Philemon 1 - Pupu Oharo Āre 1963 Genese 1970 Rute 1972

Hapaki oharo

¹ Ara, Paul, Iesu Keriso ve uvi muru aeavila haela kai Timothy, elave apoheari, ave hohoa me haeaive, Philemon, elave ikivere apavara iele, elave horova kake.

² Elave ikivere apavara Apphia kara, kai Archippus, elave hevehe haela kake, kai areve uvi apealula la ekalesia haela oaria kara:

³ Elaviilave Oa Aualari i Amua Iesu Keriso ila ve ikiheroe meru i havila ila e avaki.

Apevelavela ehovea au havoavape horova ve hahape haela

⁴ Ara va Aualari thank you oharo avila, ara mea oaria a v'ila ivaiva kiva leivila.

⁵ Ehovea ara iapape a va mea oaria Iesu Keriso ikiheroe lei kekelavila, kai ekalesia oaria a mea oaria ikiheheroe leivahaevila.

⁶ Ara va ikivere ere ave la ikikekela aheke ore la leikilava, ere Keriso ve haela ve horova veveke i mai veveke ila ore leivahaeakilai.

⁷ Ehovea ela va ave la ikiheroe mai v'ila ikiveveke leilula, ehovea a va ekalesia haela oaria a v'ila ikiveveke leivahaeape, apoheari e.

⁸ Laelave, ara va Keriso ve oropa haela, aka ara aro ape karava maea va ka:

⁹ Ara aro apevelavela hiki leive, ikiheroe leivila apavara hovea hovea. Ara Paul, haela eapapo, Iesu Keriso ve uvi muru aeavila haela.

¹⁰ Ara aro apevelavela leive iele ehovea arave akore ma, Onesimus, arave uvi muru hahape hoa laeape akore ma.

¹¹ Oropa hoa are ave horova ve hahape haela heaha; aka ma hoa are elavaila ve horova haela veveke.

¹² Ara arero ave leia paraeaive. Arero hela auhohi leiki, arero arave akore hovea mai paeakive.

¹³ Ara va ikivere iele arero maia kiva leikive. Laria are a hovea araro uvi muru hoa ave la ikihuru mai leikilai.

¹⁴ Aka ara ave ikivere ore au leila, laelave ara arero paea va ka. Ara va ikivere are araro koarakive iele, a havahu ve ikikekela hovea hovea: ara aro ahila va ka.

¹⁵ Ela ore va ka, are aro perehekai hakurepape iele ehovea are va aireaki ave leia hiki aeakilai.

¹⁶ Ma hoa a arero au hahape haela hovea hiki ava va ka, aka ave ikivere apoheari hoveahovea. O iele ara arero ikivere eapapo leive, aivau haela hovea, kai Amua ve haela hovea.

¹⁷ A va araro apavara iele la kekelakilava, arero ara havahu ve rare v'ila auhohi leiki.

¹⁸ Are aro haeae la leikilava, aka ave eharu ae korea la leikilava, la eharu arave rare hela harive.

¹⁹ Ara, Paul, ma oharo ara havahu ve mai ve lahila; ara aro kavale leikilai. Aka, o iele, la kavale hovea hovea a ara v'ila avape ha?

²⁰ Kaire, arave heari, Amua ve rare v'ila, a va araro ikiveveke hela leikive; ehovea Keriso ve harihari, a hela ikiheroe leiki.

²¹ Ara ave iapa mai veveke iki la kekelaila, laelave ara ma ave hohoa lahila, ehovea ara v'ore, ara aro velavela leiki la eharu a va leikilai, aeva kepea ila.

Kokaukaki oharo

²² A va ave ita ae ara v'ila karikiki va heroe. Ehovea arave ikikekela maria, a va ivaiva aheke ape, laelave ara eve leia kai aukilai.

²³ Maia apealula haela uku aro iki kelavaro, aeva Epaphras, ara i hareho uvi muru aeavila, ehovea Iesu Keriso ve harihari.

²⁴ Marcus, Aristarchus, Demas, kai Lucas ila, ara i hareho horova leilula haela mae.

²⁵ Amua Iesu Keriso ve ikiheroe meru ave ove i hareho aeaki.