Павелонь васенце сёрмац Коринфу 11 - Од Соткс Новый Завет на мордовском-мокша языке 2016

¹ Тиендеда монь лацон, кода мон тиендян Христость лаца.

² Мон шнатядязь тинь, кемай ялгат, сянкса, мес тинь фалу мяляфттада сембе монь тевнень-валнень колга и тиенттяда ся тонафтомать коряс, кона инголи панчфоль тейне и конань сяльде мон максыне тейнть.

Озондомста прянь вельхтямать колга

³ Монь мялезе: содалесть тинь: эрь аляти прякс ащи Христос, авати – мирдец, а Христосонди прякс ащи Шкайсь.

⁴ Эрь алясь, кона озонды али пророчендай вельхтяф прят, прафнесы визьксс эсь прянц.

⁵ Эрь аваське, кона озонды али пророчендай штадоньбрят, прафнесы визьксс тейнза прякс ащить. Тя сяка, кда сон улель штадос нараф.

⁶ Кда авать мялец алятнень лаца аф вельхнемс прянц, эста катк прокс керсыне шяярензон. Но кда авати визькс керфтомс али штадос нарафтомс шяярензон, эста катк вельхнесы прянц.

⁷ Аляти аф эряви вельхнемс прянц, сяс мес сон Шкайть и Сонь оцюшинц няфтемац, а авась – мирдть оцюшинц няфтемац.

⁸ Вдь аф алясь эвондась авать эзда, а авась алять эзда,

⁹ и аф алясь тифоль авать инкса, а авась алять инкса.

¹⁰ Сяс эрь авати, ангелхнень инкса, эряви прясонза каннемс азорксшинь тяштькс.

¹¹ Но Азорть мархта од эряфса аляти и авати аш кода улемс башка фкя-фкянь эзда: авась лезды аляти, алясь – авати.

¹² Вдь кода авась тифоль алять эзда, тяфта аляське шаченды авать эзда, а сембось эвондась Шкайть эзда.

¹³ Тинць арьсесть, ладяй али аф авати озондомс штадоньбрят?

¹⁴ Вдь ни сявок, кода Шкайсь тиезе тя масторть, тонафты эсонт: аляти кувака шяярень каннемась – визькс,

¹⁵ а авати кувака шяярьхне – мазыши. Синь тейнза максфт кода прянь вельхтяма руця.

¹⁶ А кда кинь мялец мархтон пялькстомс тянь кувалма, мон азса: аф минь, аф лия кемаень пуромксса аш лия обуця тяда башка.

Азорть лемс ярхцамать колга

¹⁷ Нинге лия тонафтомат мон максан тейнть. Аньцек тяни аф шнатядязь тинь, сяс мес марстонь кочксеманте лезксть вастс кандыхть тейнть сяда лама зиянда.

¹⁸ Васендакиге, мон кулине, мзярда тинь кочксефтяда кемаень пуромксса, ётксонт улендихть явомат. Мон тянди аф ламода кеман.

¹⁹ Мялень явоматненди улема тинь ётксонт, синь вельдест тейнть сяда содави, кит эздонт афкуксонь кемайхть.

²⁰ Эрь вов, мзярда тинь кочксефтяда сембе марса, тя пуромксть аш кода лемдемс Азорть лемс ярхцамакс,

²¹ сяс мес эрсь тинь эздонт куроконе уроми эсь ярхцамбяленцты. И вов фкясь эздонт кадови вачеда, а омбоцесь туй ирецта.

²² Мезе, тинь аш эсь кудонте, коса ярхцаледе и симоледе? Али тинь мезькска аф лувсасть Шкаень кемаень пуромксть и мяленте визделгофтомс ашуфнень? Мезе азомс тейнть? Шнамс тянкса? Аф, тянкса аф шнатядязь!

²³ Вдь мон Азорть эзда содайне, а сяльде максыне тянь тейнть: Иисус Азорсь ся веня, мзярда Сонь мизь, сявозе кшить,

²⁴ азсь сюконяма Шкайти, синдезе и мярьгсь: «Сявость и ярхцада, тя Монь ронгозе, кона синневи тинь инксонт. Тянь тиендесть Монь лятфнемган».

²⁵ Илядень ярхцамада меле Сон тяконь лаца сявозе кядьготьке и мярьгсь: «Тя кядьгось – од соткс, кона кемокстаф Монь версон. Эрь мезня, мзярда карматада эздонза симома, тиендесть тянь Монь лятфнемган».

²⁶ Сяс, эрь мезня, мзярда тинь ярхцатада тя кшида и сиптяда тя кядьгоста, тинь пачфттяда куля Азорть куломанц колга, мзярс Сон аф мрдай меки.

²⁷ Тяфта эрсь, кие тя кшида ярхцамста и Азорть кядьгоста симомста вятьсы прянц аф кондястикс, ся мувору Азорть ронгонц и веронц каршес.

²⁸ Сяс катк эрь ломанць варчсесы эсь прянц и аньцек тяда меле ярхцай тя кшида и сими тя кядьгоста.

²⁹ Вдь кие ярхцай и сими, аф лувозь и аф арьсезь – тя Азорть ронгоц, ся ярхцай и сими эсь прянц судендаманкса.

³⁰ Сяс тинь ётксонт лама лафчта, сярядида и аф кржа кулось.

³¹ Но кда минь минць варчселеськ эсь пряньконь, эста Азорсь афолемазь суденда.

³² А мзярда Азорсь минь судендасамазь-наказасамазь, Сон ладясамазь виде кис – тязаме уле судендафт аду лядыкс масторлангть мархта.

³³ Сяс, кемай ялгане, мзярда тинь кочксефтяда Азорть лемс ярхцамас, учседа фкя-фкянь.

³⁴ Кда кие вачеда, катк инголькиге ярхцай кудса, тяфта тинь марса кочксеманте аф улихть тейнть судендаманди. Лия тефнень ладясайне, мзярда саян.