Павелонь васенце сёрмац Фессалоникав 2 - Од Соткс Новый Завет на мордовском-мокша языке 2016

Павелонь покодемац Фессалоникаса

¹ Кемай ялгат, тинь вдь тинць содасасть, минь сашендоманьке тинь ширезонт ашель шавокс.

² Кода тинь содасасть, тейнть самда инголе, Филиппаса минь кирдеме эсь лангсонк аф кржа маятама и сялдома-наругама. Но Шкаеньконь лездоманц вельде минь аф пелезь азондоськ тейнть Сонь Пара кулянц, аф ваномок оцю каршек молемать лангс.

³ Минь тердемань валсонк ашель кодамовок васькафнема-эрьготьфтема, али аф ару арьсема, али ёжуши.

⁴ Меколанкт, Шкайсь варжамазь минь тевса и, лангозонк кемазь, максозе тейнек Эсь Пара кулянц. Сяс минь сонь пачфнесаськ тяфта: ёратама тумс аф ломаттнень мяльс, а Шкайть, кона няйсы-варчсесы седиеньконь.

⁵ Кода тинь содасасть, минь ашедязь васькафне тинь мялень пети валса-шнамаса, минь ашель салавань мяленьке мезевок сатомс тинь кядьстонт эстейнек. Шкайсь тянь няиец-содаец.

⁶ И минь ашеме вешенде эстейнек шнама-кеподема ломаттнень кядьста, аф тинь, аф лиятнень.

⁷ Улемок Христости апостолкс, минь ульсь азорксшиньке самс ширезонт кода оцю ломатть, но минь улеме мархтонт ляпе седикс и эжнедязь тинь, кода потяфты тядясь эсь идензон.

⁸ Минь сяшкава кельктядязь тинь, мянь улеме анокт максомс тейнть аф аньцек Шкаень Пара кулять, но эсь эряфоньконьге: сяшкава питникс тинь араде тейнек.

⁹ Кемай ялгат, тинь мяляфтсасть минь стака покодеманьконь и виень путоманьконь тейнть Шкаень Пара кулять пачфнемста. Минь шинек-венек покодеме виень аф ужяльдезь, сяс мес ашель мяленьке арамс эздонт киндинге трямксокс.

¹⁰ Тинь и Шкайсь няесть-содасть сянь, кода иняруста, видеста и аф муворуста минь вятеськ пряньконь тинь мархтонт, кит кемайхть.

¹¹ Тинь тяньге содасасть: минь тиендеме эздонт эрть мархта стане, кода алясь тиенди эсь идензон мархта;

¹² минь эняльдеме тейнть, кемокстаме эсонт и пяк вешеме эздонт: эряледе тинь Шкайть мяленц коряс, кона тердедязь тинь Эсь Оцязорксшизонза и иневалдозонза.

Марстонь маятамат

¹³ Минь апак лотксек азонттама сюконяма Шкайти сянкса, мес эздонк кульф Шкаень валть тинь сявость аф кода ломанень вал, а кода Шкаень вал, кодамкс сон афкукс и ули. Сон и тии тев тинь эсонт, кит кемайхть.

¹⁴ Вдь тинь мархтонт, кемай ялгат, лиссь сякось, мезе лиссь Иудеяса Шкайть пуромкссонза Христос Иисусти кемайхнень мархта: тинь кирдеде панцемат эсь юромонь ломанентень эзда, кода синь еврейхнень эзда.

¹⁵ Еврейхне шавозь Иисус Азорть и Сонь пророконзон, и тяконь лаца тяни миньге эсонк панцихть. Синь аф тушендыхть Шкайть мяльс и молихть каршек сембе ломаттненди.

¹⁶ Синь шоряйхть тейнек кандомс Шкаень валть лия ломаньтналхненди и вятемс синь идемати. Тяфта синь пяшкотькшнесазь-ламолгофнесазь пежеснон сталмоснон. Но Шкаень кяжсь синь пряснон вельхксса ни.

Павелонь мялец тага васедемс Фессалоникань кемаень пуромксть мархта

¹⁷ Кемай ялгат, тейнек савсь аф лама пингонди явомс мархтонт, явомс аньцек ронгса, аф седиса, и тянкса нинге сядонга оцю мяльса минь ёраме няемс тинь шамаликонтень.

¹⁸ Сяс минь оцюволь мяленьке самс тейнть – а мон, Павел, аф весть срхксень тянь тиемс, – аньцек шорясь тейнек Сатанась.

¹⁹ Вдь кие ули тейнек надиямакс, кенярдема вастокс и шнамань каштазкс Иисус Христос Азороньконь инголе, мзярда Сон сай? Кие, кда аф тинь?

²⁰ Тя тинь минь прянь шнаманьке и кенярдеманьке.