Rome 2 - Pupu Oharo Āre 1963 Genese 1970 Rute 1972

Jew haela kara ve hahaeae

¹ Laelave, haela e, a va haiae eapapo heheavaki haela e, ehovea a va haela ae la heheavakilava, a elare kara heheavakilai: A va heheavaki haela — la eharu heaha a kara leivila.

² Aka, ela v'ore, Aualari o iele havahu ma eharu leivahaelula haela heheavakilai.

³ Haela e, ma eharu leivahaelula haela a heheavila, aka ma eharu a kara leivahaevila: ave ikikekela Aualari are heheava va ka ha?

⁴ Areve mai veveke kai ikiheroe kai ikihuru oaria a hahaure leivahaevila: A va ore ka ha? Aualari ve ikiheroe mai heaha ve ikihuru leikive okiharo aro lai au va ka ha?

⁵ Aka ave iki aheke iele kai iki helari va ka, laelave a va hihiri oaria au hiki korukiavahaevila, aiai Aualari ve hihiri i ehoe heheavaki hare hihika horeavakilai.

⁶ Are va haela oaria ereve horova ve kavale hoveahovea aiarakilai.

⁷ Mai veveke kiva leilula la haela, ovokake haiapo i basileia ve mea veveke aeakilai: ere va ovokake haiapo aeakilai.

⁸ Hahari leilula i oharo iele iki kelavaki aue la haela — mai haiae, ikiheaha lei hihiri leilula la haela,

⁹ Ere va heraho i ikihairihairi eapapo ila, heaha leilula la haela oaria, Jew haela oropa, aireaki ita lahua lahua haela kara.

¹⁰ Aka horova veveke leilula la haela, lei morapaeai rare veveke arila, kai havila avarakilai, Jew haela oropa, aireaki kai ita lahua haela kara.

¹¹ Ehovea Aualari haela oaria aeva akea ve aeva ipi ve kekela va ka.

¹² Ehovea pupu mahokaea ve haeae leivahaeape la haela ere va pupu mahokaea ve apihaeakilai. Pupu ore leivahaeape la haiae leivahaeape haela, pupu erero heheavakilai.

¹³ Ehovea pupu au hiki iapailula la haela Aualari ve oropa ve ehohoe leivahaea va ka, aka pupu kiva leivahaelula la haela, ere va aireaki lei ehohoe iele leivahaeakilai.

¹⁴ Ehovea pupu haveva ita lahua haela elare maea ve pupu hovea huavape la eharu la leivahaeakilava, ehovea ere va pupu karia, ere havahu ve pupu hovea leivahaelula.

¹⁵ Ere pupu ve horova hoa elare iki ureve amoeaelula, ereve ikikekela vavavila: ereve la ikikekela kara elarelare heheavakilai.

¹⁶ La hare, ara va iroro avila la oharo hovea, Aualari haela oaria ve muruhari eharu, Iesu Keriso ve la okiharo ve, hihika heheavakilai.

¹⁷ Iapai: A va Jew haela: a va pupu aheke leivila: a va Aualari v'ila pelaea leivila.

¹⁸ A va areve iki ore, a va eharu mekaka ikivere, ehovea a va pupu oharo ve leia ore leipe.

¹⁹ Ave ikikekela a va ovohae kariri haela ve kari auki haela, kai muru ka apealula la haela ve ovava leivila.

²⁰ Ave ikikekela ava haveva haela ve kilea haela, kai akoremari titaeka ve kiva leiki haela, ehovea ava iki ore i pupu ila ve iele overa koarape.

²¹ Laelave, a haela ae la kileakilava, a va elare iki kekela va ka ha? A va korea leiki aue mai kirivila, a havahu korea lei va ka ha?

²² A va haela ae airi pavora mai leiki aue oharo kileavila, a havahu airi pavora mai lei va ka ha? A va hohao harihu hahaure leivila haela: a va Aualari ve hehe mai hiki leivila ha?

²³ A va pelaea leivila, ehovea pupu ore leipe: a pupu haerapaki la hoa, a Aualari ve rare heaha lei va ka ha?

²⁴ Ita lahua haela Aualari ve rare o heaha avahaelula, ehovea ave haeae, buka hape la oharo hoveahovea.

²⁵ Ehovea, a va pupu kiva la leikilava, peritome mai va iele ila. Aka, a va pupu la haerapakilava, ave peritome mai va iele ka.

²⁶ Laelave, peritome leiki aue la haela pupu ve mai ehoe kiva la leikilava, areve peritome aue mai va iele ila, peritome ila la haela hoveahovea ha?

²⁷ Laelave, peritome leiki aue mai la haela pupu kiva la leikilava, are pupu ve hohoa i peritome ila pupu haerapaivila la haela heheava va ka ha?

²⁸ Ehovea elare maea hovea hiki la Jew haela are Jew haela havahu ka. Aeva aivau ve la peritome leipe la haela, areve peritome iele va ka.

²⁹ Aka Jew haela va iele ma — iki ureve kekelavila la haela, aeva peritome mai ve iele iki ureve, ove ve pupu ve, ape hiki va ka. La haela areve ikivere va ka haela ve morapaeaki oharo, aka Aualari ve morapaeaki oharo hiki.