Павелонь васенце сёрмац Фессалоникав 4 - Од Соткс Новый Завет на мордовском-мокша языке 2016

Шкайть мяленц коряс эрямась

¹ И нинге, кемай ялгат, тинь тонадоде минь эздонк, кода эрямс и улемс Шкаень мялень ваныкс, и тинь тяфта эрятада. Христос Иисусонь лемса эняльттяма тейнть и терттяма эсонт: касода тянь эса сяда товга.

² Вдь тинь содасасть, кодама кошардомат минь максоме тейнть Иисус Азорть эзда.

³ Шкайть мялец тяфтама: эряледе тинь инярушиса и ванфтолесть прянтень усксевомада.

⁴ Катк эрсь азорондай эсь ронгонц лангса, ванфтсы сонь инярушиса и пара лувксса,

⁵ и аф моли эсь визьксонь мялензон-арьсеманзон мельге, кода тиендихть Шкаень аф содай лия ломаньтналхне.

⁶ Тя тевса кивок тяза тиенде пеже эсь кемай ялганц каршес и тяза путне сельме сянь лангс, мезсь аф сонне, а кемай ялгать. Семботь тянь инкса Шкайсь кармай пандома кяжса. Минь ни корхнеме тейнть тянь колга и кемоста кардаме тяфта тиендемда.

⁷ Шкайсь тердемазь минь эрямс инярушиса, а аф рдазса.

⁸ Тяфта, кие шарфты тя тонафтомать эзда, ся аф ломанть эзда шарфты, а Шкайть, кона максозе тейнек Эсь Иняру Ваймопожфонц.

⁹ Кемай ялгань кельгомать колга тейнть аф эряви сёрмадомс, сяс мес Сонць Шкайсь тинь тонафтодязь фкя-фкянь кельгома.

¹⁰ Тинь тяфта и тиенттяда сембе кемай ялганьконь мархта марнек Македонияса. Но минь эняльттяма тейнть, кемай ялгат: нинге сядонга пяк кельгода фкя-фкянь.

¹¹ Тяряфтода эрямс сетьмошиса сембе ломаттнень мархта. Катк эрсь тиендьсы эсь тевонц и эсь кятть трясы прянц, кода минь тинь кошярядязь.

¹² Эста аф кемайхневок кармайхть лувомонт тинь видеста эряйкс и тинь мезьсовок аф карматада содама афсатыкс.

Азорть самац

¹³ Кемай ялгат, монь мялезе азондомс тейнть сянь, мезе ули кулофнень мархта: афоледе ризна сятнень лаца, конатнень аш надиямасна.

¹⁴ Вдь кда минь кематама тянди: Иисус кулось и вельмась кулофнень эзда, эста минь кематама тяндинге: сятнень, кит кулость Иисусти кемазь, Шкайсь мрдафтсыне эряфти Иисусонь мархта.

¹⁵ Минь корхтатама тейнть Азорть валса: минь, Азорть самс шиса лятфне, аф ингольдасаськ кулофнень.

¹⁶ Вдь мзярда кайгозеви кошардомань валсь и архангелть вайгялец, и мзярда торазеви Шкаень торамась, и Сонць Азорсь валги менельста, эста васенда вельмайхть сят, кит кулость Христости кемазь,

¹⁷ а сяльде минь, эряйхне, мархтост марса сявофтама ковол лангса кожфса Азорть васьфтемонза, и тяфта минь ульхтяма Азорть мархта фалу.

¹⁸ Сяс, ваймафнеда-кемокстакшнеда фкя-фкянь ня валхнень вельде.