса, сон монь фкя тевонь ялгазе и покоди мархтон сембоса, мезсь сотф тинь мархтонт. Лия кафта кемай ялгатне – тя кемаень пуромкснень эзда кучфне, синь кандыхть Христости шнама.

²⁴ Сяс тяни тевса няфтесть тейст эсь кельгомантень. Катк сембе кемаень пуромксне содасазь: минь аф стак шнафттама пря мархтонт.