Павелонь омбоце сёрмац Коринфу 13 - Од Соткс Новый Завет на мордовском-мокша языке 2016

Варжасть эсь прянтень

¹ Мон тяни колмоцеда срхкан самс тейнть, сяс мес эрь муворгофтомась эряви кемокстамс кафта али колма тевонь содайхнень-няихнень валсост, кода тонафты Сёрматфкссь.

² Мзярда мон омбоцеда улень ширесонт, эста ни корхтань сятненди, конат тисть пежет. А вага тяни, улемок ичкозе, мон тага весть корхтан тейст и сембе лиятнендиге: колмоцеда самстон аф ужяльттядязь.

³ Эста тинь, вешфксонтень коряс, эсь сельмосонт няйсасть и содасасть: монь вельден корхтай Христоссь. Христость тевонза тинь эряфсонт аф лафчт, Сон афкукс няфнесы Эсь виенц тинь ётксонт.

⁴ Виде, Сонь эськодезь крёзти, мзярда Сон ульсь лафча, но Сон эряй Шкайть виенц вельде. Миньге Христость лаца лафчтама, но Сонь мархтонза карматама эряма Шкайть виенц вельде, и тяфта покодема тейнть.

⁵ Кизефтесть эсь прянтень: тинь афкукс эрятада кемамать коряс? Варжасть эсь прянтень. Кали тинь аф содасасть: тинь эсонт эряй Иисус Христос. Но кда Сон аш эсонт, эста тейнть ашезь кирдев варчсемась.

⁶ Минь колганк, надиян, карматада содама: минь сят, кинди кирдевсь варчсемась.

⁷ Минь озонттама инксонт Шкайти, афоледе тие кодамавок кальдяв. Минь озонттама тяфта прокс аф прянь няфтеманкса, кода варчсемань кирдихне, а сянь инкса: тиенделеде тинь цебярьста. А ломаттнень сельмоса катк минь ульхтяма мянь кода варчсемань аф кирдихть.

⁸ Вдь минь мезевок аф машттама тиемс видешить каршес, меколанкт, семботь тиендьсаськ видешить инкса.

⁹ Минь кеняртькшнетяма, мзярда минь лафчтама, а тинь виихтяда. Сяс минь и озонттама тинь эряфонтень петеманкса.

¹⁰ Тяни, улемок ширеса эздонт, мон сёрмадса тянь вага мезенкса: самстон афоль сав казямста нолдамс тевс тинь лангсонт азорксшизень. Вдь Азорсь максозе тейне тя азорксшить тинь ваймонтень касфтоманкса-кемокстаманкса, а аф срафтоманкса.

Мекольце пряс путоматне и пара валонь пачфтематне

¹¹ Меколи, кемай ялгат, мярьган: кеняртькшнеда, петнесть-ладясть эсь эряфонтень, ваймафтода-кемокстада фкя-фкянь, уледа сембе фкя мяльса, ладяда фкя-фкянь мархта – и Шкайсь, кельгомань и сетьмошинь лихтибрясь, ули мархтонт.

¹² Шумбракснеда фкя-фкянь мархта иняру паламаса. Пара валхт тейнть кучихть тястонь сембе Шкаень ломаттне!

¹³ Иисус Христос Азороньконь пароказнец, Шкай Алять кельгомац и Иняру Ваймопожфть мархта соткссь фалу улест сембонь тинь мархтонт. Аминь.