Павелонь омбоце сёрмац Коринфу 6 - Од Соткс Новый Завет на мордовском-мокша языке 2016

¹ Минь, кода Шкайть мархта покодихне, эняльттяма тейнть: афоль ара шавокс Шкаень пароказнесь, кона максфоль тейнть.

² Вдь Шкайсь корхтай: «Пара пингста Мон кулихтень тонь, идемань шиста Мон лездонь тейть». И вага, тяни – тя пара пингсь, и тяни – тя идемань шись.

Стакашитнень кирдемасна

³ Минь аш мяленьке улемс киндинге мезьсонга пупордамань кевкс: афоль сялдов минь покодеманьке Шкайти.

⁴ Меколанкт, минь сембоса няфнесаськ эсь пряньконь афкуксонь покодикс Шкайти: оцю кирдемшкаса и кемошиса кирттяма стакашит, ашушит, люпштамат,

⁵ пикссемат, пякстамгудга ащемат, каршезонк кепсемат, вийда машфты покодемат, апак удок вет, вачаши.

⁶ Минь эсь афкуксшиньконь няфнесаськ арушиса, содамошиса, куватьс кирдемшкаса, парошиса, Иняру Ваймопожфса, афкуксонь кельгомаса,

⁷ видешинь валса, Шкаень вийса и видексшиса, кона ащи тейнек тюрембялькс; сонь вельденза минь тюрьхтяма и аралатама пря.

⁸ Минь кирдьсамазь пара лувксса и мезькска аф лувсамазь; минь сялдсамазь и шнасамазь; минь лувсамазь васькафникс, но минь корхтасаськ видеть;

⁹ минь лувсамазь аф содавиксокс, но минь сембе содасамазь; минь лувсамазь кулома лангса ащикс, но ванода, минь эрятама; минь эсонк шавихть, но минь аф кулотама;

¹⁰ минь пичефтьсамазь, а минь фалу кеняртькшнетяма; минь ашуфтама, но ламотнень козякофнесаськ; минь мезеньковок аш, но сембось кядялонк.

¹¹ Коринфонь ялгат, минь корхтатама тейнть видеста и минь седиеньке панжада.

¹² Минь седиеньке келептьфт тейнть, но тинь седиенте пякстафт минь эздонк.

¹³ Мон корхтан тейнть, кода эсь идненди: тиньге каршезонк тиеда тяконь лаца, панжесть эсь седиентень тейнек.

Кемай ломаттне – эряй Шкайть кудоц

¹⁴ Тясть кильде эсь прянтень фкя ашка алу аф кемайхнень мархта. Дяряй улихть видексшить марстонь тевонза коень коламать мархта? Мезе марстонь ули валдть и шобдать ёткса?

¹⁵ Дяряй ладяй Христос Велиаронь мархта? Мезьсна марстонь кемай ломаттнень аф кемайхнень мархта?

¹⁶ И мезец марстонь Шкаень кудть аф афкуксонь шкайхнень мархта? Вдь тинь – эряй Шкайть кудоц. Шкайсь мярьгсь тяфта: «Мон саян эряма синь мархтост и карман якама синь ётксост. Мон улян тейст Шкайкс, а синь улихть Тейне ломаньтналкс».

¹⁷ Сяс Азорсь тага корхтай: «Лиседа синь ёткстост и уледа ширеса эздост, и тясть токсе аф аруть, и Мон пара мяльса сяфтядязь тинь Эстейне».

¹⁸ «Мон улян тейнть Алякс, и тинь ульхтяда Тейне цёракс и стирькс. Тяфта корхтай Сембонь Кирди Азорсь».