Павелонь васенце сёрмац Коринфу 12 - Од Соткс Новый Завет на мордовском-мокша языке 2016

Иняру Ваймопожфонь казнет

¹ Эрь тяни, кемай ялгат, корхтатама Ваймопожфонь казнетнень колга. Монь аш мялезе кадомс тинь аф содамошиса синь кувалмаст.

² Тинь тинць содасасть, мзярда уледе Шкаень аф содайкс, тинь бта аф кирдеви вийсь ускодязь аф афкуксонь вайгяльфтома шкайхненди.

³ Сяс мялезе тинь шарьхкотьфтемс: кда ломанть вятьсы Шкаень Ваймопожфсь, сон мзярдонга аф мярьгови: «Ульхть сюдоф Иисус!» И кивок аф мярьгови Иисусонди: «Тон Азорат», кда ся ломанць аф вятневи Иняру Ваймопожфса.

⁴ Улихть эрь кодама казнет, но сембе синь фкя-тяка Ваймопожфть эзда.

⁵ Улихть эрь кодама покодемат, а Азорсь, конанди покоттяма, фкя-тяка.

⁶ Шкаень вийть тевонзонга эрь кодапт, но сембе ня тефнень тиендьсыне-няфнесыне фкя-тяка Шкайсь сембе кемаензон лангса.

⁷ Но Ваймопожфть покодемац макссеви эрь кемайти марстонь тевса лезксонди.

⁸ Фкяти Ваймопожфсь максы смузьшинь вал, омбоцети тяка Ваймопожфсь максы содамошинь вал,

⁹ лияти тяка Ваймопожфсь максы кемама, киндиге тяка Ваймопожфсь максы пчкафнемань казнет,

¹⁰ а киндиге максы казне тиендемс дивань тефт, кинди максы пророчендамань казне, кинди – казне сотцемс ваймопожфнень. Кинди-бди максы лия кяльхнень лангса корхтамань казне, а кинди максы казне панчсемс тяфтама кяльхнень смузьснон.

¹¹ Семботь тянь тиендьсы фкя и тяка Ваймопожфсь, кона Эсь мяленц коряс эрь ломанти максси башка казне.

Христость ронгоц ащи лама пяльксста

¹² Христость ронгоц, кода ломанень ронгське, ащи лама пяльксста. Хуш ронгсь тиф лама пяльксста, сон сембе сяка ляткшни фкя ронгокс.

¹³ Тяфта миньге сембе: еврейхне и грекне, уретне и воляшистотне улеме кстиндафт фкя ронгс фкя Ваймопожфса. И сембонди тейнек максфоль симомс фкя-тяка Ваймопожфта.

¹⁴ Вдь ронгсь ащи аф фкя пяльксста, а ламоста.

¹⁵ Кда пильгсь мярьголь: «Мон аф кядян, сяс аф тя ронгоннян», дяряй тянкса сон лоткай улемда ронгонь пяльксокс?

¹⁶ Пилеське мярьгондяряль: «Мон аф сельман, сяс аф тя ронгоннян», дяряй тянкса сон лоткай улемда ронгонь пяльксокс?

¹⁷ Кда марнек ронгсь улель сельме, эста кода кулель? И кда сембе ронгсь улель пиле, эста кода маряль шине?

¹⁸ Но Шкайсь сотозень марс ронгть сембе пяльксонзон и эрти макссь васта ронгса Эсь мяленц коряс.

¹⁹ Кда сембе ащельхть аньцек фкя пяльксста, эста коса улель ронгсь?

²⁰ Но тяни лисенди тяфта: пялькста лама, а ронгсь фкя.

²¹ Сельмось аф мярьгови кядти: «Тон аф эряват тейне». Пряське аф мярьгови пилькненди: «Тинь тейне аф эряфтада».

²² Меколанкт, ся ронгонь пяльксне, конатнень минь лувсаськ инь лафчекс, синь сембодонга эрявикст.

²³ А ся пялькснень, конатне тейнек няевихть-марявихть аф сяшкава питникс, минь сяда пяк вельхнесаськ лия пялькснень коряс.

²⁴ И аф мазы васттнень щасаськ-кяшсаськ сяда лац, мезе аф эряви тиемс мазыхнень мархта. Шкайсь сотозень ронгонь пялькснень тяфта: Сон макссь сяда оцю питне ся пяльксненди, конат тейнек марявихть аф сяшкава питникс.

²⁵ Тянь Шкайсь тиезе тянкса: афольхть уле ронгса явожкшнемат, а сембе пяльксне фкаста лездольхть фкя-фкянди.

²⁶ Кда маятай фкя пялькссь, эста мархтонза маятайхть сембе лия пяльксневок. А кда шнави фкя пялькссь, мархтонза марса кеняртькшнихть сембе лиятневок.

²⁷ Сембе марса тинь Христость ронгоц, а башка, эрсь тинь эздонт Сонь ронгонц пяльксоц.

²⁸ Шкайсь кемаень пуромксса васенда путозень апостолхнень, меле пророкнень, а меле тонафтыхнень; сяльде сятнень, кинди максф казне тиендемс дивань тефт, а сяльде сят, кинди максфт пчкафнемань казнет, ломаненди лездомань казне, вятемань казне и лия кяльхнень лангса корхтамань казне.

²⁹ Дяряй сембе апостолхт? Дяряй сембе пророкт? Дяряй сембе тонафтыхть? Дяряй сембе тиендихть дивань тефт?

³⁰ Дяряй сембонь улихть пчкафнемань казнесна? Дяряй сембе корхтайхть лия кяльхнень лангса? Дяряй сембонь ули казнесна панжемс лия кяльса азфть смузенц?

³¹ Ёрада сатомс сяда оцю казнет! И тяни мон тейнть няфтьса сембодонга цебярь кить.