Philippi 3 - Pupu Oharo Āre 1963 Genese 1970 Rute 1972

Aivau ve eharu iele ka

¹ Arave oharo aeka ma: E va Amua v'ila ikiveveke leivahaeaki. Oropa haeape la oharo aeka haeakive ara ikihairihairi lei va ka. E kara la oharo aeka iapakive, heroe.

² La avita heaha, horova heaha haela, peritome ikivere haela, e kiva leivahaeaki.

³ Ehovea elaviila va peritome iele ukaki haela, Aualari ve Ove Veveke v'ila ivaiva leilula haela. Elaviila Iesu Keriso v'ila iki veveke leivahaelula. Elaviila aivau eharu momorapu va ka.

⁴ Ara va aivau ve aheke perehekai kekelakive heroe la; haela aea elare maea ve pelaea la leikilava, ara va arero heaorapakilai.

⁵ Ehovea ara Israel vila‐ipi haela, akore hekai hoa peritome mai leipe. Ara ve Benjamin eravo haela; ara va Hebrew haela ve akore iele; ara pupu ve la okiharo ve Pharisee iele.

⁶ Arave horova aheke ma — ara ekalesia hararuape. Ara va pupu ve okiharo v'ila mai ehoe iele, haeae karia.

Paul ikivere Keriso i hareho aeakive

⁷ Lae vi va, la hoa ara mekaka kelavape la eharu ve ma Keriso ve hoa ve iele karia.

⁸ O iele, arave ikikekela maria, Iesu Keriso ve ikiore mekakure oropa ve, eharu oaria va heaha hiki, iele karia. Are v'ila ara va eharu oaria le havoavi karia le leivahaeape, la eharu oaria ara ve erorova hovea kelavape, ehovea ara Keriso le avape.

⁹ Ara va areve ureve aeavila, arave mai ehoe ara havahu ve eharu ka, aka Keriso ve ikikekela v'ila la mai ehoe, Aualari ve ikikekela ve la mai ehoe.

¹⁰ Laria, ara va arero ore leikilai, heroe, kai areve api kai uroupe la aheke kara — areve kakare ara are i hareho herehere leikive, heroe, aiai are apape la maea hovea ara kai apakilai, heroe.

¹¹ Ara va laria, areve api kai urouki la okiharo ve mekakure koarakilai.

¹² Ara overa au koaraila; ara va mekakure au leila — aka ara maea hovave leivila, ehovea ara va ikivere avakive, Iesu Keriso ara v'ila overa avape la eharu.

¹³ Apavara, ara va maria kekela va ka, ara la mekakure overa koarape — ara maria hiki leivila — ara va oropa la eharu haitapai aireaki la mekakure avakive harava vivilavila.

¹⁴ Ara hivove hovea vivilavila aiai Aualari ve Iesu Keriso ve la mai veveke meru mekakure hovea koarakilai.

¹⁵ Laelave, elaviila mai mekakure ore leivahaeape haela iki haroapo hovea kelavakive, heroe. E va iki lahua la leivahaeakilava, Aualari leia kara ero hihika kileavahaeakilai.

¹⁶ Aka, elaviila ore leivahaeape la mai veveke, elaviila la hovea kiva leivahaeakilai.

Paul ve oki veveke, haela oaria hoveahovea leikive

¹⁷ Apavara, e oaria arave mai hovea hovea leikive, heroe; kai laria leivahaelula la haela kara ereve mai ovohae mekari eavaila:

Keriso ve Satauro ve iri haela

¹⁸ Ehovea uku haela, ara ero ma oharo maeaeaive, ikihuru iele, uku haela ve mai va satauro ve iri haela hovea hovea.

¹⁹ Ere va aireaki heaha eapapo koarakilai. Ereve eharau ereve Aualari la, ehovea ere va ikivere meahaiapo eharu hiki,

²⁰ Aka, elaviilave karikara iele va kaia Akea ve. Elaviila leia ve lei makukuriki haela la kariro, Amua Iesu Keriso.

²¹ Are va elaviilave ma maea heaha are karikikilai, ehovea are areve la mekakure hovea koelarikilai. Ehovea are va eharu oaria elare oki ve kari aukive ore havahu iele.