Philippi 1 - Pupu Oharo Āre 1963 Genese 1970 Rute 1972

Ikiheroe oharo

¹ Ela, Paul i Timothy ila, Iesu Keriso ve horova haela, Philippi apealula hehe haela oaria i bishop haela i diakono haela oaria ila ve oharo me paraeaive.

² Oa Aualari i Amua Iesu Keriso ila ve ikiheroe meru i havila ila e i hareho apeaki.

Paul ve ikiveveke i thank you oharo ila

³ Ara ero kelavaki hoa Aualari thank you oharo arive.

⁴ Ara va mea oaria ivaiva hoa ikiveveke ila e v'ila velavela leivila.

⁵ Ehovea eve iroro ve koaraki mai veveke, oropa hoa ikiki mahau.

⁶ Ara va ore iele, eve ureve horova veveke ipopeavape la Aualari, la horova mekakure le leikilai, aiai Iesu Keriso ve hare iele:

⁷ ara va e v'ila ikiveveke maria leikive heroe, ehovea ara va ero hare oaria iki kelavalula: o iele, arave au hahape hoa kai iroro oharo arive hoa kara, e oaria ara i hareho ikiheroe meru herehere leivahaelula.

⁸ Aualari ore, ara Iesu Keriso ve ikihuru v'ila ero hare oaria ikivere leivahaevila.

Ivaiva ehovea areve hohoa eavavahaeaki haela

⁹ Arave velavela oharo aeka ma — Eve ikiheroe kai ikiore kai ikikekela mai aheaukive, heroe.

¹⁰ E va eharu mekakure ikivere leivahaeaki. E va ikikekela ehoe lei lei Iesu Keriso ve horeraki hare.

¹¹ Eve iki mai ehoe ve iele heloekoakive, la iele va Iesu Keriso ve oki ve aiai Aualari ve morapaeaki mai.

Uvi muru leipe la oharo

¹² Apavara, ara va ikivere e ore leivahaeakive, ara koaravahaeape la heraho oaria va iroro ve okiharo lei veveke leivahaeape.

¹³ Laelave, arave maea hahape va iele, Caesar ve hevehe haela oaria Iesu Keriso v'ila ore le leivahaeape, uvi haela oaria kara.

¹⁴ Aeva ma, Amua ve apavara perehekai oaria arave maea hahape la aheke avi Aualari ve iroro oharo hare oaria arula, oaoka karia.

¹⁵ O iele, uku haela ikiheaha v'ila Keriso ve iroro arula, aka uku iki ehoe i veveke ila arula.

¹⁶ La uku, ehovea ere va ikiheroe ve leilula, ehovea ere v'ore ara iroro oharo auhohi leivila.

¹⁷ Aka uku ve iki hahari hovea, iki ehoe havahu ka, ehovea ere va ikivere arave au hahaki aeavila hoa heraho leikive.

Ikiveveke ehovea Keriso ve iroro horova

¹⁸ Lehae ha? Veveke maria; okiharo lahua lahua oaria, aeva hehepo la oki, aeva o iele la oki ve, Keriso ve rare hihika leivila, laelave ara va ikiveveke leivila, o iele, ikiveveke havahu leivila.

¹⁹ Ara v'ore, arave lei ovokake leiki oki ma, ehovea e va mea oaria ara v'ila ivaiva leilula — Iesu Keriso ve Ove Veveke araro koaraivila.

²⁰ Ara va ikivere iele ma, ara va eharu oaria ve makiri lei va ka, aka ape aheke ila, oaoka karia, overa hoa hovea, ma hoa kara, ara va ovokake la leikilava, aka lapakilava, ara Keriso arave maea ve hihika kileavila.

Lela veveke, ovokake, aka apaki hoa?

²¹ Ehovea arave ovokake va Keriso, arave apaki hoa va ovokake iele.

²² Ara va maea ve ovokake la leikilava, ara va horova eapapo aeva leikilai — la horova kai iele veveke koarakilai. Ara v'ore ka ara le la oki aukilai.

²³ Ara va la okiharo orahokaila va horahora leivila. Ara va ikivere maia hakurepakive, kai Keriso i hareho aeakilai, leia va veveke iele:

²⁴ Aka aeakive va heroe, ehovea ero koarakive.

²⁵ Ara horahora ka, ara v'ore arava aeakilai, ara e i hareho aeakilai, ara eve ikikekela ve ahaki mai v'ila iki veveke leikilai,

²⁶ Laelave, e va Keriso v'ila iki veveke leivahaeakilai, ehovea ara e i hareho aeka aeakilai,

Hakakaeaki oharo

²⁷ Aka, eve ovokake mai Keriso ve iroro ve hovea hovea leikive, heroe. Ara eve leia laukilava, aka auki aue la leikilava, ara eve hari veveke iapakilai, ehovea e va ikikekela haroapo hovea lei apeakilai, ove haroapo hovea leikive, ehovea Iroro ve horova veveke leikive.

²⁸ E va iri haela oaoka ka leivahaelue, ereve heaha leiki oki va la, aka eve ovokake okiharo, Aualari ve la ovokake.

²⁹ Ehovea ero ma eharu veveke aiarape, Keriso ve harihari ve, areve rare ikikekelakive, kai are v'ila kakare koarakive kara.

³⁰ Eve la heraho hoveahovea ara avape la heraho hovea hovea, e va la heraho ve oharo overa iapape.