Rome 14 - Pupu Oharo Āre 1963 Genese 1970 Rute 1972

Elarelare heheava v'arekaea

¹ Ikikekela mahuka leivila la haela kiva leiki, kai areve mahuka kaheheavalue.

² Ehovea ikikekela aheke ve la haela are eapai oaria le hiki, hahaure lei va ka — ikihorahora la haela are va e koro eharu hiki lalavila.

³ E‐karave eharu lahua lahua ikivere la haela, eapai haure la haela heheo ila va kailue. E‐karave eharu haure leivila la haela e‐karave eharu ikivere la haela aikahukamaealue, ehovea Aualari kara arero ikivere.

⁴ A va haela ae ve horova haela leve heheavakilai? Are havahu ve haelapo arero heheavakive heroe. Are aheke pavakilai, ehovea Aualari arero lei urapape.

⁵ Haela ae hare ae ikivere eapapo leivila, haela ae are va hare oaria hoveahovea hiki kekelavila. Haela oaria elare ikikekela aheke leivahaeakive heroe.

⁶ Hare haroapo morapaeavila la haela, are Amua v'ila morapaeaive. Hare haroapo kekelaki aue la haela are kara Amua v'ila la horova leivila. Eapai lalavila la haela are va Amua ve oki ve lalavila, ehovea are Aualari thank you oharo avila. Eapai haure leivila la haela, are kara, la haure leiki hoa, Aualari thank you oharo avila.

⁷ Ehovea elaviila elare ovokake lahua leivahaea va ka. Elaviila kara lahua apihaea va ka.

⁸ Ehovea elaviila ovokake la leivahaeakilava, elaviila Amua v'ila leivahaelula. Elaviila apilahaeakilava, elaviila Amua v'ila apihaealula. Laelave, elaviila ovokake la leivahaeakilava, aka apilahaeakilava, elaviila Amua ve haela iele.

⁹ Ehovea ma, Keriso api kai urai ovokake leipe, Ehovea are apihaeaki haela i ovokake ila la haela ve Amua.

¹⁰ A va apoheari leve heheavave ha? A va apoheari haure leivila ehovealeve ha? Elaviila oaria hareho Keriso ve heheavaki ita oropa ve pavakilai.

¹¹ Ehovea overa oharo maria hape: Haela oaria arave oropa ve ari loa avai ekaopakilai. Haela oaria ve ape Aualari ve rare hihika morapaeakilai.

¹² Laelave, elaviila oaria hareho Aualari ve heheavaki mai ore leivahaeakilai.

¹³ Laelave, elaviila elarelare heheava v'arekaea: maria hiki kelava va heroe — haela ae areve apoheari ka hereavalue, ehovea arero lei hilaukive.

¹⁴ Ara v'ore, ehovea Iesu ve kileaki oharo laria — eharu ae va hirihiri karia, aka haela ve ikikekela maria eharu ae va hirihiri, la eharu hirihiri le leikilai.

¹⁵ Aka ave apoheari ave e karave eapai ikihairihairi la leikilava, a va arero ikiheroe leikive haveva ha? Ave la eapai ve oki arero kahararuarue, Keriso apape ehovea are kara.

¹⁶ Laelave, ave horova veveke hoa haela o heaha kimaeaki ave.

¹⁷ Ehovea Aualari ve basileia va iele, eapai i ma ila hiki va ka, aka mai ehoe i havila i Ove Veveke ve ikiveveke la.

¹⁸ Ehovea ma eharu ve oki ve Keriso ve horova leivila la haela, are va Aualari ve oropa ve veveke, aeva haela oaria kara arero ikivere la leiro.

¹⁹ Laelave, elaviila havila ve eharu veveke ikivere leivahaeakive heroe, ae va haela oaria la lei mekaka leivahaeaki eharu.

²⁰ Eapai ve eharu Aualari ve horova heaha kalailue. Eharu oaria va mekaka, aka eapai naoae naoae laravila la haela haiae leivila.

²¹ Veveke ma, ave apoheari haure leiki la eapai i ma ila kai eharu aeva la, a va areve oropa ve le v'arekaea, arero lei haiae lei mahuka leiki ave.

²² A va ikikekela k' aeave ha? A havahu ve ikikekela Aualari ve oropa ve aheke leiki. Eharu ae va ikivere lei haeae leiki aue la haela are va ikiveveke leikilai.

²³ Eapai v'ila ikihorahora leivila la haela, are va horahora leiki la eapai lari hoa haeae le leikilai, ehovea la hoa areve ikikekela ehoe ka. Ehovea ikikekela karia la horova are va horova heaha!