Titus 2 - Pupu Oharo Āre 1963 Genese 1970 Rute 1972

Keriso haela ve mai veveke i iele ila

¹ A va o iele ehoe hiki erero kileavahaeakive.

² Haela hoaha mai ehohoe leivahaeaki, iki ehoe, iki here, ikikekela veveke, kai ikiheroe mai ila kiva leivahaeakive.

³ Uavila hoaha kara — ere va hehe mai iele leikive, opore oharo avahaea v'arekaea: ma heaha oaria lalavahaea v'arekaea, oharo veveke hiki kileakive.

⁴ Ere uavila āre mai veveke kileavahaeakive, vilaita kiva leivahaeakive, akoremari ikiheheroe leivahaeakive.

⁵ Ere va iki ehoe i mai veveroro kiva leivahaeakive. Ere elare uvi auhohi apeakive, vila ve oharo iapakive, Aualari ve oharo rare heaha avaki ave.

⁶ Harokou haela kara ape karava maeaeaki, ere va iki ehohoe leivahaeaki.

⁷ A havahu ve horova veveke ereve ihova la. Ave kileaki oharo haeae kalailue, o iele i ehoe ila kileakive.

⁸ Oharo aheke i ehoe ila hukavakive, haela lahovea oharo haeae maea va ka. Laria kara aro oharo hahari la haela are makiri leikilai, ehovea ave haeae karia, oharo ehoe hiki.

⁹ Horova haela ahilaki — ere va ereve haelapo ve oharo iapai leivahaeakive, ehovea erero ikiveveke leivahaeakive. Ere va oharo iapa hiki heroe, kavale oharo kailue.

¹⁰ Ere mai ehoe leikive heroe, eharu korea kalaivahaelue. Ereve horova oaria ovokake Aualari ve iroro oharo rare veveke avarakilai.

¹¹ Ehovea Aualari ve ikiheroe meru ekepe haela oaria lei makukurikive.

Keriso haela ve ikivere iele

¹² Are elaviilara maria kileavahaevila — elaviila mai heaha i opopoe mai oaria hahaure la leivahaeakilava, elaviila hahari hahari apeapea mai ehoe hiki kiva leikive, Aualari ve ikivere hoveahovea, ma meahaiapo hoa ve.

¹³ Elaviilave Aualari iele, Amua Iesu Keriso ila haharika veveke ila kihoaukilai. Elaviila leia ve la hoa karikilai.

¹⁴ Ehovea are elare maea avarape elaviilara mai heaha ve lei makukurikive. Are are havahu ve ikivere haela, mai veveroro i horova veveke ila haela oaria elare le korukaiavahaeakilai.

¹⁵ Ma oharo oaria kileaki, ape kara ahilaki, a va aheke ila aihukamaeaki. Haela aro haure lei v'arekaea.