Павелонь васенце сёрмац Фессалоникав 5 - Од Соткс Новый Завет на мордовском-мокша языке 2016

Уледа анокт Азорть саманцты

¹ Кемай ялгат, аш мезенди сёрмадомс тейнть ня пинкнень и ладяф шитнень колга.

² Вдь тинь тинць пяк лац содасасть, Азорть шиц сай апак учсек, кода салайсь веть.

³ Мзярда ломаттне кармайхть корхтама: «Сембе вастова сетьмоши и аш мезьда пелемс!» – эста синь апак учентт сатсыне юмамась, кода шачфтомась сатнесы авать, и кивок аф ворьгодеви.

⁴ Но тинь, кемай ялгат, аф шобдашисотада, и ся шись аф саттядязь тинь апак учент, салай лаца.

⁵ Вдь сембе тинь – валдть и шить иденза. Минь аф веннетяма и аф шобданнетяма,

⁶ сяс, эрьда аф карматама удома, кода лиятне! Ульхтяма сргозьфт и анокт!

⁷ Вдь удыхне удыхть веть, и симилатне симондихть веть.

⁸ А минь, шивалдонь иттне, ульхтяма кятафт: щасаськ эсь лангозонк ваксарщам лаца кемамать и кельгомать, и прязонк такия лаца путсаськ надиямать идеманьконь лангс!

⁹ Сяс мес Шкайсь ладямазь минь аф кяжень пандоманди, а идеманди, кона максови тейнек Иисус Христос Азороньконь вельде.

¹⁰ Христос кулось минь инксонк, сяс мес Сонь мялец, аф ваномок сянь лангс шисотама минь али куломе, эрялеме Сонь мархтонза.

¹¹ Сяс кемокстада фкя-фкянь и касфтода-кеподеда фкя-фкянь, мезе тинь и тиенттяда.

Тонафтомат кемаень пуромксти

¹² Эняльттяма тейнть, кемай ялгат: кирдесть пара лувксса сятнень, кит седиге покодихть тинь ётксонт, кит вятихть эсонт Азорть лемса, и путыхть эсонт виде кис.

¹³ Кельгость и лувость синь пяк питникс ся тевть инкса, конань синь тисазь. Ладяда фкя-фкянь мархта.

¹⁴ Кемай ялгат, минь эняльттяма тейнть: нолатнень путнесть ёньц, пелихнень кемокстасть, лафчненди уледа нежекс, сембонь мархта сатфтость кирдемшкантень.

¹⁵ Ванода, кивок тинь ёткстонт афоль панда кяж кяженкса, меколанкт, фалу эряскодода тиемс пара – кода фкя-фкянди, стане сембе лядыхнендивок.

¹⁶ Фалу кеняртькшнеда,

¹⁷ апак лотксек озондода,

¹⁸ сембонкса сюконяда, сяс мес тяфтама Шкайть мялец тейнть, Иисус Христости кемайхненди.

¹⁹ Шкаень Ваймопожфть толонц тясть матне,

²⁰ пророчестватнень тясть лув шавокс,

²¹ но семботь лацкас ваность-варжасть; и мезсь цебярь, сянь ванфтость.

²² Кирдеда пря эрь кодама кяжда.

Мекольце валхне

²³ Катк Сонць Шкайсь, сетьмошинь лихтибрясь, иняруяфттядязь тинь марнек. И катк сембось тинь эсонт: ваймопожфське, ваймоське, ронгське – ванфтовихть аруста Иисус Христос Азороньконь мрдаманцты.

²⁴ Кирдьсы валонц Ся, кие эсонт терди, и Сон тисы тянь!

²⁵ Кемай ялгат, озондода минь инксонк!

²⁶ Шумбракснеда сембе кемай ялгатнень мархта иняру паламаса.

²⁷ Азорть лемса тейнть мярьган, лувость тя сёрмать сембе иняру кемай ялганьконди.

²⁸ Иисус Христос Азороньконь пароказнец улеза тинь мархтонт! Аминь.