Павелонь васенце сёрмац Коринфу 9 - Од Соткс Новый Завет на мордовском-мокша языке 2016

Апостолонь азорксшись

¹ Кали мон аф воляшисан? Кали мон аф апостолан? Кали мон ашине няе Иисус Христос Азороньконь? Кали аф мон эсь покодемазень вельде вятедязь тинь Азорти?

² Кда лиятненди мон аф апостолан, тейнть ни видекс апостолан. Вдь апостолкс улемазень тяштьксоц – тя тинь, тинь эряфонте Азорса.

³ Вов мезе мон азан эсь прянь араламанкса сятненди, кит судендайхть эсон.

⁴ Кали минь аш азорксшиньке ярхцамс и симомс?

⁵ Кали минь аш воляшиньке сявондемс мархтонк рьваньконь, лиякс мярьгомс, кемай сазороньконь, кода тиендихть лия апостолхне и Азорть брадонза, Кифавок?

⁶ Али аньцек тейне и Варнаванди эряви эсь кядьсонк покодезь трямс пря?

⁷ Кодама ушман тюри и сонць трясы эсь прянц? Кали муви стама, кие озафни виноград, а сонць иможденза аф ярхцай? Кие ваны стада, а лофцтонза аф ярхцай?

⁸ Дяряй тянь колга корхтамста, мон корхтан аньцек кода ломань? Дяряй аф тяконь колга корхтай койське?

⁹ Вдь Моисеень койсонза сёрматф: «Тяк панне тяляй букать кургонц». Кали букатнень инкса пичеди Шкайсь?

¹⁰ Кали Сон тянь азозе аф минь инксонк? Тя вдь минь инксонк сёрматф: «Сокайти эряви сокамс, тяляйти – тялямс надиязь, кочкаф сёроста тейнза максови пялькс».

¹¹ Минь видеме тинь ётксонт ваймопожфонь видьмот. Арьсетяда тя вельф лама, кда ёратама кядьстонт сявомс эстейнек эряманди лезкс?

¹² Кда лиятнень ули азорксшисна мезевок сявомс кядьстонт, эста минь азорксшиньке кали аф сяда оцю? Но минь тя азорксшиньконь аф нолясаськ тевс, меколанкт, минь семботь кирдьсаськ, аньцек мезьсовок аф шорямс Христость колга Пара кулять пачфтеманцты.

¹³ Кали аф содасасть, Шкаень кудса покоди озксвятихне тряйхть пря Шкаень кудть эзда и сят, кит покодихть алтарть ваксса, сявондихть эстейст пялькс алтарть лангс путфть эзда?

¹⁴ Азорське тяфта ладязе: сят, кит кандсазь Пара кулять, тянь эзда и трясазь пряснон.

¹⁵ Аньцек мон тянь ашине ноля тевс, и тянинге сёрмадан прокс аф тянь вешеманкса. Мон мянь анокан куломс, но киндиге аф сявови эздон тя монь шнамань туфталозе!

¹⁶ Кда мон кандса Пара кулять, тейне аш мезьса шнамс пря, сяс мес тя монь тевозе. Шкайсь кошардомань тиемс сонь! Ризф тейне, кда мон аф карман Пара кулянь азондома.

¹⁷ Кда мон тянь тиендьса эсь мялезень коряс, эста тянкса тейне пандови питне. Но кда тянь тиендьса аф эсь мялезень коряс, эста мон покодян ся тевса, конань максозь тейне.

¹⁸ Эста мезьста ащи тейне питнень пандомась? Вчёк ва мезьста: мон азондса Пара кулять питнефтома и аф ноляса тевс азорксшить, кона максф тейне, кода Пара кулянь пачфтиенди.

¹⁹ Хуш мон воляшисан и киндиге аф урян, мон тиевонь сембонди урекс – Христости сяда лама ломанень вятеманкса.

²⁰ Еврейхненди мон улень кода еврей, Христости еврейхнень вятеманкса; коень пяшкотькшни ломаттненди мон улень кода коень пяшкотькшни, Христости коень пяшкотькшнихнень вятеманкса;

²¹ лия ломаньтналонь ломаттненди, конат аф содасазь койть, улень кода коень аф содай, – хуш монць эрян Шкаень койть коряс и пря максонь Христость коенцты, – коень аф содайхнень Христости вятеманкса.

²² Лафчненди мон арань лафчекс, Христости лафчнень вятеманкса. Сембонди мон арсень сембокс, аньцек коданга идемс ёткстост мзярошкать.

²³ Семботь тянь тиендьса Пара кулять пачфтеманкса и эстейненьге сонь бславаманц сявоманкса.

²⁴ Тинь содасасть, ласькомань пялькстомаса ласькихть сембе, но казне максови аньцек фкяти. Ласькода стане, сатоль казнесь тейнть.

²⁵ Эрь пялькстайсь лама вий путни сяськомас анокламати. Синь тиендьсазь тянь казненкса – каштазонкса, кона пужи и наксады. А минь ёратама сатомс мзярдонга аф пужи каштазть.

²⁶ Сяс мон ласькан аф сянь лаца, кона аф няйсы петь; и тюрян мокшендаса аф шавоста кожфть эрьхнеманкса.

²⁷ Мон кемокстаса ронгозень, катк сон кулхцондсы монь мялезень: афоль лисе стане, пачфтемок Кулять лиятненди, монць улян ёрдаф шири.