Павелонь васенце сёрмац Коринфу 16 - Од Соткс Новый Завет на мордовском-мокша языке 2016

Ярмаконь кочкамась Иерусалимонь кемайхненди

¹ Тяни сёрмадан тейнть ярмаконь лезксть колга, кона кочксеви Иерусалимонь кемайхненди: тиньге тиендеда тяфта, кода мон мярьгонь тиендемс Галатиянь кемаень пуромксова.

² Недялять васенце шистонза катк эрсь тинь эздонт путни ярмак башка, мзяра путови, и ванфтсы самозон. Эста монь самстон, аф эряви ни кочксемс ярмакт.

³ А мзярда саян, мон кучсайне Иерусалиму лезксонтень кандома ся ломаттнень, конатнень тинь кочкасасть, и максан кядезост содафтомань-кемокстамань сёрмат.

⁴ Кда эрявксты тейненге тоза молемс, эста минь мольхтяма марса.

Ичкоздень якамать колга арьсематне

⁵ Мон саян тейнть, мзярда ётаса Македониять, сяс мес мон ёран самс Македониянь пачк.

⁶ Тинь ширесонт, пади, мзярошкас ащан, шять тялотьке ётафтса мархтонт. А сяльде тинь кочкасамасть монь сяда товолдонь кис.

⁷ Вдь монь аш мялезе тяни няемс тинь ётамбачк, а надиян, кда мярьги Азорсь, улемс мархтонт сяда ламоняс.

⁸ А тяса, Ефесса, мон лядан Ведьгемонце шинь илать самс,

⁹ сяс мес тяса монь инголен келеста панжевсь кенкшсь оцюдонга оцю и иможень канды покодеманди, хуш каршек молидонга аф кржа.

¹⁰ Сандяряй тейнть Тимофей, ванода: тейнза тяза уле мезьда пелемс ширесонт. Вдь сон монь лацон тиендьсы Азорть тевонц.

¹¹ Катк кивок аф ваны лангозонза безярдезь. А сяльде, паронь арьсезь, кочкасть сонь меки кис, катк мрдай тейне. Вдь мон кемай ялганьконь мархта учан эсонза тяса.

¹² Аполлос кемай ялганьконди мон пяк энялькшнень молемс тейнть лия кемай ялганьконь мархта, но сонь аш мялец молемс тяни. Сон сай ширезонт, мзярда эвондай ётка пингоц.

Мекольце пряс путоматне и пара валонь пачфтематне

¹³ Тяда уда, кемоста ащеда кемамаса, уледа аф пеликс и виикс!

¹⁴ Катк сембось тиньцонт тиендеви кельгома мархта.

¹⁵ Кемай ялгат, тинь содасасть, Стефан и сонь кудэряензон васенцекс Ахаияса арасть Христости кемайкс. Синь максозь эсь пряснон покодемс-лездомс Шкаень ломаттненди. Сяс эняльдян тейнть:

¹⁶ тиньге уледа кулхцондыкс тяфтама ломаттнеди, и эрти, кие мархтост марса покоди ваймамань аф содазь.

¹⁷ Монь кеняртьфтемазь Стефанонь, Фортунатонь и Ахаиконь тяза самасна. Синь максозь тейне сянь, мезе тейне ашезе сатне тиньфтомонт.

¹⁸ Синь озафтозь монь седизень, кода озафтозь тиннетьке. Пара лувксс путость тяфтама ломаттнень.

¹⁹ Пара вал тейнть кучихть Асиянь кемаень пуромксне. Кучихть тейнть Азорса седиваксстонь пара валхт Акилань мархта Прискилла и марнек кемаень пуромкссь, кона кочксеви синь пялост.

²⁰ Кучихть тейнть пара вал сембе тястонь кемай ялганьке. Шумбракснеда фкя-фкянь мархта иняру паламаса.

²¹ А тяни мон, Павел, сёрмадан эсь кядьсон: кучан пара валхт.

²² Кие аф кельгсы Азорть, улеза сюдоф! Мара́н-афа́! – Минь Азороньке сась!

²³ Иисус Христос Азороньконь пароказнец улеза тинь мархтонт!

²⁴ И мон кельктядязь тинь сембонь, кит Христос Иисусоннет. Аминь.