Titus 1 - Pupu Oharo Āre 1963 Genese 1970 Rute 1972

Ikiheroe oharo

¹ Ara, Paul, Aualari ve horova haela, aposetolo haela kara, ehovea ikikelavalula haela oaria Aualari ve ikivere haela, aeka ehovea Aualari ve okiharo i o iele ikivere leivila haela.

² Ehovea ara va ikivere ovokake haiapo: opore karia la Aualari meahaiapo ve avare koare hoa okoare maeape la ovokake.

³ Are va aireaki areve iele iroro ve okiharo ve kileape. La iroro horova are araro avikiarape, elaviilave ovokake leivila Aualari ve ape karava hoveahovea.

⁴ Titus e, a ara iki akore havahu, ehovea elaviila oaria ve ikikekela haroapo, elaviila ve Oa Aualari i lei makukuriki Amua Iesu Keriso ve ikiheroe meru i ikihuru i havila ila avaki.

Haela Hoaha itavakive

⁵ Ara aro Crete leia hakurepape ehovea ava eharu oaria lei ehohoe leivahaeakive. Ehovea a va ekalesia oropa haela hareavakive, ara aro maeape la oharo hovea hovea.

⁶ Mai ehohoe haela hiki hareavaki, uva haroapo hiki haela, ereve akoremari kara iki ehoe ila naoae naoae mai v'arekaea.

⁷ Ehovea bishop haela mai veveroro hiki leikive, heroe, ehovea are Aualari ve kiva haela: are elare iki hiki v'arekaea, elavelave hihiri kalailue, ma heaha oaria lari haela va ka, erohoho oaria ikivere haela v'arekaea.

⁸ Are va iki amua haela hovea hovea leikive, haela mekaka ikivere lei va heroe, mai ehoe kiva leikive, iki ehoe, mai veveke hiki, elavelave iki heaha va ka.

⁹ Arero kileape la ikikekela oharo are kiva leikive heroe. Lahovea are va kileaki oharo v'ila, oharo hahari haela heaorapakilai.

Opore kilea haela

¹⁰ Ehovea haela perehekai oaria oharo haeae hukavalula, oharo pelaea arula haela oaria, o iele, la peritome mai ikivere leilula haela oaria.

¹¹ Ereve ape kokaukakive heroe, ehovea ere lalava haela oaria kurupaealula. Ere ve kileaki oharo haeae oaria, ehovea ere va ikivere moni kavale.

¹² Ere havahu ve haela ae, ereve peroveta haela, mariape, Crete haela va mea oaria opore haela, mai heaha haela, kai e lahua haela.

¹³ Ma oharo va iele. Laelave erero aheke aihukamaeakive heroe, ereve ikikekela lei aheke i ehoe ila leikive.

¹⁴ Ere va Judea haela ve la lou‐oharo kekela v'arekaea, haela ve pupu oharo hiki ere ka iaparue, la pupu erero o iele ve hareavaki ave.

¹⁵ Mai veveroro haela oaria eharu oaria veveroro kelavalula: Iki haeae i mai heaha leilula haela eharu oaria hirihiri hiki. Ereve iki kara hirihiri le leiro.

¹⁶ Ereve ape oharo maria — ere va Aualari ore, aka ereve horova Aualari ve horova hovea ka: ereve mai heaha oaria. Ere va oharo veveke iapavahaea va ka, kai horova veveke leivahaea va ka.