Philippi 2 - Pupu Oharo Āre 1963 Genese 1970 Rute 1972

Ikikekela haroapo hoveahovea leikive oharo

¹ Laelave, Keriso ve ikiheroe iele la leikilava, hakakaeaki mai iele la leikilava, ove ve koaraki mai iele la leikilava, ikihuru i ikiheroe ila mai iele la leikilava,

² E va elarelare iki haroapo hovea leivahaeaki, elarelare ikiheroe hoveahovea leivahaeaki — Laria ara ikiveveke le koarakilai.

Maeoka leiki oharo

³ E va pelaea mai v'ila horova kalaivahaelue — aka e va mea oaria maeoka ila elarelare maea veveke kelavaki.

⁴ Haela ae elare eharu hiki kekela v'arekaea, aka haela ae ve eharu kara kiva leiki.

Iesu ve maeoka i maea morava mai

⁵ Eve iki Iesu Keriso ve la iki hoveahovea leiki.

⁶ Ehovea are va Aualari ve maea hovea, aka Aualari hoveahovea leikive pelaea au laila,

⁷ Aka elare maea naoae leipe, ehovea are horova haela hovea leipe.

⁸ Are haela hovea epape; maeoka maea lei apakive haure au leila; o iele, satauro ve le apape.

⁹ Laelave Aualari arero akea ve morapaeape, aeva akea iele rare arero avarape.

¹⁰ Ehovea Iesu ve rare v'ila haela oaria loa ari ekaopakilai, Kaia ve i meahaiapo ureve ila la eharu oaria kara.

¹¹ Haela oaria ve ape kara Iesu Keriso Amua ve rare hihika maeakive, kai are v'ila Oa Aualari ve rare kara morapaeakilai.

Ovokake ehovea mai veveke kiva leiki mai

¹² Laelave, ara iki havahu akoremari e, e va oharo overa iapai leivahaeape la mai, ara e i hareho aeaki hoa hiki ka, aka ara va karia la hoa kara, e va elare ovokake okiharo oaoka ila kiva auhohi leivahaeaki.

¹³ Ehovea eve ureve horova leivila va Aualari iele, are va ikivere e v'ila iki veveke leikive.

¹⁴ Eve horova leivahaeaki hoa, ikihairihairi i hahari oharo kavahaelue.

¹⁵ E va Aualari ve heaha i haeae ila leiki aue akoremari leivahaeaki; heaha i haeae ila ma vilakao ureve mai ehohoe haela leivahaeaki, ehovea e va ma meahaiapo ve ovava veveke haela.

¹⁶ E va ovokake ve oharo iroro arura haela; ehovea ara va ikivere Keriso ve hare e v'ila ikiveveke leikive, ara horova i harava ila oaria naoae leiki ave.

¹⁷ O iele, ara va eve ikikekela v'ila maea morava la leikilava, ara va e i hareho ikiveveke leikilai,

¹⁸ E kara laria, ara i hareho ikiveveke leivahaeaki.

Timothy

¹⁹ Amua Iesu ve oropa ve, ara va ikivere Timothy eve leia maeamaea paraeakive, ara eve apeaki maea hovea ore la leikilava, ero kai hakakaeakive.

²⁰ Ehovea areve ikikekela hovea haela ae karia, are hiki ero auhohi leikive hoveahovea.

²¹ Ehovea haela oaria elare maea kelavalula; Keriso ve eharu ere kelava va ka;

²² Aka e va areve mai veveke ore leipe; are oa ve horova koarakive akore hovea, arave iroro ve horova koarape.

²³ Laelave, ara va ikivere arero maeamaea paraeakive, arave oki hovea ore leiki la hoa.

²⁴ Aka ara va Amua kekelavila, haiapo ka ara kara eve leia aukilai.

²⁵ Aka arave ikikekela veveke elave apoheari i horova kake ila, elave hevehe kake, Epaphroditus, ero oropa paraeakive; e arero maia kiparaeape la haela, ehovea araro hukapakive.

²⁶ Are ero ikihuru lei ikivere havahu leivahaeape, ehovea e iapape are maea kakare koarape.

²⁷ O iele, are va maea heaha eapapo leipe, apaki maia iele; Aka Aualari arero ikihuru leipe: arero hiki ka, araro kara ikihuru leipe, ara va ikihuru oaria koaraki ave.

²⁸ Laelave, ara arero paraeakive ikivere leipe, ehovea e arero aeka eavaki ikivere leivahaeakilai, kai ikihuru haerapakive.

²⁹ E va Amua oropa ve arero ikiveveke lei auhohi leivahaeaki; arero kai ikivere leivahaeaki.

³⁰ Are Keriso ve horova eapapo lei lei apaki maia iele. Are elare ovokake iki au kekelaila, ehovea are araro koarape, eve koaraki oki karia la hoa.