Rome 5 - Pupu Oharo Āre 1963 Genese 1970 Rute 1972

Ikikekela ve veveke

¹ Elaviila ikikekela aheke v'ila lei ehohoe leivahaeape, laelave elaviila Amua Iesu Keriso ve oki ve Aualari ve havila ila apeakilai.

² Ehovea ikikekela aheke areve rare ve, elaviila ikiheroe meru koaraki okiharo le avi, elaviila o iele apealula la, kai Aualari ve haharika v'ila ikiveveke leivahaeakilai.

³ Leia hiki ka, aka elaviila heraho oaria v'ila ikiveveke leilula, ehovea elaviila ore elaviila heraho leikive la okiharo ve iki aheke leivahaeakilai.

⁴ Ehovea la aheke, iki ore kara leivahaeakilai, iki ore ve la okiharo ve, ikivere mai kara.

⁵ Ikivere leivahaeaki la haela makiri leivahaea va ka, ehovea elaviilara avikiarape la Ove Veveke, Aualari ve ikiheroe haela oaria ve iki heheloakoakilai.

Keriso apape ehovea Aualari ve ikiheroe

⁶ Ehovea elaviila aheke au leila la hoa, la hoa iele Keriso mai hahaeae haela v'ila apape.

⁷ Ehovea, o iele haela ae mai ehoe haela v'ila apakive ikivere lei va ka; lae vi va, mai veveke haela v'ila uku haela va apihaeakive oaoka leivahaea va ka.

⁸ Aka Aualari elaviilara leipe la ikiheroe o iele amoeavila, maria: elaviilave mai heaha hoa Keriso elaviilara ve apape.

⁹ Laelave, o iele, ehovea areve apu elaviilara lei veveroro leivahaeape, are v'ila elaviila hihiri ve lei ovokake leivahaeakilai.

¹⁰ Elaviila areve iri haela leivahaeape la hoa, Aualari areve Akore v'ila elaviila lei ehohoe la leivahaeakilava, o iele, elaviila lei ehohoe leivahaeaki la hoa, areve la ovokake elaviilara lei ovokake leivahaeakilai.

¹¹ Leia hiki ka, aka elaviila aeka Aualari v'ila ikiveveke leilula, elaviilave Amua Iesu Keriso la okiharo ve; ehovea elaviila la okiharo ve lei ehohoe leivahaeape.

Apape hoa Adam v'ila, Ovokake Keriso v'ila

¹² Laelave, ehovea haela haroapo ve okiharo v'ila, mai heaha meahaiapo ekepe, kai apaki hoa ehovea la mai heaha, apaki hoa haela oaria le avape, ehovea haela oaria mai heaha ila.

¹³ Aiai pupu hihika leipe la hoa meahaiapo va mai heaha ila: aka pupu haveva la hoa haela mai heaha ve kavale ava va ka.

¹⁴ Lae vi va, Adam ve hoa aiai Moses ve hoa, apaki mai va heaorapape, o iele Adam leipe la mai heaha hovea au leila la haela kara: Adam ve maea areve aireaki ekeki la Amua ve maea hovea ihova leipe.

¹⁵ Aka kavale aue la meru are va la haeae hoveahovea va ka. Ehovea haela haroapo ve mai heaha ve haela oaria la apihaeakilava, o iele, Aualari ve meru, ikiheroe ve la meru, haela haroapo Iesu v'ila ekepe: la meru haela oaria lei mekaka leivahaeakilai.

¹⁶ Ae va ma, la meru, haela haroapo v'ila ekepe la mai heaha hovea lei va ka: ehovea haela haroapo ve haeae heheavi haiae le koarape, aka kavale aue la meru heahaha oaria hapururukakilai.

¹⁷ Ehovea haela haroapo ve haiae haela oaria la apihaeakilava, o iele haela oaria ikiheroe meru eapapo i mai ehoe ila, haela haroapo, Iesu Keriso v'ila aeakilai.

¹⁸ Laelave, hoveahovea, haela oaria heaha koarape, ehovea haela haroapo ve mai heaha, laria kara ehovea haela haroapo ve mai ehoe, haela oaria ve heahaha le hapururukakilai.

¹⁹ Hoveahovea, ehovea haela haroapo ve iapaki aue mai, haela oaria mai heahaha leivahaeape, laelave ehovea haela haroapo ve iapaki mai veveke, haela oaria lei ehohoe leivahaeakilai.

²⁰ Aeka ma — Pupu kihoaupe, laelave mai heahaha hihika leivahaeape. Aka mai heahaha hihika leivahaeape la ita, leia kara ikiheroe meru kara lei aheke leipe.

²¹ Hoveahovea, mai heaha apaki mai avikepe, ikiheroe meru mai ehoe v'ila heaorapape, aiai ovokake haiapo, ehovea Iesu Keriso elaviilave Amua ve la okiharo ve.