Rome 9 - Pupu Oharo Āre 1963 Genese 1970 Rute 1972

Ikihuru ehovea Israel ve ikikekelaki aue mai

¹ Keriso oropa ve, arave oharo iele havahu, ara opore ka — Ove Veveke oropa ve arave iki ehoe leive:

² Ara va iki mehau i ikihuru eapapo iele leivila.

³ Ehovea ara va ikivere arave aivau ve la apavara ve haiae ve kavale, ara havahu avakilai.

⁴ Ere va Israelite haela, Aualari erero karape; areve haharika, areve okoare, areve pupu oaria, kai Aualari ve horova i okoare ila are erero aiarape.

⁵ Houva hoa haela kara va papa haela ve vilali haela: ere v'ila aivau ve epape meavore, Keriso. Are va haela oaria ve akea ve — aualari rare lei morapaeaki — Amene.

Aualari ve okoare hahaeae au laila

⁶ O iele, Aualari ve oharo naoae au leila. Ehovea Israel ve hiru haela uku Israel ve vilaipi haela havahu ka.

⁷ Aeva Abraham ve meavohula haela uku kara, ere va Abraham ve hiru havahu ka: Ehovea, Isaac ve la eravo ve, eve meavohula ve hiru la itavakilai.

⁸ La oharo ve iele ma — Aivau v'ila Israel ve akoremari uku — Aualari ve akoremari havahu leivahaea va ka; aka okoare arura la akoremari, meavohula havahu ere la.

⁹ Ehovea okoare iele maria ape, Ma hoa hovea ara kihorerakilai — kai Sarah akore la epakilai.

¹⁰ Leia hiki ka, ehovea Rebeccah kara, Papa Isaac v'ila ero ila leipe.

¹¹ Ehovea akoremari va lou ve eharau ureve hiki apearoape, laelave ere va veveke aka heaha kara au laila: laelave ehovea Aualari ve ikivere okiharo iele havahu leikilai, horova hiki va ka, aka ehovea Aualari kai itavape.

¹² Laelave Aualari arero maeape, Akoreapo akoreheari ve horova haela leikilai.

¹³ Overa oharo laria hape: Ara va Jacob ikivere leipe, Ara Esau ikihairihairi leipe.

Aualari ve mai ehoe hiki

¹⁴ Elaviila learia maeakilai ha? Aualari va mai haiae ore ha? Arekaea!

¹⁵ Ehovea Are Moses maria maeape: Ara va ikivere haela Ara ikihuru leikilai: ara va ikivere haela ara ikiheroe iele leikilai.

¹⁶ Laelave, haela ve ikivere hovea lei va ka, haela ve horova aheke kara hovea lei va ka, aka Aualari hiki ikiheroe leivila.

¹⁷ Ehovea Buka oharo Pharaoh maria kileape: Ehovea ma horova iele ara aro lei urapape, ehovea Ara ave la oki ve arave aheke hihika amoeakive; laria arave rare meahaiapo helari hupakai eapapo leikilai.

¹⁸ Laelave, areve ikivere hovea, are haela ikihuru leivila, aka ikiheaha leivila.

Aualari va Amua iele

¹⁹ Ehoveala a va araro maria kimaeakilai: Ehovealeve are haela ve haiae au hiki haropavila ha? Areve ikivere oki leita la hereavape?

²⁰ Haelakaru e, a va leita haela, Aualari va oharo hahari arive ikivere ha? Au karikipe la eharu arero karikipe la haela learia maeakilai, Ehovealeve a va araro maria karikipe ha?

²¹ Elaa karikipe la kae, arero karikipe haela ve eharu ka ha? Are kae uku areve mai ve elaa veveke i heaha ila hoveahovea karikikive ore ha?

²² Lehae ha? Aualari, ehovea are ikivere areve hihiri hihika leikive, aeva areve aheke kara haela ore leikive, haiapo iele heaha leivahaeaki la eharu ve heraho leipe la.

²³ Are kara aireaki ikihuru leikilai la eharu, areve lei veveke leiki okiharo ere v'ila hihika leivahaeape, are oropa kekelape la veveke leiki okiharo.

²⁴ Elaviilave iele la; are elaviilara kai itavavahaeape, Jew haela i ita lahua haela kara hareho.

²⁵ Are va peroveta haela Hosea ve buka maria oharo maeape: Ara va erero Arave haela la itavavahaeakilai: Ere va oropa hoa Arave haela ka. Arave ikivere havahu akoremari, Ere va oropa hoa Arave akoremari ka.

²⁶ Aireaki kara maria leikilai Ara oropa maeape, E va Arave haela va ka, Leia ve ere va aireaki ovokake iele la Aualari ve akoremari rare lei itavavahaeakilai.

²⁷ Isaiah kara āra maria hape: O iele, Israel ve akoremari maeoka iele la leivahaeakilava, uku haela hiki ovokake leivahaeakilai.

²⁸ Ehovea are horova karia lei mai ehoe v'ila ka hekai leikilai, ehovea Amua va meahaiapo ureve horova ka hekai hiki leikilai.

²⁹ Isaiah kara maria maeape: Sabaoth la Amua elaro meavohula haroapo haroapo la haita?-?pakilava, elaviila Sodom i Gomorrah ila hoveahovea leivahaeakilai.

Israel haeae leipe ehovealeve?

³⁰ Elaviila learia maeakilai ha? Mai ehoe ve pupu au koaraila la ita lahua haela, mai ehoe le koarape, ikikekela aheke la mai ehoe.

³¹ Aka mai ehoe ve pupu kiva leivahaeape la Israel haela mai ehoe iele au koaraila ha?

³² Ehovealeve? Ehovea ere va ikikekela okiharo ve mai ehoe au haropaila, aka pupu ve la okiharo hiki. Ehovea ere va au hereavaki la have ve le hihilaupe.

³³ Overa oharo maria hape: Iapaila, ara va Zion ita haela lei hilaukive have aipape, hereavaki have eapapo. Areve rare ikikekelaki la haela oaria makiri leivahaea va ka.