Павелонь омбоце сёрмац Коринфу 4 - Од Соткс Новый Завет на мордовском-мокша языке 2016

Христость Пара кулянц валдоц

¹ Шкайсь Эсь кельгозь ужяльдеманц вельде макссь тейнек тяфтама покодема, и сяс минь аф нолясаськ пряньконь.

² Минь аердоме сембе визьксонь тефнень эзда, конат тиендевсть салава. Минь аф прафнетяма ёжу тефненди и мезьсонга аф шоворясаськ Шкаень валть, но меколанкт, аф сёпозь пачфнесаськ видешить. Тянь няемста, эрь ломанць эсь ваймовайгяльсонза, Шкайть инголе, шарьхкодьсы: нят Шкайть афкуксонь покодиенза.

³ Кда Пара кулясь, конань минь пачфнесаськ, кяшф вельхтердаса, сон кяшф аньцек сятнень эзда, кит молихть юмамань киге аду.

⁴ Тя масторлангонь шкайсь сокоргофтозень ня аф кемай ломаттнень ёньцнон ва мес: афоль няев тейст Пара кулять валдоц, кона няфнесы Христость иневалдонц. Ина Христоссь Эсь Эсьсонза няфнесы аф няеви Шкайть.

⁵ Вдь минь аф эсь колганк пачфнетяма куля, а Христос Иисусонь колга: Сон Азорсь, а минь тинь покодиенте Иисусонь инкса.

⁶ Сонць Шкайсь, кона мярьгсь: «Катк шобдаста валдопты валдсь», – валдоптозе минь седиеньконь. Тяфта Сон макссь тейнек содамоши Эсь иневалдонц колга, кона вандолды Христость шамаса.

Козяшись, кона канневи сёвонень кядьгоняса

⁷ Тяфтама питни козяшить минь каннесаськ эсьсонк, бта сёвонень кядьгоняса. Тянь вельде няеви: тя аф ункстави вийсь моли Шкайть эзда, а аф минь эздонк.

⁸ Минь эсонк люпштайхть сембе ширде, но минь аф люпштафтофтама ужети. Минь абонкшнетяма и аф содасаськ кода улемс, но минь аф нолясаськ пряньконь.

⁹ Эсонк панцихть, но Шкайсь минь ашемазь када. Минь прафнесамазь пильге лангста, но минь нинге аф шавфтама.

¹⁰ Минь фалу каннесаськ эсь ронгсонк Иисус Азороньконь куломанц: Иисусонь эрямацка улель няфтьф минь ронгсонк.

¹¹ Эряфоньконьберьф Иисусонь инкса куломась фалу шары минь перьфканк: Иисусонь эрямацка улель няфтьф минь кулы ронгсонк.

¹² Лисенди, минь эсонк эсь покодеманц тиендьсы куломась, а тинь эсонт – эрямась.

¹³ Минь эсонк ули кемамань сяка ваймопожфсь, конань колга азф Сёрматфксса: «Мон кемань и сяс корхтань». Миньге кематама, и сяс корхтатама.

¹⁴ Вдь минь содасаськ: ся Шкайсь, кона вельмафтозе Иисус Азороньконь, миньге вельмафтсамазь Сонь мархтонза и тинь мархтонт марса стяфтсамазь Эсь инголенза.

¹⁵ Сембось тя тиеви тинь инксонт: пачкодель Шкайть оцю пароказнец сяда лама и лама ломанень седис и эста, шада ведь лаца, ломаттнень эзда кармайхть шудезь шудема сюконямань валхне Шкайть шнаманкса.

Минь кеме надияманьке пефтома пингонь иневалдть колга

¹⁶ Вов мес минь аф нолясаськ пряньконь. Катк минь лангоньке, лиякс мярьгомс ронгсь, сиреди-срады, но потмоньке, лиякс мярьгомс ваймопожфсь, шиста шис одкстомкшни.

¹⁷ Вдь ня тёждя и аф кувака маятаманьке каннихть тейнек оцюдонга оцю и пефтома иневалда, конань аш кода ладямска ня маятаматнень ваксс.

¹⁸ Сяс минь ваттама аф сянь лангс, мезе няеви, а сянь лангс, мезе аф няеви, сяс мес няевись ащи-кирди нюрьхкяня пинге, а аф няевись – пефтома пинге.