Павелонь васенце сёрмац Коринфу 10 - Од Соткс Новый Завет на мордовском-мокша языке 2016

Ванфтода пря аф афкуксонь шкайхненди сюконямада

¹ Кемай ялгат, монь мялязе лятфтамс тейнть вов мезе: сембе минь атянь-атяньке ульсть коволть ала, и сембе синь ётасть оцюведть туркс.

² Тя коволть и оцюведть эса сембе синь ульсть кстиндафт, кода Моисеень мельге молихть.

³ Сембе синь ярхцасть ваймопожфонь фкя-сяка ярхцамбяльда.

⁴ И сембе синь симсть ваймопожфонь фкя-сяка симомбяльда, симсть ваймопожфонь кевбандста, кона ашезень кадонда синь. Тя кевбандсь ульсь Христос.

⁵ Но сембе сяка ламотне эздост ашесть ту Шкайть мяльс, и синь кулость шавмодаса.

⁶ Сембонь тянь вельде тейнек няфтевсь: афоль уле мяленьке тиендемс кяж, кода ульсь атянь-атяньконь.

⁷ Тяда арсе аф афкуксонь шкайхненди сюконяйкс, кода кой-конатне синь эздост. Вдь Сёрматфксса азф: «Ломаньтналсь озась ярхцама-симома, сяльде стясь и срхкафтсь кштимат аф афкуксонь шкайхнень лемс».

⁸ Аф карматама прашендома усксевомас, кода тись мзярошкась синь эздост. Синь прасть усксевомас – и фкя шиста синь эздост шавовсь комсь колмува тёжянь.

⁹ Аф карматама варчсемонза Христость куватьс кирдемшканц, кода тиендсть ёткстост конат-конат: синь кулсесть куень пупамада.

¹⁰ Тяда изгорда, кода изгордсть ёткстост конат-конат. Синь машфтозень куломань ангелсь.

¹¹ Сембось, мезе лиссь минь атянь-атяньконь мархта, улеза тейнек тонафтомакс. Тя сёрматф тейнек, минь ванфтомганк, кит эряйхть пингть песта.

¹² Сяс эрсь, кие арьси: сон кемоста ащи пильге лангса, катк ваны, афоль пра.

¹³ Сембе варчсематне, конат прайхть лангозонт, сембе синь ломанти кирдевомшкат. Шкайсь кирдьсы валонц: Сон мзярдонга аф нолдай лангозонт стама варчсемат, конат улельхть тейнть аф вийс коре. Тяконь лаца эрь варчсемаса Сон няфти лисема васта и максы вий сонь кирдемс.

¹⁴ Сяс, кельгома ялгат, ворьгодеда аф афкуксонь шкайхненди сюконямада.

¹⁵ Мон корхтан мархтонт, кода пряса арьси ломаттнень мархта. Тинць арьседа монь валнень колга.

¹⁶ Дяряй бславамань кядьгось, конанкса астама сюконяма Шкайти, минь аф сотсамазь Христость веронцты? Кшиське, конань минь синнесаськ, дяряй аф сотсамазь Христость ронгонцты?

¹⁷ Кшида фкя, и хуш эздонк лама, миньге арсетяма фкя ронгокс, сяс мес явондсаськ сембонди фкя-тяка кшить.

¹⁸ Варжакстода Израилень ломаньтналть лангс! Кали сят, кит ярхцайхть озксказненди кантфта, аф сотовихть тянь сюнеда Шкаень алтарти?

¹⁹ Мезе мон ёран азомс тянь вельде? Ули кодамовок виец озксказнеть, кона кантф аф афкуксонь шкайти, али ули кодамовок виец аф афкуксонь шкайть?

²⁰ Кодамовок аш! Но мзярда аф афкуксонь шкайхненди сюконяйхне кандыхть озксказне, синь кандсазь сонь аф Шкайти, а кяжи ваймопожфненди. А монь аш мялезе шоворямс тинь кяжи ваймопожфнень мархта.

²¹ Тейнть аш кода симомс Азорть кядьгоста и кяжи ваймопожфнень кядьгоста. Тейнть аш кода ярхцамс Азорть шранц ваксса и кяжи ваймопожфнень шраснон ваксса.

²² Кали минь мяленьке сргозьфтемс Шкайть кяженц? Кали минь Сондедонза виихтяма?

Семботь тиендесть Шкайть шнаманкса

²³ Тинь корхтатада: «Сембось мярьгондеви», но аф сембось канды лезкс. Тинь корхтатада: «Сембось мярьгондеви», но аф сембось касфты-кемокстай.

²⁴ Катк кивок аф вешендьсы сянь, мезсь тейнза цебярь, а вешендьсы сянь, мезе лияти канды цебярь.

²⁵ Сембода, мезе рамсетяда сиволень мишендихнень кядьста, ярхцада и ваймовайгялентень инкса тяда кизефне мезевок.

²⁶ Вдь Сёрматфксса азф: «Модась и мезе сонь лангсонза – сембось Азорть».

²⁷ И кда кивок аф кемайхнень эзда терттядязь эсь пялонза и тинь мольхтяда, ярхцада сембода, мезе сон путы инголент и мезевок тяда кизефне ваймовайгялентень инкса.

²⁸ Но кда тейнть мярьгихть: «Тя озксказнекс кантфть эзда», эста тяда ярхца, сянь инкса, кие тянь азозе, и ваймовайгяльть инкса. Вдь азф: «Модась и мезе сонь лангсонза – сембось Азорть».

²⁹ Мон корхтан аф тонцень ваймовайгяльцень колга, а тянь азыенц. Мес монь азорксшизе судендави лиять ваймовайгяльса?

³⁰ Кда мон ярхцан и сюконян Шкайти ярхцамбяленкса, эста мес кивок сюцесамань монь ярхцамбяльть инкса, конань инкса мон азондан сюконяма?

³¹ Эрь вов мезе: ярхцатада али сиптяда, семботь мезе тиенттяда, тиендесть Шкайть шнаманкса.

³² Эряда тяфта: афоледе уле пупордамань кевкс аф еврейхненди, аф грекненди, аф кемаень пуромксти.

³³ Тиендеда монь лацон: мон тяряфнян ваномс сембонь мяльснон, мон аф вешендян эстейне цебярь, а вешендян цебярь лиятненди, синь идемаснон инкса.