Павелонь васенце сёрмац Тимофеенди 4 - Од Соткс Новый Завет на мордовском-мокша языке 2016

Васькафни тонафтомат

¹ Иняру Ваймопожфсь шарьхкодевиста корхтай тейнек: мекольдень пинкнень кой-кит потайхть кемамать эзда, и кармайхть молема васькафни ваймопожфнень мельге и кяжи ваймопожфнень тонафтомаснон мельге.

² Тяфтама тонафтоматне сайхть аф афкуксонь кемайхнень васькафнемаснон вельде, синь ваймовайгяльсна плхтафт серептьф кшниса, и тейст ни афи кулеви сонь корхтамац.

³ Синь аф мярьгихть рьвяямс и ярхцамс сяда, мезть Шкайсь тиезе. Вдь Шкайсь тиезе тя ярхцамбяльть тянкса: катк сят, кит кемайхть и содасазь видешить, ярхцайхть сюконяма мархта.

⁴ Сембось, мезть тиезе Шкайсь – пара, и аф эряви мезевок ёрямс, кда тя сявови сюконязь,

⁵ сяс мес Шкаень валсь и озондомась иняруяфтсазь тянь.

Павел максы Тимофеенди тонафтомат покодеманди

⁶ Кда тон кармат тяфта тонафтомост эсь кемай ялгатнень, эста тон улят цебярь покодикс Иисус Христости, и сядонга касат кемамань валхнень вельде и цебярь тонафтомать вельде, конань мельге тон туть.

⁷ Аньцек ётнек шкайфтома и бабань шава корхтаматнень вакска, и лама виень путозь тиентть Шкайть мяленц коряс.

⁸ Вдь ронгонь-виень кемокстамать ёмла лезксоц, а вана Шкаень мяльть ваномац лезды эрь мезьса, сяс мес сонь мархтонза сотфт тяниень и сай эряфонь надияфтоматне.

⁹ Тя валсь виде и сон эряви марнек путомс седис.

¹⁰ Тянкса минь покоттяма и кирттяма апрякамат, сяс мес кематама эряй Шкайть лангс, кона сембе ломаттнень Идисна, а васендакиге – кемайхнень.

¹¹ Тянди кошартт и тянди тонафтт.

¹² Катк кивок аф ваны лангозт вярде алу сянкса, мес тон одат. Ульхть кепотьксокс кемайхненди корхтамаса, прянь вятемаса, кельгомаса, кемамаса и арушиса.

¹³ Мзярс аф саян: лувонтк Сёрматфксть ломаттненди, кемокстак и тонафтт синь эсост.

¹⁴ Тяк юксне, но ноляк тевс Иняру Ваймопожфонь казнеть, кона максф тейть пророчествань вельде, мзярда пуромксонь оцюнятне бславамать пингста путозь кядьснон лангозт.

¹⁵ Тик семботь тянь и мяль вельде эряк тянь эса, эста тонь кемамаса касомацень няйсазь сембе.

¹⁶ Ватт эряфцень мельге и сянь мельге, мезенди тон тонафтат. И сядонга тов тяфта тиентть, эста улят идеф тонць и кулхцондыхневок.