Павелонь васенце сёрмац Коринфу 13 - Од Соткс Новый Завет на мордовском-мокша языке 2016

Кельгомать шнамац-кеподемац

¹ Корхтандярян мон ломанень и ангелонь кяльса, а кельгома эсон аш, эста мон кода пайгонь шава гайняман али кальдердемань цингордоман.

² Кда монь ули пророчендамань казнезе, и мон содасайне сембе салавашитнень, и монь кядьсон сембе содамошись и сембе кемамась, конаса тейне полафневихть панттнень вастсна, а кельгома эсон аш, – эста мон мезевок ашан.

³ Явондяряса марнек уликс-парозень, мянь максондяряса плхтамас ронгозень, а кельгома эсон аш, – эста аш тейне тянь эзда кодамонга асу.

⁴ Кельгомась куватьс кирди, сон седи ваксста паронь тии. Кельгомась сельме аф каяй, кельгомась прянц аф шнасы, аф няйсы,

⁵ аф вятьсы прянц казямста, аф вешендьсы сонценнеть, аф сафнесыне кяжензон, аф мяляфты кяж.

⁶ Сон аф кеняртькшни кальдявти, а кеняртькшни видешити.

⁷ Сон кирдьсы-ётасы семботь, сембоса ляткшни кемайкс, эрь тевса надияй Шкайть лангс и кандсыне-кирдьсыне сембе сталмотнень.

⁸ Кельгомась мзярдонга аф юмай. Лоткайхть пророчестватне, лия кяльхневок лоткайхть корхтамда, содамошиське юмай.

⁹ Вдь минь содамошиньке афсатыкс мархтот и пророчестваньке афсатыкс мархтот.

¹⁰ Мзярда сай афсатыксфтомось, эста сембе афсатыкс мархтось юмай.

¹¹ Мзярда мон улень иднякс, эста корхтань кода идня, арьсень кода идня и шарьхкодень кода идня. Но мзярда касонь алякс, эста сембе иденнеть кадыне фталу.

¹² Тяни минь няйхтяма аф лац, кода олаф ваномань пачк, но эста минь карматама няема шамада шамас. Тяни монь содамошизе афсатыкс мархта, а эста мон карман содамонза семботь педа-пес, кода монь содасамань Шкайсь.

¹³ Эрь вов, фалу улихть ня колмотне: кемамась, надиямась, кельгомась, но кельгомась эздост инь оцюсь.