Matthew 5 - Pupu Oharo Āre 1963 Genese 1970 Rute 1972

Kela akea ve iroro oharo

¹ Are haela oaria eavavahaeai kela le pekape. Are au haiavape la hoa areve kilea haela kara leia korukaiavahaeape.

² Are erero oharo mari kileavahaeape:

Ikiveveke leiki okiharo

³ Haeala here ikiveveke ila ehovea kaia ve basileia ereve.

⁴ Ikihuru haela ikiveveke ila ehovea ere ovohavi apeakilai.

⁵ Maraha haela ikiveveke ila ehovea ere meahaiapo avakilai.

⁶ Mai ehoe ve eroa i karave koa ila la haela ikiveveke ila, ehovea ere eharau huharavahaeakilai.

⁷ Ikiheroe leilula haela ikiveveke ila ehovea ere kara ikiheroe avakilai.

⁸ Iki veveroro haela ikiveveke ila ehovea ere Aualari eavakilai.

⁹ Havila leilula haela ikiveveke ila ehovea ere Aualari ve akoremari rare avahaeakilai.

¹⁰ Haela hararualula la haela ehovea ereve mai ehoe, ere ikiveveke ila ehovea kaia ve basileia ereve.

¹¹ Haela ero o heaha la maeaeakilava, ehovea arave harihari, e oaria kara ikiveveke ila.

¹² Ikiveveke, ikiveveke eapapo leila, ehovea e va kavale eapapo kaia ve aeakilai, ehovea ere overa hoa peroveta haela laria hararuavahaeape.

Kaikara i lamepa ila ve kilea oharo

¹³ E meahaiapo ve kaikara — kaikara areve iele la havoavakilava, are iele aeka lahoa koarakilai? Are va heaha, iele karia, aukapai haela loa harive hovea hiki.

¹⁴ E meahaiapo ve ovava. Kela akea ve la karikara areve kokaukaki ita karia.

¹⁵ Haela lamepa aveaki la hoa are lamepa haha ihau ve aepa va ka, are haha akea ve aepakilai, laria, uvi haela oaria areve ovava hareho avakilai.

¹⁶ Eve ovava haela oropa ve hihika amoeakive, ere eve horova veveke laria ovohae eavakilai, eve kaia ve Oa ere morapaeakilai.

Overa pupu i Iesu ve pupu ila

¹⁷ Iki mari ka kekelarue, ara ekepe pupu oharo peroveta haela ve oharo ila hehelaukakive: ara va hehelaukaki ve au ekeila, ara ekepe ehovea erero iele leikive.

¹⁸ O iele ara ero maeaeaive, aiai kaia meahaiapo ila kari leikilai, pupu ve iota haroapo aka hohoa haroapo ila havoava va ka, aiai eharu oaria hareho iele leivahaeakive.

¹⁹ Ma pupu haroapo hekai iele haerapaki la haela, ae lahovea kileaki la haela, areve rare kaia ve basileia ureve hekai iele leikilai: Ma pupu leivahaeai kileavahaeaki la haela, la haela areve rare kaia ve basileia ureve eapapo leikilai.

²⁰ Ara ero maeaeaive, Eve mai ehoe, pupu haealula haela, Pharisee haela ila ve mai ehoe ka heaurapakue ra leikilava, e va kaia ve basileia arahava va ka, karia karia iele havahu.

Hihiri i haela haela haeaki oharo

²¹ E va overa hoa maeaeape oharo overa iapape. Haela haea va arekaea. Haela haeaki la haela gavana au heheavaki ave.

²² Kahara, ara ero maeaeaive, areve apoheari hihiri naoae leiki la haela, gavana arero o heheavaki ave. Areve apoheari, Raka, maeaki la haela, Sanhedrin arero o heheavaki ave. Ihape oharo maeaki la haela, arero Gehena a veaki ave.

²³ Laelave, ave meru eharu arura haha ve la avilakekilava, leia a apoheari haeae leipe oharo iki la kekelakilava,

²⁴ Ave meru eharu arura haha oropa ve harepaki, oropa apoheari ila havila leikive, aireaki pekai meru eharu avaraki.

²⁵ A i iri haela elavelave oharo veveke hukavaki, ealila okiharo auvahaeaki la hoa, a i iri haela aro heheavaki haela oropa ve lai auki ave, heheavaki haela aro uvi muru ve kiva leiki haela avaraki ave, are aro uvi muru paraeaki ave.

²⁶ O iele, ara aro maeaive, a va aire kihoau va ka, karia karia iele havahu, aiai a kavale eapapo hareho lei karia leikive.

Mai heahaha

²⁷ Overa hoa maeaeape oharo e overa iapape, Airi pavora va kalailue.

²⁸ Ara ero mari maeaeaive, Haela ai uamari ra eavi ikivere leiki, la haela areve iki ureve airi pavora iele havahu overa leipe.

²⁹ Ave ovohae ore ukai haeae la leikilava, hauavi aukapa: A ve veveke ovohae ukai i hiki heaha leikive, ave maea oaria Gehena a veaki ave.

³⁰ Ave mai ore ukai aro haeae la leikilava, koerapai aukapa: A ve veveke mai ukai i hiki heaha leikive, ave maea oaria Gehena ve a veaki ave.

³¹ Aeka oharo mari maeaeape, Areve uva haure leiki la haela, veveke are haure leiki pepa avarakive.

³² Kahara, ara ero mari maeaeaive — areve uva haure leiki la haela, airi pavora karia la uamari, la haela areve uamari airi pavora hovea leipe. Vila haure leipe la uamari la laeaki la haela are kara airi pavora mai leive.

Okoare i O iele ila

³³ Aeka overa maeaeape oharo e va overa iapape maria, O iele oharo opore e va arekaea, eve o iele oharo Aualari oropa ve hiki arive.

³⁴ Kahara, ara ero mari maeaeaive, Kaia ve rare ve, ehovea Aualari ve terona la, o iele oharo e va arekaea.

³⁵ Meahaiapo ve rare ve kara kailue, ehovea areve loa epava ita. Jerusalem ve rare ve kara kaelue, ehovea are amua eapapo ve karikara.

³⁶ Haro ve rare ve kara kailue, ehovea a va haro koro houhuka ka uruka kariki va haveva.

³⁷ E va mari hiki oharo hukavaki heroe, Kaire, kaire; Ka, ka. Kepea oharo ve iele heaha.

Kavale kavale mai

³⁸ Overa maeaeape oharo e iapape, Ovohae kavale ovohae, kao kavala kao.

³⁹ Ara ka ero mari maeaeaive, Eharu heaha kavale lei va arekaea, ave aho ore ukai koaki la haela ave aho keva ukai kara helari arero amoeakive.

⁴⁰ Haela aro kavana ve oropa la heheavakilava, ehovea ave ure pura haroapo avakive, heroe, la haela ave akea pura kara avarakive.

⁴¹ Aro hiru haroapo lai auki la haela, a havahu hiru orahokaila arero koarai aukive.

⁴² Aro velavela leiki la haela, eharu arero avarakive. Aro ape karava leiki ikivere la haela avaka va arekaea.

Ikiheroe mai i mai veveke ila

⁴³ Overa hoa maeaeape la oharo e iapape, A i hareho apealula la haela ikiheroe leikive, a i iri haela aeha leikive.

⁴⁴ Ara ero mari maeaeaive, E i iri haela ikiheheroe leikive, ero o heaha maeaeaki la haela o ai momorapukive — ero aeha leiki la haela kavale veveke hiki leivahaeaki — ero haeae leiki hararuaki ila la haela ve ivaiva arive.

⁴⁵ Ehovea e va kaia ve Oa ve akoremari iele havahu leivahaeakive, ehovea areve hare haela veveke haela heahaha ila ve hareho pekavila, areve lai — mai ehoe haela i mai haeae haela ila ve hareho ihauvila.

⁴⁶ E va ero ikiheheroe leivahaeaki la haela hiki ikiheheroe la leivahaeakilava, kavale le la avakilai? Tax korukaia haela la hovea leivahaea ve ka ha?

⁴⁷ E va apavara hiki la momorapukilava, eve maea ve leari lei veveke leivahaeakilai ha? Tax korukaia haela laria leivahaea va ka ha?

⁴⁸ E va mai veveke hiki leivahaeaki, eve kaia ve Oa ve mai veveke hoveahovea.