Павелонь омбоце сёрмац Коринфу 10 - Од Соткс Новый Завет на мордовском-мокша языке 2016

Павел араласы эсь покодеманц

¹ Мон, Павел, кона тинь ширесонт улемста, кле, пяк сетьме и пели, а ширеса тинь эздонт – аф пелезь корхтай, тяни пшкядян тейнть Христость сятявшинц и лямбе седиенц вельде.

² Эняльдян, самстон афоль сав тейне улемс стама аф пеликс и казямкс, кодамкс мон эрян сятнень мархта, конат корхтайхть колганк, бта минь тиенттяма масторлангонь ломаттнень лаца.

³ Хуш минь и эрятама тя масторлангса, но аф тя масторлангонь ломаттнень лаца тюрьхтяма.

⁴ Тюрембяльхне, конатнень вельде минь вяттяма тюрема, аф масторлангоннет, но Шкайть эздот, и синь эсост Шкаень вийсь, кона машты срафтомс-калафтомс инь кемоть-калгодть. Синь вельдест минь срафнесаськ-калафнесаськ ёнень арьсефкснень

⁵ и эрь кодама прянь няематнень, конат аф нолнесазь ломаттнень содамс Шкайть. Минь сявсаськ полонц эрь арьсемать и тиендьсаськ сонь Христости кулхцондыкс.

⁶ И мзярда тинь кулхцондоманте пяшкоди педа-пес, эста минь карматама анокт наказамс эрь кодама аф кулхцондомать.

⁷ Эрьда ванода сянь лангс, мезе тинь сельминголент! Кда кие кемоста арьси: сон Христосонне, эста тейнза эряви содамс: миньге сонь лацонза Христосоннетяма.

⁸ Кда мон аф ламода шнафтан пря азорксшиньконь мархта, тянкса тейне прокс аф визькс. Вдь тя азорксшить тейнек максозе Азорсь тинь касфтомантень-кемокстамантень инкса, а аф срафтомантень.

⁹ Катк кивок аф арьси монь колган, бта монь мялезе эвфтемс тинь эсь сёрманень эса.

¹⁰ Конат-конат корхтайхть: «Сонь сёрманза казяпт и виихть. А мзярда сашенды сонць, няеви тяшкава лафчста! И корхтамацка аф кодама!»

¹¹ Катк тяфтама ломаттне содасазь: кодаптама минь сёрмасонк, эздонт ширеса улезь, тяфтапт ульхтяма тевсонга, мзярда сатама тинь ширезонт!

¹² Минь аш отькорьшиньке лувомс эсь пряньконь сятнень лаца, конат шнасазь эсь пряснон, али путнемс эсь пряньконь синь мархтост ряцок. Вай, конашкава синь ёньфтомот! Синь ункснесазь пряснон эсь ункстамасост и аньцек эсь мархтост латцесазь пряснон.

¹³ А минь аф шнатама пря путф ункстамада вельф. Минь шнасаськ пряньконь аньцек ся тевса-покодемаса, конань максозе тейнек Шкайсь: тоза сувси минь покодеманьке тинь аймаксонтка.

¹⁴ Лисенди, тинь ширесонт минь аф ётнесаськ тейнек путф ункстамать. Тя вдь минь васенцекс саме тейнть Христость колга Пара кулять мархта.

¹⁵ Минь аф шнатама пря ункстамада вельф, сяс мес минь шнатама пря эсь покодеманьконь мархта, а аф лиятнень покодемаснон мархта. Но минь надиятама: тинь кемаманте кармай касома и тянь вельде кармай келемома минь покодеманьке тинь ётксонт.

¹⁶ И эста минь мольхтяма лия вастова Пара кулянь азондома, сяда ичкози, тинь аймаконтень фталу, и аф карматама прянь шнама лиятнень тифснон мархта тейст максф вастова.

¹⁷ Кода азф Сёрматфксса: «Прянь шнафтысь шназа пря Азорть мархта».

¹⁸ Вдь тевса цебярькс лувф аф ся, кие шнасы эсь прянц, а ся, кинь шнасы Азорсь.