Павелонь васенце сёрмац Коринфу 2 - Од Соткс Новый Завет на мордовском-мокша языке 2016

Куля эськотьф Христость колга

¹ Кемай ялгат, мзярда мон сашендонь тейнть азондомонза Шкаень кулять, мон сашендонь аф кодамовок мазы валонь и смузьшинь няфтема.

² Вдь мон путыне прязон улемс ширесонт мезевок аф содайкс, Иисус Христоста башка – крёзти эськотьф Иисус Христоста башка.

³ Мон улень тинь ширесонт лафчашиса, пелемаса и оцю трнатомаса.

⁴ Монь валозе и монь тонафтомазе ульсть аф ломанень смузьшить кемафты валсонза, но Шкаень Ваймопожфть виенц эвондамаса.

⁵ Тяфта, катк тинь кемаманте нежетькшни аф ломанень смузьшить лангс, а Шкаень вийть лангс.

Шкаень смузьши

⁶ Минь азондсаськ смузьшить сятненди, кит кенерсть тянди, но тя аф масторлангонь смузьши и аф тя масторлангонь азорхнень смузьшисна, конатнень шисна ни лувфт.

⁷ Аф, минь азондсаськ Шкаень смузьшить, салаваннеть, кяшфть; ся смузьшить, конань Шкайсь ладязе тейнек иневалдокс менельхнень-масторхнень тиемда инголе.

⁸ Тя масторлангонь азорхнень эзда кивок ашезе сода-шарьхкоде тя смузьшить, афток афолезь эськоде крёз лангс иневалдонь Азорть.

⁹ Кода азф Сёрматфксса: «Сельмось сянь ашезе няе, и пилесь ашезе куле, и ашезь сашенда ломанть пряс ся, мезе Шкайсь аноклась Эсь кельгиензонды».

¹⁰ А тейнек Шкайсь тянь панжезе Эсь Ваймопожфонц вельде, сяс мес Ваймопожфсь ванцы и тонафнесы семботь, нльне Шкайть салавашинцка-крхкашинцка.

¹¹ Кие ломаттнень эзда содасы мезе ломанть эса, ломанть сонцень ваймопожфтонза башка, конай эряй эсонза? Тяфта Шкаеннетьке колга кивок аф содай, Шкайть Ваймопожфтонза башка.

¹² Но тейнек максфоль аф тя масторлангть ваймопожфоц, а Шкайть Ваймопожфоц сянь шарьхкодеманкса, мезьса Сон минь каземазь.

¹³ И минь тянь азондсаськ аф стама валса, конатненди тонафтомазь ломанень смузьшись, а валса, конатненди тонафтомазь Ваймопожфсь. Сясы ваймопожфонь тефнень панчсесаськ ломаттненди Ваймопожфть вельде.

¹⁴ Но кинь эса аш Ваймопожфсь, сянь аш виец сявомс сянь, мезе максови Шкаень Ваймопожфть эзда. Тяфтама ломанти ся ёньфтомаши: тейнза аф шарьхкодеви ся, мезть колга эряви судендамс аньцек Ваймопожфть вельде.

¹⁵ А вага ломанць, конань эса ули Ваймопожфсь, машты судендамс семботь колга, но сонцень колганза кивок аф судендави.

¹⁶ Сёрматфксса азф: «Кие содазе-шарьхкодезе Азорть ёненц, кинь ули виец путомс Сонь ёньц?» А минь ёненьке Христосонне.