Rome 15 - Pupu Oharo Āre 1963 Genese 1970 Rute 1972

Paul ve kileaki oharo aheke ve iele

¹ Laelave, elaviila aheke leivahaeape haela mahuka haela la koara va heroe: elare ikivere hiki leivahaea v'arekaea.

² Elaviila i hareho apealula la haela elaviila hukapava heroe, ehovea erero lei mekaka leivahaeakive.

³ Ehovea Keriso kara elare ikivere au laila, aka overa hape la oharo hovea hovea ma, Haela oaria ve heaha ve mehau ara le avape.

⁴ Ehovea overa haeape la oharo oaria, elaviilara la kileakive i haeape oharo va la — ehovea la, elaviila aheke i iki veveke ila okiharo veveke le koarakilai.

⁵ Ikiheroe i aheke ila la Aualari ero elarelare ikiheheroe leilula mai v'ila aheke leivahaeaki; Iesu Keriso ve la mai hoveahovea.

⁶ Ehovea e va iki haroapo hiki hovea Aualari morapaeaki, o iele, elaviilave Amua Iesu Keriso ve Oa havahu la.

⁷ Laelave, e va elarelare ikiheheroe leivahaeaki, Keriso elaviilara ikiheheroe Aualari v'ila lahovea leivahaeape.

⁸ Arave oharo ma — Iesu Keriso Aualari ve O iele ve peritome ukai ve oharo iroro ari haela, ehovea uvari vilari la hoa haela ve la okoare iele leivahaeakive.

⁹ O iele, ehovea ita lahua haela kara Aualari ve ikihuru mai morapaeakilai: Overa hape oharo maria: Ehovea ma, ara ave rare ita lahua haela ve leia hihika kileakilai, Kai arave hivi ve ave rare morapaeakilai.

¹⁰ Are aeka maeape: Ita lahua haela e, e areve haela ila hareho ikiveveke leivahaeaki.

¹¹ Oharo aeka ma: Ita lahua haela oaria areve rare morapaeaki, E haela oaria kara arero hela morapaeaki.

¹² Esaias kara maria maeape: Jesse ve meavore kihorerakilai: Ita lahua haela ve kari auki haela. Areve rare ita lahua haela iapai kelavakilai.

¹³ Mahau iki veveki leiki la Aualari eve ikikekela lei aheke leikive: are ero ikiveveke i havila ila aiarakilai, ehovea e oaria lei aheke leivahaeakive, Ove Veveke ve aheke ve oki ve.

¹⁴ O iele, ara kara e v'ila maria kekelavila, apavara, e va mai veveke leivahaelula, e va iki ore overa koarape, ae va e elarelare aihukamaeaki mai ore.

¹⁵ Aka, ara va ero oharo aheke iele hohoa hai paraeape, Apavara e, eve iki lei ehohoe leivahaeakive, o iele, ehovea Aualari araro avikiarape la ikiheroe meru.

¹⁶ La meru ma — ara va Iesu Keriso ve iroro horova haela, ita lahua haela ve leia va, ehovea erero Aualari ve oharo kileavahaeakive. Laria, ita lahua haela ve ivaiva kara veveke leikilai, ehovea la ivaiva Ove Veveke lei hehe leipe.

¹⁷ Laelave, arave Iesu Keriso v'ila pelaea leiki eharu mekaka le apearo, Aualari ve la eharu mekaka havahu.

¹⁸ Keriso lahua leivahaeape la horova oaria, arave horova ka, ehovea ita lahua haela ve oharo i horova ila lei mekaka leivahaeakive, ara hukava va ka: are ara v'ila leipe la horova hiki ara hukavakilai.

¹⁹ Ihova ehoaha i ikihorahora leivahaeaki eharu oaria, ehovea Aualari ve Ove ve aheke ila — laelave — ara va oropa Jerusalem aiai Illyricum Keriso ve iroro oharo veveke ita oaria le ape.

²⁰ O iele havahu ara va oharo veveke ve horova leivahaeape, Keriso ve rare haveva la ita oaria ara iroro ape, haela ae overa horova leipe la ita ara korea avaki ave.

²¹ Overa hape oharo laria: Overa oharo au iapaila la haela ovohae le eavavahaeape: Overa ore au leila la haela ere iapai ore leivahaeakilai.

Paul ve ikivere okiharo

²² Laelave ara va ero eavakive elauki oki au koaraila, heraho hiki.

²³ Aka ma hoa, ara va maia horova hoa karia leilai: ara hitolo oaria kara ero ovohae eavakive ikivere leivila.

²⁴ Ara va Spain ve hahi leiki la hoa ara eve leia pekakilai. Ara va ikivere la hahi hoa ero eavakive. Ara eve leia perehekai aeakilai, eve ikihuru koarakive, kai ikiveveke lei aukilai.

²⁵ Aka ma hoa ara va Jerusalem leia pekakilai, ehovea leia ve hehe haela koarakive.

²⁶ Ehovea Macedonia i Achaia ila la haela eharu korukaiape, ehovea Jerusalem ve merava hehe haela meru uku paparaehakive.

²⁷ Ere va ikivere leivahaeape horova la, ehovea ekalesia haela ve horova iele la. Ehovea ita lahua haela i hehe haela ila hareho ove veveke eharu herehere leivahaeape, laelave veveke ere va ereve maea ve eharu ere i hareho kara herehere leikive.

²⁸ Ara ma hahi oropa, ma meru ara erero oropa aiarakilai, ara eve la oki ve Spain aireaki aukilai.

²⁹ Ara v'ore, ara eve leia pekaki hoa, ara Iesu Keriso ve iroro oharo ve veveke ila pekakilai.

³⁰ Ara ero here leive — apavara e — ehovea Amua Iesu Keriso ve harihari i Ove Veveke ve ikiheroe, e ara i hareho Aualari ara v'ila ivaiva hela leikive.

³¹ Araro ikikelavaki aue Judea haela araro paea va arekaea, ae va ara Jerusalem hehe haela ve la meru aiaraki horova auhohi leikive, heroe.

³² Laria, ara eve leia Aualari ve ikihuru ve ikiveveke lei pekakilai.

³³ Havila ve la Aualari e i hareho aeaki — Amen.