Matthew 4 - Pupu Oharo Āre 1963 Genese 1970 Rute 1972

Diabolo Iesu huakara amuraeape

¹ Ove Veveke Iesu ita merava lai aupe, ehovea diabolo arero kurupaeakive.

² Are hare 40 ila ere erereape, eapai au laila, aireaki are eroa hape.

³ Amuraeharae haela arero kai iki maeape, A Aualari ve Akore iele la leikilava, ma have va maeaila, ere pai hovea koelarikive.

⁴ Are kavale maeape, Overa hape oharo maria: Haela makukuriki eharu eapai hiki va ka, Aka Aualari ve ape ve horeravahaeaki la oharo oaria.

⁵ Aireaki diabolo haela arero hehe karikara lai aupe, arero Hehe Uvi ve ailoki akea ve aepape.

⁶ Arero maeape, A Aualari ve Akore iele la leikilava, — hoa hareau, ehovea overa hape oharo maria: Are areve aneru a v'ila maeaeakilai, Ere aro mai peke paeakive, ave loa oropa have koaki ave.

⁷ Iesu arero kavale maeape, Oharo aeka mari hape: A Aualari ave Amua kamuraealue.

⁸ Diabolo kai arero kela heaikiapo havahu lai pekape. Are arero meahaiapo ve basileia oaria amoeavahaeape, mea ve haharika kara.

⁹ Are arero maeape, A arave oharo iapai la ekaopakilava, ehovea araro morapaeakive, ma eharu oaria ara aro le aiarakilai.

¹⁰ Iesu arero kavale maeape, Satan, a va ita lahua aula, ehovea overa oharo mari hape: A ave Aualari Amua hiki morapaeaki, Areve horova hiki leiki.

¹¹ Kahara, diabolo haela arero le harepape. Iapaki — aneru arero kiva leikive ekevahaeape.

Iesu Capernaum, Galilee hoa, hoaupe

¹² Iesu iapape ere John uvi muru paraeape la hoa, are Galilee aupe.

¹³ Are Nazareth harepai Capernaum ai le aeape, la karikara miri koaka aeave — Zabulon Nathphalim ila ve ukai.

¹⁴ Ehovea peroveta haela Isaiah maeaeape la oharo iele leikive maria:

¹⁵ Zabulon Naphthalim ila ve ukai, Ma haru maeamaea, Jordan la ukai ve, Galilee haela lahua ve ukai.

¹⁶ Murumuru apearoape la haela oaria, Ovava eapapo eavape: Au apihai ove ve avairoape la haela, Ovava ere va le horerape.

Iesu iroro horova ipopeavape

¹⁷ La hoa ve Iesu iroro oharo mari ape, Ikikelavaki — ehovea kaia ve basileia maea iele.

Oropa kilea haela itavavahaeape

¹⁸ Iesu Galilee ma haru miri ve loa veavelaripe la hoa are apo i heari la eavape, Simon, Peter rare itavape, Andrew areve akoreheari ila, erealila maharu ve keve parae ve laripe, ehovea erealila ekaka haropa haela.

¹⁹ Are erealilara maeaeape, Araro airekai ekeila, ealila aireaki haela ekaka hovea haropakilai.

²⁰ Erealila keve elavelave haitapai arero airekai aupe.

²¹ Are aeka perehekai ai apo i heari lahua la kai eavape, James, Zebedee ve akore, areve akoreheari John ila, erealila oa ila vevaea akea ve ereve keve ura la hahaeavaroape. Are erealilara itavape.

²² Erealila kara vevaea oa i hareho harepai arero airekai aupe.

Iesu Galilee loa veavelaripe

²³ Iesu Galilee hoa veavelaripe, ereve synagogue oharo kileape, basileia ve iroro ape, maea heahaha oaria, kakare oaria kara lei makukurivahaeape.

²⁴ Areve hari veveke Syria karikara oaria kopurapape, ere maea heahaha haela lahua lahua oaria, haiaru hekeheke haela oaria, iki haveva haela oaria i epe apo heheva haela oaria ila, arero kai kari ekevahaeape.

²⁵ Haela oaria iele hareho areve leia ekevahaeape, Galilee haela, Decapolis haela, Jerusalem haela, Judea haela, Jordan la ukai haela hareho.