Павелонь васенце сёрмац Фессалоникав 1 - Од Соткс Новый Завет на мордовском-мокша языке 2016

Шумбракстомась

¹ Павел, Силуан и Тимофей кучихть пара вал Фессалоникань кемаень пуромксти, кона эряй Шкай Алять и Иисус Христос Азорть эса. Арьсетяма тейнть пароказне и сетьмоши Шкай Аляньконь и Иисус Христос Азороньконь эзда!

Фессалоникань кемаень пуромксть эряфоц и кемамац

² Минь фалу сюконятама Шкайти сембонь тинь инксонт, лятфнемок тинь эсь озондомасонк.

³ Шкайть и минь Аляньконь инголе минь най лятфнетяма сянь колга, кода тинь кемаманте няфтезе прянц тевса, кельгоманте – ваймамань аф содай покодемаса, и сянь, кода тинь кирдемшка мархта надиятада Иисус Христос Азороньконь лангс.

⁴ Минь содасаськ, Шкаень келькф ялгат, Шкайсь кочкадязь тинь.

⁵ Вдь минь азондоськ тейнть тя Пара кулять аф аньцек валса, но Иняру Ваймопожфть вийсовок, крхкаста кемазь сонь видешинцты. Тинь тинцьке лац содасасть, кодамкс минь улеме тинь ётксонт, тейнть паронь кандомга.

⁶ И тинь, ваномок минь лангозонк и Азорть лангс, ушедоде тиендема минь лацонк и Азорть лаца. Люпштаматнень ёткса тинь сявость седиезонт Кулять кеняртькс мархта, конань тейнть максозе Иняру Ваймопожфсь.

⁷ Тяфта тинь араде кепотьксокс сембе кемайхненди Македонияса и Ахаияса.

⁸ Тинь эздонт Азорть валоц кайгозевсь аф аньцек Македонияса и Ахаияса, но кулясь тинь кемамантень колга Шкайти срадсь сембе вастова, сяс тейнек ни мезевок аф эряви корхтамс тинь кемамантень колга.

⁹ Ломаттне синць сембе вастова азонкшнесазь сянь, кода тинь васьфнемасть минь, и кода, шарфтомок аф афкуксонь шкайхнень эзда, кармаде покодема эряй и афкуксонь Шкайти

¹⁰ и учемонза менельста Сонь Цёранц – Иисусонь, конань Сон вельмафтозе кулофста и кона идесамазь минь Шкайть сай кяженц эзда.