Titus 3 - Pupu Oharo Āre 1963 Genese 1970 Rute 1972

Keriso haela ve mai veveke i iele ila

¹ Erero kileavahaeaki — ere va amua oaria i gavana haela ila ve pupu auhohi iapai kiva leivahaeakive, kai horova oharo oaria au hiki iapakive.

² Ere haela ae ve rare o heaha kavahaelue, hahari kalaivahaelue, ikiheroe mai leivahaeaki; haela oaria hoveahovea ikihuru leivahaeakive.

³ Ehovea elaviila kara oropa hoa iki haveva mai leivahaeape. Elaviila kara oropa hoa pupu oharo au iapaila, iki haeae kelavape: meahaiapo ve mai lahua lahua oaria ikivere leivahaeape. Elaviila kara overa hoa ikiheaha leivahaeape kai hahari oaria avahaeape.

⁴ Aka aireaki hoa Aualari haela oaria v'ila leipe la ikiheroe hihika kihorerape.

⁵ Ehovea elaviila leivahaeape horova mekaka va ka, aka, ehovea are elaviilara ikihuru havahu leivahaeape. Are elaviilave iki ureve huhela āre hovea leivahaeape, kai Ove Veveke elaviilara avikiarape.

⁶ Are la meru oaria elaviilave lei makukuriki haela Iesu Keriso v'ila aikiarape.

⁷ Areve ikiheroe meru elaviilara lei ehohoe leivahaeape; laelave elaviila ovokake haiapo la haruku iele hoveahovea aeakilai.

⁸ Ma oharo va iele: ara va ikivere a va ma oharo mea oaria kileavahaevila — Aualari ve rare iele havahu kelavape la haela, ere va horova veveke kara kiva leivahaeakive, heroe. Ma va haela ve kileaki oharo kara, mekaka iele.

⁹ Naoae naoae ape hahari kailue. Vilakao oaria mureaki mai a haure leiki. Pupu oaria ve hahari titae titae kara, ehovea ma oharo hahari va iele karia.

¹⁰ Hoa orahokaila aihukamaeape la haeae haela iki helari aue la leikilava, arero avakaki.

¹¹ A v'ore leiki, are va haeae le leipe, are va mai heaha ikivere havahu le leipe.

Kokaukaki oharo i ikiheroe oharo ila

¹² Ara Artemas aka Tychicus ave leia paraeaki la hoa a va iki elavelave Nicopolis leia araro eavakive. Ara va mea vevehere hoa maia aeakilai.

¹³ Zenas, pupu ore haela, i Apollos ila ereve hahi hoa auhohi paparaehaki; ere va eharu v'ila heraho kalaivahaelue.

¹⁴ Elaviilave haela horova oaria mekaka auhohi leivahaeakive, heroe, ere va naoae naoae kapealue.

¹⁵ Ara i hareho apealula la haela oaria aro ikiheroe oharo paparaehaeairo. Elaro ikivere leilula la ikikekela haela oaria elave ikiheroe oharo maeaeaki. E oaria ikiheroe meru ila apeaki.