Ruta 1 - Pupu Oharo Āre 1963 Genese 1970 Rute 1972

Ruta i Naomi ila

¹ Heheavaki amua haela ita kiva leivahaeape la hoa, ita hohera leipe, kai Iuda ve karikara Betelehema ve haela ae Moaba ita leia hoai aeaveape, are i areve uva i areve akoremari orahokaila ila.

² La haela ve rare va Elimeleka, areve uva ve rare Naomi, kai areve akoremari ve rare va Malona i Kiliona; ere va Iuda ve karikara Betelehema ve Eparata haela. Ere Moaba la ita leia hoahuka apearoape.

³ Aka Naomi ve vila, Elimileka, apape, laelave Naomi i areve akoremari orahokaila, lahua apearoape.

⁴ Ma akoremari Moaba uavila karape; uva haroapo ve rare va Opa, aeva uva ae ve rare va Ruta. Ere hareho hitolo mai ukai ukai ila apearoape.

⁵ Malona i kiliona ila kara apihaeape, laelave Naomi ve vila i akoremari ila hareho karia le leivahaeape.

Naomi i Ruta ila helari Betelehema itauvahaeape

⁶ La hoa Naomi i areve eveahura Moaba la ita ve hakurepai elare ita helari aukive ipopeavape, ehovea are va Moaba la ita leia iapape, Iehova areve haela hukapavah?-?aeaki eapai aiarape.

⁷ Laelave are i areve eveahura i hareho are aeveape la ita harepai, Iuda la ita helari auvahaeape.

⁸ Aka Naomi areve eveahura maeaeape, “Evalila ealilave apavara ve uvi helari auvahaeaki. Iehova ealilara ikiheheroe leivahaeaki, hoveahovea ealila araro kai elaviilave apihaeape haela ikihekeroe leivahaeape.

⁹ Iehova ealilara haroapo aeaki ita avarakilai, ealila are karaki vilaita ve uvi ureve!” La hoa are erealilara ape popoape, kai erealila hivavara eapapo avahaeape.

¹⁰ Erealila arero maeape, “Ka, elalila a i hareho ave haela ve leia helari auvahaeakilai.”

¹¹ Aka Naomi maeape, “Ealila helari aireaki auvahaeaki. Evalila ara i hareho auvahaeakive ehovealeve? Ara aeka akoremari erakilai ha, ehovea ealilave vilaita leivahaeakive?

¹² Ealila helari aireaki auvahaeaki, arave marita e, elare oki auvahaeaki ehovea ara va uamari eapapo, vila aea laeaki hovea ka. O iele ara ikivere la leikilava, kai ma oroa vila are araro la koarakilava, kai akoremari la erakilava,

¹³ ealila ereve aheauki hoa karikilai ha? Ealila vila laeakive hahaure la leivahaeakilai ha? Arekaea, arave marita e, ehovea ara va ealila v'ila ikihuru iele, ehovea Iehova ve mai araro lei heraho leipe”.

¹⁴ La hoa ere aeka hivavara eapapo avahaeape. Kahara, Opa areve lou ve vila ape popoai aupe; aka Ruta Naomi au hahavape.

¹⁵ Naomi mariape, “Eavaki, ave mari kake elare haela i elare aualari ve leia helari laila; ave la mari kake ve aire aukive, heroe.”

¹⁶ Aka Ruta mariape, “Aro hakurepakive, kai aro airekai auki aue oharo araro kamaealue. Ehovea a v'auki la ita ara aukilai; a v'aeaki la ita ara v'aeakilai. Ave haela arave haela leivahaeakilai, kai ave Aualari arave Aualari.

¹⁷ A va apaki la ita ara apakilai, ere araro leia karu ihakilai. Aiai arave apaki hoa ara a v'ila lahua la leikilava, Iehova araro kavale lahovea koakive.”

¹⁸ Naomi ore leipe are va are i hareho aukive ikivere aheke iele, la hoa areve oharo karia leipe.

¹⁹ Laelave, erealila auvahaeai Betelehema leia. Erealila Betelehema leia ekepe la hoa, karikara haela oaria erealila v'ila iki horahora leivahaeape kai uavila maeaeape, “Ma va Naomi ha?”

²⁰ Are erero maeaeape, “Araro Naomi rare ka itavalue, araro Mara rare itavaki, ehovea Akea Aualari araro lei kakare eapapo leipe.

²¹ Ara hoaupe la hoa ara kai lalava haela oaria ila, aka Iehova araro haroka ila lai kihoaupe. Araro Naomi rare leve itavakive, ehovea Iehova araro hararuape, kai Akea Aualari araro lei heraho leipe.”

²² Laelave Naomi elare ita helari aupe, kai areve evera, Moaba uamari Ruta, are i hareho aupe, Moaba ita ve helari kihoahukape la uavila. Erealila barley hae hovare hoa ve Betelehema leia ekevahaeape.