Павелонь омбоце сёрмац Коринфу 1 - Од Соткс Новый Завет на мордовском-мокша языке 2016

Шумбракстомась

¹ Павел, Шкайть мяленц коряс Иисус Христосонь апостолоц, и Тимофей кемай ялгась кучихть пара вал Шкайть кемаень пуромксонцты Коринф ошса, и тяфта жа сембе иняру ломанензонды, конат эряйхть Ахаиять келес.

² Арьсетяма тейнть пароказне и сетьмоши Шкай Аляньконь и Иисус Христос Азороньконь эзда!

Шкайсь максы ваймама-кемокстама

³ Улеза шнаф-бславаф Иисус Христос Азороньконь Аляц и Шкаец! Сон – минь кельгозь ужяльди Аляньке и сембоса ваймафты-кемокстафты Шкаеньке.

⁴ Сон минь эсонк ваймафты-кемокстай эрь кодама стакашисонк, тянь вельде миньге улель виеньке ваймафтомс-кемокстамс эрь кодама стакашис повфнень сяка ваймафтомаса, конаса Сон кемокстамазь минь.

⁵ Вдь конашкава касыхть минь эряфсонк Христость инкса маятаматне, сяшкава и Шкайсь Христость вельде касфтсы минь эряфсонк Эсь ваймафтоманц-кемокстаманц.

⁶ Ся стакашитне, конатнень минь кирдьсаськ – улихть тейнть ваймафтоманди-кемокстаманди и идеманди. А мзярда тейнек максови ваймама-кемокстама – тявок моли тейнть ваймафтоманди-кемокстаманди. Тя лезды тейнть кемоста кирдемс сембе ся сталмотнень, конатнень миньге кирдьсаськ.

⁷ Минь кемоста надиятама лангозонт: тинь кирттяда. Вдь минь содасаськ: кода тинь ули пяльксонте минь мархтонк маятамасонк, тяфта жа тинь ули пяльксонте минь мархтонк ваймафтомасонк-кемокстамасонк.

⁸ Кемай ялгат, минь мяленьке тяфтама: содаледе тинь ся стакашитнень колга, конат лиссть мархтонк Асияса. Ня стакашитне ульсть сяшкава оцюфт и аф кирдемшкат, нльне афи надияме лядомс шиса.

⁹ Минь арьсеме, афкукс ни судендафтама куломас. Тя лиссь тянкса: надиялеме аф эсь пряньконь лангс, но аньцек ськамонза Шкайть лангс, кона вельмафнесыне кулофнень.

¹⁰ Тя Сон идемазь минь пяк мала куломада и сяда товга идесамазь. Сонь лангозонза минь кемоста надиятама: Сон тага идесамазь,

¹¹ сяс мес тиньге лезттада тейнек эсь озондомантень вельде. Эста ламотне сюконяйхть Шкайти Сонь бславаманц инкса, конань Сон казезе тейнек ламотнень озондомаснон каршес.

Павелонь Коринфу саманц кирдевомац

¹² Минь шнатама пря, сяс мес ару ваймовайгяленьке кемокстай эсонк: минь тя масторлангса, а сембода пяк тинь ётксонт, эряме седиень панжезь и виде ваймоса, Шкайть мяленц коряс. Прянь вятемаса минь тиендеме аф ломанень смузьшить коряс, а Шкаень пароказнеть коряс.

¹³ Минь сёрмасонк тейнть, аш мезевок лия, сяда башка, мезсь тейнть лувови и шарьхкодеви. Надиян, шарьхкодьсамасть педа-пес,

¹⁴ кода ни ушедоде шарьхкодемонк. Эста, Иисус Азороньконь сама шистонза, тинь карматада шнафтома пря минь эсонк, кода миньге шнатама пря тинь эсонт.

¹⁵ Тянь лангс кемазь, мон сань мяльс инголи сувамс ширезонт и тянь вельде кафксть кандомс тейнть пароказне.

¹⁶ Мон арьсень сувамс тейнть Македонияв молемста, а сяльде, Македонияста мрдамста тага лоткамс ширезонт, а тинь кочкалесть монь кизень Иудеяв.

¹⁷ Дяряй мон, мзярда срхкань тяфта тиемс, тиень кода ломань, кона педа-пес ашезе арьсе тевонц? Али, пади, мон тиендян аньцек эсь арьсефозень коряс и аф ванца Шкайть мяленц? Али мон фкя сяка пингть корхтан «тяфта» и «аф тяфта»?

¹⁸ Шкайсь, кона фалу кирдьсы Эсь валонц, кемокстасы тянь: минь корхтамасонк тейнть ашель «тяфта» и «аф тяфта».

¹⁹ Вдь Шкаень Цёрась, Иисус Христоссь, конань колга минь: мон, Силуан и Тимофей, азондоме тейнть, фкя сяка пингть ашезь корхне «тяфта» и «аф тяфта»; но Иисусонь вельде пяшкодевсь «тяфта» валсь,

²⁰ и мзяра надияфтомада афоль макса Шкайсь, эрсь эздост пяшкодевсь Христосса. Вов мес минь Христосса, Шкайть шнаманкса, корхтатама «аминь, тяфта ули!»

²¹ Тя Сонць Шкайсь кемокстамазь минь тинь мархтонт марса Христость эса и тя Сон вадемазь-кочкамазь минь.

²² Сон тяштькстамазь минь Эсь тяштькссонза и максозе Эсь Ваймопожфонц минь седиезонк. Ваймопожфть вельде минь кемоста содасаськ: Сон макссы тейнек сянь, мезе надияфтсь максомс.

²³ Мон варан Шкайть инголе: тя пингть самс мон ашень сашенда Коринфу сяс, мес ёрань ванфтомс тинь пичефкста.

²⁴ Но аф сяс, бта минь ёратама азорондамс тинь кемамантень лангса. Аф! Тинь кемоста ащетяда кемамасонт, а минь мяленьке аньцек лездомс тейнть мумс кеняртьксонтень.