Павелонь васенце сёрмац Коринфу 15 - Од Соткс Новый Завет на мордовском-мокша языке 2016

Христость вельмамац кулофнень эзда

¹ Кемай ялгат, мон лятфтаса мялезонт Пара кулять, конань пачфтине тейнть, а тинь сявость сонь и эсонза кемоста ащетяда.

² Сонь вельденза тинь ульхтяда идефт, кда кирдьсасть сонь прокс стамкс, кодамкс мон сонь тейнть пачфтине. А кда аф тяфта, эста тинь шавоста кемаде Шкайти.

³ Васенда мон азыне тейнть сянь, мезсь тейне максфоль: Христос кулось минь пеженьконь инкса, кода азф Сёрматфксса.

⁴ Сон калмафоль и колмоце шиня ульсь вельмафтф, кода азф Сёрматфксса,

⁵ и эвондась Кифанди, сяльде кемгафтува апостолхненди.

⁶ Меле сон эвондась фкя пингоня вете сятта лама кемай ялганди, эздост ламотне тянемс шисот, а кой-конат кулость ни.

⁷ Тяда меле Сон эвондась Иаковонди, сяльде сембе апостолхненди.

⁸ Мекольцеда эвондась тейненьге, аф эсь пингстонза шачф шаба лаца ащити.

⁹ Мон вдь апостолхнень ёткста инь ёмласян, и мянь аф кондястян лемневомс апостолкс, сяс мес инголи панцине Шкаень кемаень пуромксть.

¹⁰ Но Шкайть пароказненц вельде мон тяфтаман, кодаман тяни, и Сонь пароказнец тейне максовсь аф шавоста. Мон тиень сяда лама сембе лия апостолхнень коряс, хуш тянь аф мон тиине, а Шкаень пароказнесь, кона монь мархтон.

¹¹ Сяс сембе сяка, кие тейнть пачфтезе Кулять: мон али синь, но тя ся Кулясь, конань минь сембе пачфнесаськ, и ся, конанди тинь кемаде.

Кулофнень вельмамасна

¹² Кда Христос вельмафтфоль кулофста, кода минь тейнть Сонь колганза пачфнетяма, мес эста конат-конат эздонт корхтайхть, кле, аш кулофнень эзда вельмама?

¹³ Кда аш кулофнень эзда вельмама, эста Христосовок ашезь вельма.

¹⁴ А кда Христоссь ашезь вельма, эста шава минь Пара кулянь азондоманьке и шава тинь кемаманте.

¹⁵ Лисенди, миньге кяльготни азондыхтяма Шкайть колга, вдь минь азондоме колганза: Сон вельмафтозе Христость. Вдь, кда кулофнень эзда вельмама аш, эста Сон Христостьке ашезе вельмафта.

¹⁶ Виде, кда аш кулофнень эзда вельмама, эста Христоска ашезь вельма.

¹⁷ Но кда Христоссь ашезь вельма, эста тинь кемаманте шава и тинь тянемс ляткшнетяда эсь пежентень потмоса.

¹⁸ Тяста лисенди, сятка, кит кулость Христосонди кемазь, юмасть-арасть аду.

¹⁹ Кда минь надияманьке Христость лангс канды лездома аньцек тя эряфти, эста минь тя масторлангса сембода ужялькс ломаттне.

²⁰ Но Христоссь афкукс вельмась кулофнень эзда – и тя ушеткс лия кулофнень вельмамаснонды.

²¹ Вдь кода куломась сась тя масторлангти фкя ломань вельде, тяфта кулофнень эзда вельмамаське сась фкя Ломань вельде.

²² И кода Адамонь эса сембе кулсихть, тяфта Христосса сембе мрдафтовихть эряфти.

²³ Аньцек эрсь вельмай эсь пингстонза: васенда Христоссь; сяльде, мзярда Сон мрдай, сембе Христосоннетне.

²⁴ Тяда меле сай песь. Эста Христоссь машфтсыне вийда сембе оцюнятнень, азорксшитнень и вийхнень и макссы Оцязорксшить Шкай Аляти.

²⁵ Вдь Христости оцязорондама снярс, мзярс Шкайсь аф путсыне Сонь пильгалонза сембе каршек ащихнень.

²⁶ И мекольце каршек ащись, конань виец ули машфтф – тя куломась.

²⁷ Вдь Сёрматфксса азф: «Шкайсь семботь путозе Сонь пильгалонза». Ня валхне: «семботь путозе Сонь пильгалонза», содаф, азфт аф Шкайть колга, кона Сонць семботь максозе Христость кядялу.

²⁸ Мзярда Шкайсь семботь макссы Сонь кядялонза, эста Шкаень Цёраське макссы прянц Алянц кядялу, кона максозе семботь Сонь кядялонза. Тяфта Шкайсь кармай улема сембокс и сембоса.

²⁹ Кда тя аф тяфта, эста мезе тиендихть сят, кит кулофнень вастс кстиндафнихть пря? Кда кулофне мзярдовок аф вельмайхть, эста мезенди ня ломаттне кстиндафнихть пря кулофнень вастс?

³⁰ Мезенди эста миньге эрь пингоня эцекшнесаськ пряньконь пельксс?

³¹ Кемай ялгат, кода виде тя: тинь монь шнама вастозе Иисус Христос Азороньконь инголе, тяфта виде тявок: мон эрь шиня ванан куломать сельмос.

³² Кда мон арьселень тя масторлангонь ломаттнень лаца, эста мезенди Ефесса мон тюрень вирьбаксянь жувататнень мархта? Кодама тейне лезкс тянь эзда, кда кулофне аф вельмайхть? Эста «Эрьда карматама ярхцама-симома, вдь ванды кулотама!»

³³ Тяда васькафнев: «Кальдяв ялгатне гастясазь пара обуцятнень».

³⁴ Сргозеда видешинь эряфти и лоткада пежень тиендемда. Вдь тинь ётксонт улихть стапт, конат аф содасазь Шкайть. Кода тейнть аф визькс!

Менелень од ронгсь

³⁵ Кивок тинь эздонт, пади, кизефтьсамань: «Кода кулофне вельмайхть? И кодама эста ули синь ронгсна?»

³⁶ Ёньфтома! Видьмось, конань тон видесак, аф эреклай, кда васенда аф кулы.

³⁷ И тон видят аф оцю касыкс, а аньцек видьмоня, тозеронь али нинге мезень.

³⁸ А Шкайсь максы тейнза нетькс Эсь мяленц коряс, эрь видьмоти сонценнеть.

³⁹ Аф сембонь ронгсна фкат; ломаттнень синцень ронгсна, жувататнень синцень, нармоттнень синцень, калхненьге синцень.

⁴⁰ Улихть менелень ронкт и модалангонь ронкт. Менеленнетнень синцень иневалдсна, модалангоннетнень – синцень.

⁴¹ Шить валдоц фкя, ковть лия, тяшттненьге лия. И фкя тяштть валдоц яви омбоцеть валдонц эзда.

⁴² Вов тяфта кулофнень вельмафтомстовок: калмави наксады-юмай ронга, а кеподи пефтома пингс эряй ронга.

⁴³ Калмави визьксонь ронга – кеподи иневалдса пиндолды ронга; калмави лафча – кеподи вии;

⁴⁴ калмави модалангонь ронга – кеподи ваймопожфонь. Вдь кда ули модалангонь ронга, эста ули ваймопожфоньге.

⁴⁵ Сёрматфксса тяфта и азф: «Васенце ломанць, Адам, арась эрек ваймокс». А мекольце Адамсь арась эряфонь максы ваймопожфокс.

⁴⁶ Аф ваймопожфоннесь инголи, а модалангоннесь, аньцек тяда меле ваймопожфоннесь.

⁴⁷ Васенце ломанць ульсь мода лангста, тиф пульста, омбоце Ломанць – Азорсь менельста.

⁴⁸ Кодама ульсь модалангонь пульстонь ломанць, тяфтапт сембе модалангонь пульстонь ломаттневок. И кодама Менельстонь ломанць, тяфтапт улихть сембе менельстонь ломаттневок.

⁴⁹ Кода минь улеме модалангонь пульстоннеть лаца, тяфта минь аратама Менельстоннетьке лаца.

⁵⁰ Но вага мезе азан тейнть, кемай ялгат: сиволень-веронь ронгть аш пяльксоц Шкаень Оцязорксшиса, кода наксадыть-юмайтьке аш пяльксоц пефтома пингса.

⁵¹ Кулхцондода, мон азан тейнть салаваши: аф сембе минь кулотама, но сембе минь полафттама –

⁵² апак учентт, сельмоське аф кенери чипордамс, мекольце торамать торамстонза. Сон торазеви – и кулофне вельмайхть пефтома пингс, а минь полафттама.

⁵³ Вдь тя наксады и кулы ронгти эряви тиевомс аф наксадыкс и аф кулыкс.

⁵⁴ Мзярда наксадысь тиеви аф наксадыкс, кулысь аф кулыкс, эста пяшкоди Сёрматфксса азфсь: «Куломась нильф, сонь сяськозь.

⁵⁵ Кулома, коса тонь пупамаце? Ад, коса тонь сяськомаце?»

⁵⁶ Куломать пупамац – тя пежесь, а пежеть виец койса.

⁵⁷ Сюконяма Шкайти, кона Иисус Христос Азороньконь вельде макссь тейнек сяськома!

⁵⁸ Сяс, кельгома ялгат, уледа кемот и мезевок тязадязь шерьфте. Марнек прянтень максость Азорть тевонцты, сяс мес тинь содасать: стака покодеманте Азорть инголе шавокс аф ули.