Павелонь васенце сёрмац Тимофеенди 2 - Од Соткс Новый Завет на мордовском-мокша языке 2016

Озондомась и прянь вятемась кемаень пуромксса

¹ Сянкса эняльдян, васендакиге тиендеда тяфта: катк озондоманте, вешфксонте, эняльдеманте, сюконяманте улихть сембе ломаттнень инкса,

² оцязорхнень и сембе оцюнятнень инкса. Тя максы тейнек сетьме эряф и ладяма, и карматама эряма Шкаень мялень ванозь и пара лувксса.

³ Тя пара и пяк мялезонза Шкайти, минь Идиеньконди,

⁴ кона ёрай идемс сембонь и пачфтемс синь видешить шарьхкодеманцты.

⁵ Вдь Шкайсь фкя, тяфта жа Шкайть и ломаттнень ёткса аньцек фкя тевонь якафты – ломанць Христос Иисуссь,

⁶ кона максозе Эсь прянц сембе ломаттнень идемаснон-рамамаснон инкса. Тя ульсь виде пингста, и няфнесы Шкайть арьсефонц.

⁷ Тянкса Шкайсь путомань Кулянь кандыкс и апостолкс. Мон аф васькафнян, корхтаса видеть Христосса – путфан лия ломаньтналхненди кемамати и видешити тонафтыкс.

Алять и авать вастсна кемаень пуромксса

⁸ Монь мялезе тяфтама, катк эрь вастова алятне, иняру кядень кепсезь, озондыхть кяжфтома и сялондомафтома.

⁹ Тяфта жа аватневок катк щакшнихть сельмос аф каяй щамса-карямса, мазопнесазь эсь пряснон виздемашиса и шумбра-ару мяльса. Катк мазопнесазь пряснон аф мазыста шяярень понамаса, аф зрняса-жемчугса, аф питни щамса-карямса,

¹⁰ а пара тевса, кода ладяй аватненди, конат максозь эсь пряснон Шкайти и тиендихть Сонь мяленц коряс.

¹¹ Катк авась тонафни апак каштортт, сембоса сятявста кулхцондозь.

¹² Мон аф мярьган авати тонафтомс и улемс алять лангса азоркс. Катк авась аф кашторды.

¹³ Вдь васенцекс тифоль Адам, сяда меле Ева.

¹⁴ И аф Адам ульсь васькафтф, а авась. Тя сон ульсь васькафтф и прась пежес.

¹⁵ Но авась, конац лисьф рьвакс и шачфни шабат, ули идеф, кда сон иляды кемамаса, кельгомаса и инярушиса.