Павелонь омбоце сёрмац Коринфу 5 - Од Соткс Новый Завет на мордовском-мокша языке 2016

¹ Минь содасаськ: мзярда срады-калады минь масторлангонь эрямань кошеньке, лиякс мярьгомс ронгсь, минь ули менельса Шкайть эзда эрямовастоньке – аф кядьса тиф куд, кона ащи пефтома пингс.

² Мзярс минь тясотама, тя масторлангонь кошсотама, минь куфцетяма, сяс мес пяк оцю мяленьке куроконе щамс эсь лангозонк менелень кудть вельхтяфксонц, од ронгть.

³ Улемок сонь эсонза, минь аф ульхтяма крхтапа.

⁴ Мзярс минь нинге ляткшнетяма тяса, эсь срады-калады ронгонь куднясонк, минь стакаста куфцетяма, сяс мес минь аш мяленьке валхтомс лангстонк масторлангонь ронгть, но мяленьке тязк щамс-карямс менеленнеса, эста пефтома пингонь эряфсь нилелезе кулы ронгть.

⁵ Вчёк тянкса Сонць Шкайсь тиемазь минь и максозе тейнек Эсь Ваймопожфонц, конань вельде минь кемоста содасаськ: Сон макссы тейнек сянь, мезе надияфтсь максомс.

⁶ Сяс минь ваймоньке фалу кемот и аф пелихть, хуш минь содасаськ: мзярс минь эрятама эсь ронгсонк, минь эрятама ширеса, аф Азорть пяле.

⁷ Вдь тяни минь эрятама кемамать коряс, а аф сянь коряс, мезе няйхтяма сельмоса.

⁸ Но сяка, минь ваймоньке кемот и аф пелихть, хуш сядонга мяленьке явомс эсь ронгоньконь эзда и ётамс Азорти, эсь кудозонк.

⁹ Сяс, аф ваномок сянь лангс, кудсотама ни минь али нинге ширесотама, минь ёратама тумс Шкайть мяльс.

¹⁰ Вдь тейнек сембонди сави арамс Христость судонц инголе, и эрти максови сембонкса сянкса, мезе сон тись ронгса эрямстонза: цебярь али кальдяв.

Шкайть мархта ладямас тердема

¹¹ Минь содасаськ, мезе стамсь Шкайда пелемась, и сяс тяряфттама тиемс кемайкс лиятненьге. Шкайсь лац содасы, кодаптама минь, и надиян, тиньге эсь ваймовайгяльсонт содасасть тянь.

¹² Минь аф шнатама пря тинь инголент, меколанкт, минь макстама тейнть туфтал шнамс пря минь мархтонк. Тяфта тинь кармай улема мезе азомс сятненди, конат шнайхть пря сянь мархта, мезе няеви, а аф сянь мархта, мезе седиса.

¹³ Кда минь вятеськ пряньконь кода ёньда лисьф ломатть, тянь тиеськ Шкайть инкса, а кда шумбра ёньца, тянь – тинь инксонт.

¹⁴ Вдь Христость кельгомац кошарды минь эсонк, минь, кит састь тяфтама мяльс: кда фкясь кулось сембонь инкса, эста сембе кулость.

¹⁵ Христос кулось сембонь инкса вага мес: эряльхть шистоннетне аф эсь инксост, а Сянь инкса, кие инксост кулось и вельмась.

¹⁶ Сяс тяни минь киньге колга аф арьсетяма ломанень шарьхкодемать коряс. Кда инголи минь Христостьке колга тянь лаца арьсеме, тяни тяфта аф арьсетяма.

¹⁷ Ся, кие Христость эса, ся – од тифкс; сембе таштсь ётась, и тяни, вов, сась одсь!

¹⁸ И семботь тянь тиезе Шкайсь, кона Иисус Христосонь вельде ладяфтомазь минь Эсь мархтонза, и макссь тейнек тев – ладяфтомс Сонцень мархтонза лия ломаттненьге.

¹⁹ Лиякс азомс, Шкайсь Сонць Христость вельде ладязень Эсь мархтонза масторлангонь ломаттнень, аф лувомок тейст муворшикс синь коень коламаснон, и макссь тейнек тев: пачфнемс кулять тя ладямать колга.

²⁰ Тяфта минь – Христость кучфонза, и Шкайсь Сонць минь вельденк пшкяди-серьгяди тейнть. Христость лемса эняльттяма тейнть: «Ладяда Шкайть мархта!»

²¹ Шкайсь путозе муворшить сембе минь пеженьконь инкса Христость лангс, конань прокс ашельхть пеженза. Тянь вельде Христосса минь араме видексшинь ломанькс Шкайть инголе.