Rome 13 - Pupu Oharo Āre 1963 Genese 1970 Rute 1972

Amua haela ve pupu iapai kiva leivahaeakive

¹ Haela oaria gavana Haela ve pupu kiva leivahaeaki — ehovea ita oaria ve gavana Haela ere va Aualari ve horova haela — ereve horova ipi ve Aualari ve.

² Laelave gavana haela ve pupu hahaure leivahaeaki la haela ere Aualari ve pupu kara hahaure leivahaealula. La hahaure leilula la haela heaha kavale avakilai.

³ Mai veveke haela gavana haela oaoka leivahaea va ka, mai heaha haela hiki. A va ikivere ka heheavaki haela oaoka leikive ha? Heroe, a horova veveke la leikilava, ave rare lei veveke leikilai.

⁴ Ehovea are va ave horova kiva haela veveke. Aka a va heaha la leikilava, a oaoka leiki va heroe, ehovea are heheavaki rare naoae au availa. Are Aualari ve horova haela, ehovea haeae leiki la haela kavale avarakilai.

⁵ Laelave, e va areve oharo iapa hiki, heroe, ehovea hihiri oaoka hiki va ka, aka ehovea iki kara ehoe leikive.

⁶ Laelave, e va tax kavale kara leilula, ehovea tax korukaiavahaeaki haela ere va Aualari ve horova haela, ereve horova ma haroapo.

⁷ Haela oaria ve kavale ehoe hiki leivahaeaki: tax haela areve tax moni, gavana haela areve la pupu hovea, akea haela lei momorapuki.

Apavara mai

⁸ Haela ae ape karava kalaivahaelue — elarelare ikiheheroe leivahaeaki: ehovea ikiheheroe leilula haela pupu iele kiva leilula.

⁹ Ehovea pupu maria, Airi pavora mai kalailue, korea kalailue, opore kahukavalue, haela ve eharu ikivere kalailue. Ma pupu oaria ipi ve iele ma, A i hareho aeavila haela — elare maea hovea ikiheroe leiki.

¹⁰ Ikiheroe haela are i hareho aeavila la haela haiae lei va ka; laelave — pupu ve iele va ikiheroe.

Keriso ve hare kihorerakilai

¹¹ Aeka, e va ma hoa ore, avuku ve urouki hoa ma, ehovea ma hoa elaviilave ovokake hoa maia iele, elaviila oropa kelavape la hoa hovea ka.

¹² Oroa maeamaea karia leilai, hare hoa maia iele. Laelave elaviila muru hoa ve la horova haitapa va heroe, ovava ve eharu ikivere va heroe.

¹³ Elaviila mai ehoe ila auvahaeakilai, hare hoa loalula hovea — elaviila ihape mai i mai heaha ila leivahaea va arekaea; korea mai kalaivahaelue; hahari i hihiri mai v'arekaea.

¹⁴ Aka Iesu Keriso ve la mai veveke leivahaeaki — aeva aivau ve eharu i meahaiapo ve mai heaha kelava v'arekaea.