Rome 4 - Pupu Oharo Āre 1963 Genese 1970 Rute 1972

Abraham ve ihova

¹ Elaviila learia oharo arilai? Elaviilave aualau haela Abraham, aivau ve la oki ve, learia ha?

² Abraham ve horova arero lei ehoe va laila, are va pelaea leikive heroe, aka Aualari oropa ve v'arekaea.

³ Pupu buka leari oharo hape? Abraham Aualari iki kekelape, laelave areve iki lei ehoe leipe.

⁴ Horova leivila haela aeaki eharu meru va ka, areva kavale iele.

⁵ Aka horova leiki aue haela, mai heaha lei ehoe leiki haela ikikekelavila la haela, areve ikikekela va mai ehoe hovea kekelavila.

⁶ David kara laria — Aualari lei ehoe leiki la haela, kai areve horova hiki kekela va ka, la haela David morapaeape:

⁷ Maria: Ereve mai hahaeae hapururukaki la haela, kai heahaha hareavape la haela va iki veveke ila.

⁸ Aualari areve mai haeae kekela va ka la haela va iki veveke ila.

⁹ Ma lei veveke oharo peritome leiki haela v'ila hiki ha? aka peritome leiki aue haela v'ila kara ha? Ehovea elaviila Abraham v'ila maria arura, areve ikikekela arero lei ehoe leipe.

¹⁰ Ere la ikikekela mai ve leari kekelape? — arero peritome leipe la hoa, aka peritome au laila la hoa ha? Peritome leipe la hoa va ka, aka peritome au laila la hoa.

¹¹ Are va peritome mai ve ihova avape. Areve peritome leiki aue hoa ve ikikekela ve ihova la. Laria are va ikikelavaki haela oaria ve oa leikilai, peritome leiki aue haela kara hareho, ehovea ere eoaria ehoe le leivahaeakilai.

¹² Aeva are va peritome mai leilula haela hiki ve oa lei va ka, aka Abraham ve peritome leiki aue hoa ve kekela mai kiva leilula la haela oaria ve oa kara.

¹³ Ehovea Abraham meahaiapo ita oaria ve haruku aeakive la okoare pupu oaria v'ila au maeaila, aka ikikekela mai ehoe v'ila.

¹⁴ Ehovea pupu hiki kiva leilula la haela basileia la aeakilava, ikikekela mai veveke naoae le leipe, okoare kara iele karia.

¹⁵ Ehovea pupu ve oki ve hihiri kihorerakilai: pupu karia la leikilava, haeae kara karia.

¹⁶ Laelave, ipi iele va ikikekelaki mai, ehovea ikiheroe meru hovea leikive: laria, okoare meavohula oaria le aeakilai, pupu kiva leilula la haela hiki ka, aka elaviila oaria ve papa Abraham ve ikikekela hovea leilula haela oaria kara.

¹⁷ (Overa hape oharo ka laria: Ara aro vilaipipi oaria ve oa leikilai) are ikikekelape la Aualari, elaviila iki kelavakilai, ehovea are apihaeape haela lei ovokake leivahaeape, kai iele karia la eharu are iele le leivahaeape.

¹⁸ Abraham ikihorahora leipe la hoa kara iki kekelape, laelave are vilaipipi oaria ve oa leipe, arero maeape la okoare hovea — ave meavohula maeakoko leivahaeakilai.

¹⁹ Are haela eapapo i maea mahuka leipe la hoa are iki horahora au laila, ehovea are va hitolo 100 hovea. Sarah ve lauapau hoa kara, areve ikikekela karia au laila.

²⁰ Are Aualari ve okoare karipe hoa ikihorahora au leila, aka iki aheke kekela Aualari morapaeape.

²¹ Ehovea are ore leipe — Aualari okoare maeape la horova are leikilai.

²² Laelave la mai arero lei ehoe leipe.

²³ Arero lei ehoe leiki la oharo are hiki v'ila au haila.

²⁴ Aka, elaviila kara, ehovea elaviila elaviilave Amua Iesu karu ve lai urapape la Aualari iele la kelavakilai, elaviila lei ehohoe leivahaeakilai.

²⁵ Ehovea Iesu elaviilave haeae v'ila apape. Are elaviilara lei ehohoe leivahaeakive api kai uroupe.