Павелонь васенце сёрмац Коринфу 3 - Од Соткс Новый Завет на мордовском-мокша языке 2016

Апостолхне – Шкайть покодиенза

¹ Кемай ялгат, мон ашень корхтав мархтонт кода ваймопожфонь ломаттнень мархта. Мон корхтань мархтонт кода пежу мялень-арьсемань коряс эряй ломаттнень мархта, конат Христосонди кемамасост пиже идня лацот.

² Ся, мезьса мон тинь аннедязь, ульсь лофца, а аф калгода ярхцамбяль, конань нилемс тинь нинге ашеде уле анокт. Тинь нинге тянинге аф аноктада,

³ сяс мес тянемс эрятада пежу мялентень-арьсемантень коряс. Кда тинь ётксонт ули сельмонь каяма, пялькстома и фкя-фкянь каршес молема, эста тинь ляткшнетяда стама ломанькс, конат эряйхть пежу мяльснон-арьсемаснон коряс, и тиенттяда тя масторлангонь ломаттнень лаца.

⁴ Мзярда фкясь корхтай: «Мон Павелоннян», а омбоцесь: «Мон Аполлосоннян», – эста китяда тинь? Виде, ломаттяда, конат эряйхть пежу мяльснон-арьсемаснон коряс!

⁵ Кие тяфтамсь Павел? Кие тяфтамсь Аполлос? Синь аньцек покодихть, конатнень вельде тинь саде кемамати. Эрсь эздост тиендьсы ся тевть, конань максозе Азорсь.

⁶ Мон путонь видьмот, Аполлос валондозень, но касфтозень синь Шкайсь.

⁷ Сяс путысь и валондысь мезькска аф лувовихть, а лувови аньцек Шкайсь, конац семботь касфтсы.

⁸ Путысь и валондысь тиихть фкя тев, но казне эрти максови тиф тевонц коряс.

⁹ Вдь минь покоттяма Шкайть мархта марса, а тинь Шкайть паксяц и кудсь, конань путсы-стяфтсы Шкайсь.

¹⁰ Шкайть эзда максф пароказнеть коряс мон, кудонь ёню путыть лаца, путонь кудъюр, а кие-бди лиясь стяфты лангозонза. Катк ина эрсь ваны эсь мельганза, кода сон путы-стяфты.

¹¹ Киндинге аф путови лия кудъюр сяда башка, кона ни путф. И тя юрсь Иисус Христос.

¹² А мезьста путысь стяфтсы тя кудъюрть лангс кудть – зрняста, сияста, питни кевста, шуфтста, тишеста, шужярьста

¹³ – няфтьсы Иисус Христосонь омбоцеда сама шиц, мзярда эрть тевоц ётафтови толонь пачк, и толсь няфтьсы кодама сонь кемошиц.

¹⁴ Кинь кудоц ванфтови толса, сянди максови казне.

¹⁵ А кинь кудоц палы толса – ся юмафтсы семботь. Ина сонць идеви, но кода ломань, конань таргасазь толботмоста.

Тинь Шкаень куттада

¹⁶ Кали тинь аф содасасть – тинь Шкаень куттада и Шкаень Ваймопожфсь эряй тинь эсонт?

¹⁷ Шкайсь срафтсы-калафтсы сянь, кие срафтсы-калафтсы Сонь кудонц. Вдь Шкаень кудсь иняру, а тя кудсь – тя тинь.

¹⁸ Кивок тязазе васькафне эсь прянц! Кда кие лувсы прянц смузюкс тя масторлангса, ся катк тиеви ёньфтомокс смузюкс араманкса.

¹⁹ Вдь тя масторлангонь смузьшись Шкайть инголе ёньфтомаши. Сёрматфксса азф: «Шкайсь кунцесыне смузюфнень синцень ёжушисост».

²⁰ И нинге: «Шкайсь содасыне смузюфнень мяльснон-арьсемаснон, содасы – синь шавот».

²¹ Сяс катк кивок аф шнасы прянц ломаньца, вдь сембось тинне:

²² улеза тя Павел, али Аполлос, али Кифа, али масторлангсь, али эряфсь, али куломась, али тяниень пингсь, али сай пингсь – тя сембось тинне,

²³ но тинь Христосоннетяда, а Христос – Шкайть.