Matthew 3 - Pupu Oharo Āre 1963 Genese 1970 Rute 1972

John Baptist ve Iroro

¹ La hoa John Bapatiso ekepe, Judea ve ita merava iroro ape:

² Areve oharo maria, Ikihelarivahaeaki, kaia ve basileia ekeki maia iele.

³ Ehovea ma haela ve hari Isaiah peroveta haela overa hukavape maria: Ara haroapo ita merava ve hape, Amua ve okiharo karikikive, Areve oki pakupaku lei heheapa leikive.

⁴ La haela John ve pura kamela ve koro, areve hopa boromakau iilu erekai hahape: areve eapai paitau, avare ila.

⁵ Jerusalem haela, Judea ita haela oaria ila, areve leia arahavape, Jordan ita eapapo haela oaria kara.

⁶ Are erero oaria bapatiso leivahaeape, ereve mai haeae oaria hihi leivahaeape.

⁷ Are Pharisee haela, Sadducee haela oaria ila eavavahaeape, ere bapatiso leikive ekevahaeape; are erero mari maeaeape, Ekaroa ve akoremari e, ero leita kileape aireaki ve hihiri ve oaoka lei hukaukive ha?

⁸ Eve mai heaha ve ikihuru hihi leivahaeaki:

⁹ Iki ureve mari kakekelarue, Elave oa Abraham me aeave. Ara ero maeaeaive — Aualari ma have la akoremari hovea karikiki ore, Abraham ve.

¹⁰ Ma hoa, ila kora elele ve aeave — ehovea hae veveke horeraki aue la kora ere hahaeaki a le aroukilai.

¹¹ Ara o iele ero ma ve bapatiso leikive, ehovea e ikihelarikive — aka araro aireaki ekeki la haela are va aheke, ara va mahuka, ara areve loa hara ve iilu la helaukaki hovea ka. Are ero Ove Veveke ila bapatiso leivahaeakilai, a ila kara.

¹² Veveo ve papahi areve mai ve le aeave, are areve ruha auhohi huhelakilai, areve wheat — uvi la korukaiakilai. Wheat ve eroe are a aroukilai, la a huhura va ka.

Iesu ve bapatiso hoa

¹³ La hoa Iesu Galilee harepai Jordan kai ekepe ehovea John arero bapatiso leikive.

¹⁴ John arero maeape, Arekaea — ara va ikikekela a araro bapatiso leila — ehovealeve a va ara kai leikila ha?

¹⁵ Iesu arero kavale maeape, Heroe, mahau leikive, ehovea maria leikive mai ehoe iele leikive. La hoa are leipe.

¹⁶ Are Iesu bapatiso leipe la hoa, Iesu ma ve ehoe pekape. Iapaki, kaia are ve hapape, are Aualari ve Ove, hihi hovea kihoai la eavape, areve akea ve epavape.

¹⁷ Ara kaia ve hape maria, Maia ara iki Akore havahu, ara are v'ila ikiveveke leivila.