Павелонь васенце сёрмац Коринфу 6 - Од Соткс Новый Завет на мордовском-мокша языке 2016

Пялькстомат кемайхнень ёткса

¹ Мзярда киньге тинь ёткстонт ули пялькстомац кемай ялга мархта, кода тя ломанть саты визьксоц молемс пежу судьянди? Мес сон тя тевть аф макссы ваномс Шкайти кемай ломаттнень судс?

² Кали тинь аф содасасть: Шкаень ломаттне кармайхть судендамонза масторлангть? Кда тейнть сави судендамс масторлангть, эста мес тинь лувсасть эсь прянтень аф кондястикс судендамс ёмла тефнень?

³ Кали тинь аф содасасть, минь карматама судендамост ангелхнень. Эста кода тейнек аф ванондомс тя эряфонь тефнень?

⁴ А мзярда тинь пялькстотада эряфонь тефнень кувалма, кинь тинь путнесасть судьякс? Ломаттнень, конат мезькска аф лувовихть кемаень пуромксса?

⁵ Сргозеза визьксонте! Кали тинь ётксонт аш фкявок смузю ломань, кона ладялезе тевть кемайхнень ёткса?

⁶ Но тинь, кемай ялгат, судендатада фкя-фкянь мархта, да нинге аф кемайхнень инголе.

⁷ Сявок ни кальдяв тейнть, мес судендатада фкя-фкянь мархта. Афоли сяда пара улель тейнть лядомс обжафста? Аф сяда пара улель максомс прянтень саламс?

⁸ Аф, тинь тинць керсасть лиять седиенц и саласасть. И кинь? Эсь кемай ялгантень!

⁹ Кали тинь аф содасасть: аф видексшинь ломаттне Шкаень Оцязорксшити аф сувавихть? Тясть васькафне эсь прянтень! Усксевихне, аф афкуксонь шкайхненди сюконяйхне, мирдень-рьвянь полафнихне, алятне аля мархта утцихне,

¹⁰ салайхне, топафкста аф содайхне, симилатне, сюцихне-сялдыхне, ломанень васькафнихне – кивок эздост аф сувави Шкаень Оцязорксшити!

¹¹ Тинь эздонтка конат-конат ульсть тяфтапт! Но тяни тинь штадязь, тинь иняруяфтодязь, тинь луводязь видексшинь ломанькс Иисус Христос Азороньконь лемса и Шкаеньконь Ваймопожфса.

Ронгсь – тя Иняру Ваймопожфть эрямовастоц

¹² Тинь корхтатада: «Тейне сембось мярьгондеви». Виде, но аф сембось моли лезксонди! «Тейне сембось мярьгондеви». Виде, но мезське тяза азоронда лангсон!

¹³ «Ярхцамбяльсь пекти и пексь ярхцамбяльти». Но Шкайсь машфтсы тяньге, тонаньге. Ронгсь максф аф усксевоманди, а Азорти, и Азорсь ронгти.

¹⁴ Шкайсь вельмафтозе Азорть и миньге вельмафтсамазь Эсь вийсонза.

¹⁵ Кали тинь аф содасасть: тинь ронгонте – Христость ронгонцты пялькст? Кали мон сявсайне Христость ронгонь пяльксонзон и тисайне синь пяльксокс усксеви авать ронгонцты? Мзярдонга аф!

¹⁶ Кали тинь аф содасасть, кие уды усксеви ава мархта, ся тиеви мархтонза фкя ронгокс. Вдь Сёрматфксса азф: «Кафттне арайхть фкя ронгокс».

¹⁷ А ся, кие сотови Азорть мархта, тиеви фкя ваймопожфокс Сонь мархтонза.

¹⁸ Ворьгодеда усксевомать эзда. Эрь лия пежесь, конань тисы ломанць, аф токсесы ронгонц. Усксевись тии пеже эсь ронгонц каршес.

¹⁹ Кали тинь аф содасасть, тинь ронгонте – Шкаень куд, конаса эряй Шкайть эзда максф Иняру Ваймопожфсь. Тинь аф эсь кядьсонт,

²⁰ вдь тинь рамафтада оцю питнеса! Сяс шнасть Шкайть ронгсонтка и ваймопожфсонтка, вдь тявок, тонавок Шкайть.