Rome 3 - Pupu Oharo Āre 1963 Genese 1970 Rute 1972

Au hahaki oharo ve kavale

¹ Laelave, Jew haela ve veveke lahoa ha? Aeka, peritome mai ve veveke lahoa ha?

² Veveke maria: Oropa, ehovea Aualari Areve ikiore oharo erero kileavahaeape.

³ Lehae? Haela uku iki au kelavaila ha? Ereve ikikekelaki aue mai Aualari la kekelaki mai naoae naoae leikilai ha?

⁴ Arekaea! Kaire, Aualari va iele, haela oaria va opore, overa hape oharo kara laria: A va au hukavape la oharo aro lei ehoe leikilai, kai heheavaki la hoa kara, veveke leikilai.

⁵ Aka elaviilave mai heahaha Aualari ve mai ehoe la morapaeakilava, elaviila learia maeaeakilai ha? Aualari va haeae ha, ehovea are haeae ve kavale leivila (ara va haela hovea oharo arive)?

⁶ Arekaea! Ehovea laria la leikilava, Aualari meahaiapo learia heheavakilai?

⁷ Ehovea Aualari ve O iele eapapo la leikilava, ehovea arave opore arero morapaeape: ehovealeve are araro mai haiae haela hovea heheavakilai ha?

⁸ Aeva maria va ka (haela uku elaviilave kileaki oharo haiae rare arura) elaviila haeae leikilai, laria veveke kihorerakilai ha? Ere va heaha koaravahaeaki va heroe.

Haela oaria mai heaha leilula

⁹ Learia ha? Elaviila veveke, ere va heaha ha? Ka! Laria ka. Ehovea elaviila overa amoeape, Jew haela i ita lahua haela kara hareho mai heaha ureve apealula.

¹⁰ Overa hape hohoa hoveahovea: Mai ehoe havahu haela va karia, karia iele.

¹¹ Iki auhohi kelavaki haela va karia, Aualari iele haropavila haela va karia.

¹² Ere oaria oki veveke harepai haiae le leivahaeape. Mai veveke leiki haela va karia.

¹³ Ereve karave va au‐hapape kapu ita hovea. Ere va auli ila hehepo eapapo leivahaeape. Ekaroa ve muramura heaha ereve ape‐iilu ureve le aeave.

¹⁴ Ereve ape va o heaha i iki heaha oaria ila.

¹⁵ Ere va apu hakaitapakive ikivere leivahaeape.

¹⁶ Ereve okiharo leia mai heaha i iki kakare oaria apearo.

¹⁷ Ere va havila okiharo ore au leivahaeaila.

¹⁸ Ere va Aualari oaoka leivahaeai au kelavaila.

¹⁹ Elaviila ore, ma hoa, au haeape la pupu oaria, ehovea pupu ureve apealula la haela. Laria ape oaria kokaukavahaeakilai, kai meahaiapo haela oaria Aualari oropa ve hahaeae leivahaeakilai.

²⁰ Laelave, pupu ve horova v'ila, aivau haela oaria areve oropa ve lei ehohoe leivahaea va ka, ehovea pupu ve okiharo v'ila, haela oaria mai heahaha ore leivahaeape.

Keriso ve ikikekela lei ehohoe leivahaeakilai

²¹ Aka ma hoa, Aualari ve mai ehoe pupu mahokaea ve hihika leivila, ehovea pupu i peroveta oharo ila hareho vavavahaeape.

²² Kaire, Aualari ve mai ehoe, Iesu ve rare ikikelavaki haela oaria ore leivahaeakilai, kai iele aeakilai, haela oaria hoveahovea.

²³ Ehovea haela oaria mai haiae leivahaeape, kai Aualari ve mekakure hoveahovea au leivahaeaila.

²⁴ Ehovea Iesu Keriso ve ovokake leipe mai, haela oaria areve mai veveke v'ila, iele havahu lei ehohoe leivahaeape, kavale karia.

²⁵ Aualari arero paraeape ehovea haela areve apu ve iki kelavahaeai lei ehohoe leivahaeakive; ehovea haela areve mai ehoe overa ve mai heahaha hapururukakive, la oharo hihika kileakive, ehovea Aualari areve ikiheaha kara laria haerapape.

²⁶ Ara aeka maeaive — Are va ma hoa areve mai ehoe amoeakive ikivere, ehovea are va ehoe heheavakilai, kai Iesu ve rare ikikekelaki la haela kara lei ehoe leikive.

²⁷ Pelaea ve iele lahoa ha? Are va arero le avakape. Lela pupu v'ila ha? Horova v'ila ha? Ka! Aka ikikekela ve la pupu.

²⁸ Laelave elave ikikekela haela ve iapa kekela mai arero lei ehoe leikilai, pupu ve horova v'ila va ka.

²⁹ Are Jew haela ve Aualari hiki ha? Are va ita lahua haela ve Aualari va ka ha? Kaire. Ita lahua haela ve kara,

³⁰ Ehovea — Are va Aualari haroapo: are va peritome ila haela ikikekela ve oki ve lei ehoe leikilai, kai peritome leiki aue haela kara ikikekela ve oki ve lei ehoe leikilai.

³¹ Laelave, ela va ikikekelaki ve oki ve pupu naoae leikilai ha? Arekaea! Ela va pupu lei aheke leikilai.