Rome 12 - Pupu Oharo Āre 1963 Genese 1970 Rute 1972

Ovokake are

¹ Ara ero here leive, apavara e. E va maea morava iele leikive, Aualari ve ikihuru oki ve: eve maea va ovokake i hehe i mekaka ila, Aualari ve meru hovea leikive, ehovea eve horova veveke iele la.

² E meahaiapo hiki hovea kalailue: eve iki helari auhohi kelavaki, iki are leikive: laria e va Aualari ve ikivere mai ehoe i mekakure ila hihika amoeakilai.

Ove ve meru ve horova iele

³ Ehovea Aualari araro avikiarape la ikiheroe meru ve oki ve, ara ero maeaeaive, e haela oaria elare maea hiki kelava va arekaea, aka iki ehoe hiki kelavaki, Aualari haela oaria kileavahaeape la hovea,

⁴ Ehovea elaviilave maea va ukuku oaria, aeva maea ve la ukuku horova hoveahovea leivahaea va ka,

⁵ Laria kara, ehovea elaviila haela oaria, elaviila hareho Iesu Keriso ve maea haroapo hovea, elarelare apavara iele.

⁶ Laelave, elaviila oaria ikiore lahua lahua, ehovea Aualari ve meru lae, elaviila ve iki ovava hovea horova leivahaeakilai: peroveta oharo la avahaeakilava, veveke avahaeakive heroe;

⁷ La horova haela, horova veveke leivahaeakilai, kilea haela, kilea horova kara veveke leivahaeakilai;

⁸ Oharo Haela, oharo veveke o iele avahaeakilai. Meru avaraki la horova kara, pelaea ila v'arekaea: Amua horova leivahaeaki la haela, kiva auhohi leivahaeakilai. Ikiheroe leivahaeaki la haela, iki veveke ila la mai leivahaeakilai.

Keriso ve okiharo ve pupu iele

⁹ Ikiheroe mai hehepo kalaivahaelue: mai heaha hahaure leivahaeaki, mai veveke ikivere leivahaeaki.

¹⁰ Elarelare ikiheheroe leivahaeaki, apavara hovea, elarelare momorapu va heroe.

¹¹ Horova hoa mahuka v'arekaea, ove aheke leivahaeaki, Aualari ve horova auhohi leivahaeaki.

¹² Ikiveveke lei ikihorahora kalaivahaealue, heraho hoa ikihairihairi v'arekaea, ivaiva kiva auhohi leivahaeaki.

¹³ Merava haela ve ikivere eharu aiaraki; hahi haela ikiheheroe leivahaeaki.

¹⁴ Ero hararualula la haela momorapuki, o heaha kamaeaealue.

¹⁵ Ikiveveke ila la haela i hareho ikiveveke leivahaeakilai, ikihuru ila la haela i hareho ikihuru leivahaeaki.

¹⁶ Elarelare ikikekela hoveahovea leivahaeaki. Akea haela hiki kakelavarue, ipi la haela kara kelavaki. Elare ikiore ve pelaea kalaivahaelue.

¹⁷ Heaha leiki la haela kavale heaha leivahaea va arekaea. Haela oaria ve oropa ve mai ehoe leivahaeaki.

¹⁸ Eve maea hovea, haela oaria i hareho ila havila ila apeaki.

¹⁹ Ikiheroe, apavara e, hihiri ve kavale hihiri kalaivahaelue; la horova Aualari la avaraki. Ehovea overa buka maria hape: Heaha ve kavale leiki horova ara havahu! Aualari ve oharo maria: Ara havahu horova heaha ve kavale avarakilai.

²⁰ Laelave, ave iri haela eroa la leikilava, arero eapai avaraki. Are ma karave koa la leikilava, arero ma kara avaraki. Laria, a va areve haro ve a kai hovea la korakilai.

²¹ Mai heaha ero heaorapa va arekaea. E havahu mai heaha heaorapa va heroe.