Rome 6 - Pupu Oharo Āre 1963 Genese 1970 Rute 1972

Keriso i hareho aeavila haela mai heaha hakurepape

¹ Elaviila leari maeakilai ha? Elaviila mai heaha hiki leivahaeakilai, ehovea ikiheroe meru koarakive ha?

² Arekaea! Elaviilave mai heaha overa hapururukape, laelave mai heaha aeka kalaivahaealue.

³ E haveva ha, elaviila Iesu Keriso v'ila bapatiso leivahaeape haela, are api la bapatiso leivahaeape haela, ha?

⁴ Laelave, elaviila are i hareho la apaki hoa ve bapatiso v'ila karu le ihavape. Hoveahovea Oa ve haharika Keriso karu ve lai urapape, ela kara ovokake are v'ila urahukakilai.

⁵ Ehovea elaviila hareho areve apape hoa hoveahovea va laila, elaviila Are i hareho urahukakilai.

⁶ Elaviila ore ma: elaviilave overa maea are i hareho satauro ve apihaeape, ehovea mai heaha ve maea hovea haeakive: laelave elaviila aireaki mai heaha ve horova leivahaea va ka.

⁷ Ehovea apape la haela areve mai heaha le hakurepape.

⁸ Elaviila i Keriso ila hareho apilahaeakilava, elaviilave ikikekela elaviila are i hareho ovokake le leivahaeakilai.

⁹ Elaviila ore Keriso api kai uroupe, laelave are aire kai apa va ka. Apaki la maea arero haha va ka.

¹⁰ Are va apape, laelave la hoa haroapo are mai heaha ve apape. Are Aualari ve ovokake aeavila, ehovea are ovokake leipe.

¹¹ Laria kara, e va elare maea kelavaki, mai heaha ve apihaeape hovea, aka Aualari v'ila ovokake iele, ehovea Iesu Keriso elaviilave Amua ve ikiheroe.

¹² Laelave, mai heaha eve meahaiapo ve maea ka heaoraparue: e va areve mai heaha ikivere kalaivahaelue.

¹³ Eve maea hareho kara mai haiae ve horova kalailue: aka Aualari ve horova hiki leiki, api kai urahukape haela hoveahovea: eve maea hareho kara mai ehoe hiki ikivere laila.

¹⁴ Ehovea mai heaha eve Amua hovea lei va ka; Pupu hiki ero kiva leiva ka, aka ikiheroe meru iele.

Horova ve au hahape haela ve ihova

¹⁵ Lehae ha? Elaviila mai heaha leivahaeakilai ha? Ehovea pupu hiki elaviilara kiva leivahaea va ka, aka ikiheroe meru elaviilara kiva leivahaeakilai!

¹⁶ E ore ka ha? E va lela haela ve horova leivahaelula, e va la haela ve oharo le iapavahaeakilai. Eva areve oharo iapaki la haela, e va areve horova haela, mai heaha aiai apihaeakive la mai, aka iapa veveke aiai lei ehoe leivahaeaki la mai.

¹⁷ Aka Aualari lei morapaeaki, e va oropa mai heaha haela, aka ero avarape la kilea oharo e va iapai auhohi le leivahaeape.

¹⁸ Laelave, e va mai heaha ve harepai mai ehohoe ve horova haela le leivahaeape.

¹⁹ Ara haela hovea ma oharo la maeaive, ehovea e va aivau haela mahuka, ehovea e va maea hareho v'ila eve mai hirihiri la koarape, kai heahaha lahua lahua oaria leivahaeape. Hoveahovea e ma hoa eve maea hareho ve mai ehoe i o muruha haela leivahaeakilai.

²⁰ Ehovea e mai heaha ve horova leivahaeape la hoa, e mai ehoe au leivahaeaila.

²¹ E la heaha hoa ve le veveke koarape ha? E ma hoa maioka ehovea la heaha. Ehovea la eharu ve kavale au hiki apihaealula mai.

²² E ma hoa mai heaha harepape, laelave e va maraha leiki mai veveke koarailula, aiai ovokake haiapo.

²³ Ehovea mai heaha ve kavale va au hiki le apihaeakilai. Aka Aualari ve meru ma, Iesu Keriso, elaviilave Amua, ovokake haiapo aikiarape.