Павелонь омбоце сёрмац Коринфу 7 - Од Соткс Новый Завет на мордовском-мокша языке 2016

¹ Кельгома ялгане, ванода, кодама надияфтомат тейнек максфт! Сяс, эрьда аруяфтсаськ пряньконь семботь сянь эзда, мезсь гаснесы ронгоньконь и ваймоньконь, и карматама сембоса эряма иняруста, кулхцондозь и пелезь Шкайда!

Коринф ошень кемаень пуромкссь канды кеняртькс Павелонди

² Тялькфтомасть минь эсь седиезонт. Минь киндинге ашеме тие кальдяв, киндинге ашеме канда зиян и киньге эзда мезевок ашеме веше эстейнек.

³ Мон тянь корхтаса тейнть аф апрякамга. Мон тяда инголенге корхтань тейнть: тинь минь седисонк, минь мархтонт марсотама куломасонга, эрямасонга.

⁴ Мон аф пелян корхтамс тейнть видеста, и монь лама туфталдон шнафтомс пря тинь мархтонт. Сембе минь ризфоньконь ёткса тинь ащетяда тейне ваймама-кемокстама вастокс и нежекс, и сяс мон пяшкотькшнян кенярдемаса.

⁵ Мзярда саме Македонияв, минь ашеме мушенда кодамовок ваймама. Сембе пяльде люпштасть эсонк стакашитне: перьфканк сялондомат, потмосонк пелема.

⁶ Но Шкайсь, колаф ваймонь кемокстайсь, ваймафтозень-кемокстазень седиеньконь Титонь саманц мархта,

⁷ и аф аньцек саманц мархта, но и сянь мархта, мес тинь кемокстасть сонь. Сон азондозе, конашкава тинь лажадоде тейне, конашкава ризнайхть седиенте и конашкава кемоста ащетяда инксон. Тянкса мон сядонга кенярдень.

⁸ Хуш мон и колайне тинь седиентень эсь сёрмазень мархта, тянкса аф каендан. Но кда корхтамс видеста, мон аф ламода таки каендань, мзярда няине: ся сёрмазе колазе седиентень.

⁹ А тяни мон кеняртькшнян, но аф сянкса, мес тинь праде ризфс, а сянкса, мес тя ризфсь тинь вятедязь седиень полафтомати. Вдь тинь ризфонте ульсь Шкайть мяленц коряс, и сяс минь ашеме тие тейнть кодамовок зиян.

¹⁰ Ризфсь, кона Шкайть мяленц коряс, вяти седиень полафтомати, кона канды идема, и тя ризфть инкса аф эряви каендамс. А масторлангонь ризфсь вяти куломати.

¹¹ Ванода, мезе тись тейнть тя ризфсь, кона Шкайть мяленц коряс! Эсонт сргозьфтсь мзяра седиень путомада, эсь прянь араламада! А мзяра сргозьфтсь эсонт каршек молемада пежень тиить лангс, мзяра пелемада, мархтон васедемань мяльда и оржа мяльда наказамс муворуть! Тянь вельде тинь педа-пес няфтесть: тинь аруфтада тя тевса.

¹² Вдь мон сёрмадыне ся сёрмать аф обжайть и аф обжафть инкса. Мон сёрмадыне сонь тейнть няфтеманкса: конашкава минь пичеттяма-канзеттяма инксонт Шкайть инголе.

¹³ И тя минь ваймафтомазь-кемокстамазь. Но тя ваймафтомась-кемокстамась нинге аф сембе. Сядонга пяк минь кенярдеме Титонь кенярдеманцты. Вдь сембе тинь ваймафтость сонь седиенц.

¹⁴ Мон сонь инголенза пяк шнадязь тинь, и тейне ашезь сава якстерьгодомс визьксть эзда. Вдь сембе ся шнамась, мезе минь корхтаме колгант Титонди, ульсь видекс, кода сембе сявок, мезе минь корхтаме тейнть.

¹⁵ И тяни, мзярда Тит лятфнесы, кода тинь сонь кулхцондость и кода васьфтесть сонь пара лувксса и пелема мархта, сонь седиец сядонга ускови тейнть.

¹⁶ Мон кеняртькшнян, мес тинь лангозонт мон сембоса надияван.