Павелонь васенце сёрмац Тимофеенди 5 - Од Соткс Новый Завет на мордовском-мокша языке 2016

¹ Сире алять кяжи валса тяк уркста, а кемокстак и ладяк видешинь ки лангс, кода эсь аляцень, од цёратнень – кода браттнень,

² сире аватнень, кода тядяцень, а од стирьхнень – кода сазорхнень, эрь кодама ару мяльса.

Од и сире удаватне

³ Кирдить пара лувксса и лезтт удаватненди, конат афкуксонь удават.

⁴ Кда удавать улихть шабанза али уноконза, эста тейст васендакиге эряви няфтемс кемамаснон тевса: катк тонафнихть лездомс эсьснонды и тяфта пандсазь тядятнень-алятнень парснон: вдь тя Шкайть мялезонза.

⁵ Удавась, кона афкукс илядсь ськамонза, кемай Шкайть лангс и шинек-венек эняльтькшни и озонкшни Тейнза.

⁶ А ся удавась, кона эряй эсь ронгонь мялензон топафтоманкса, ваймосонза сон ни кулось, хуш и иляды ронгса эряйкс.

⁷ Тянь колга азонтт тейст, эста эряфсна ули аф мувору.

⁸ Кда кие аф пичеди-канзеди эсензон колга, а сембодонга пяк эсь кудэряензон колга, ся аердсь кемамать эзда и тиевсь аф кемайдонга кальдявкс.

⁹ Удавакс, конанди эряви лезкс, эряви лувомс сянь, кинди ни топодсь кодгемонь киза, конац весть туфоль рьвакс,

¹⁰ и конац содаф, кода цебярь тевонь тии: сон касфтсь-трясь шабат, васьфнесь инжихть, шнись пилькт Шкаень ломаттненди, лезнесь сятненди, конат повсть люпштамас, и мяль вельде тиендсь эрь кодама цебярь тефт.

¹¹ Сяда оттнень тяйть лува стама удавакс, конатненди эряволь лезкс. Вдь одонь пси маряматне аерфтсазь синь Христость эзда, и тага ёрайхть лисемс рьвакс.

¹² Эста синь улихть судендафт, сяс мес ашезь кирде инголи максф валснон: покодемс аньцек Христости.

¹³ Тяфта жа кудста кудс яказь, синь тонадыхть нолашити, и аф аньцек нолашити, нинге корхтафтомати, ломанень тевс эцемати и азонкшнемс сянь, мезе аф эряви.

¹⁴ Сяс монь мялезе: катк од удаватне лисендихть рьвакс, шачфнихть шабат, вятихть кудъётконь тефт и аф макссихть каршек ащети кодамовок туфтал кальдяв корхтаматненди.

¹⁵ Сяс мес конат-конат пувордасть ни виде ки лангста и тусть Сатанать мельге.

¹⁶ Кда кемай авать юромсонза улихть удават, катк сон лезды тейст, и тя удаватне аф улихть сталмокс кемаень пуромксти. Эста пуромкссь машты пичедемс-канзедемс афкуксонь удаватнень колга, конат илядсть ськамост.

Кемаень пуромксонь оцюнятне

¹⁷ Кемаень пуромксонь оцюнятнень, конат цебярьста вятьсазь тевснон, эряви кирдемс пара лувксса и цебярьста тейст пандомс, васендакиге сятненди, конат путнесазь вийснон Шкаень валти и тонафтомати.

¹⁸ Вдь Сёрматфкссь корхтай: «Тяк пяксне букать кургонц, мзярда сон тяляй сёрот»; и нинге: «Покодити эряви пандомс тиф тевонзон инкса».

¹⁹ Пуромксонь оцюнять лангс сялдомать кулхцонтк аньцек эста, кда сонь кемокстазь кафта али колма ломатть.

²⁰ Пежень тиихнень кардайть сембонь инголе, эста катк лиятневок кармайхть пелема.

²¹ Шкайть, Иисус Христос Азорть и Сонь кочкаф ангелонзон инголе мон кошартте тонь тиендемс ня кошардоматнень коряс. Вятьк эсь пряцень сембонь мархта фкакс, инголькиге тят арьсе ломанть али тевть колга цебярьста али кальдявста.

²² Тят эряскода бславакшнемс кядень путомать вельде. Эста тон аф улят пежень тиикс лия ломаттнень пежесост. Ванфтк эсь пряцень арушиса.

²³ Сяда тов симонтть аф аньцек ведьта, но и аф ламне винада, сяс мес тонь сидеста сярятькшни желудкаце. Тя лезды тейнза.

²⁴ Кой-кона ломаттнень пежесна няевихть тяникиге и синь видеста вятихть судендамати, а лиятнень пежесна панжевихть сяльде.

²⁵ Тяконь лаца цебярь тефневок няевихть, а сят, конат аф няевихть, панжевихть сяльде.