Matthew 28 - Pupu Oharo Āre 1963 Genese 1970 Rute 1972

Iesu api kai uroupe hari

¹ Sabati hare karia lei mea opaki maea iele, Mary Magdalene kai Mary aea kara kapu ita eavakive auvahaeape.

² Iapaila. Mea puipui eapapo ekepe: ehovea Amua ve aneru kaia ve kihoai okiape la have avarura poe ve aipepe, kai areve akea ve avape.

³ Areve oropape kevao hovea, areve pura hauhuka, snow hovea.

⁴ Kiva haela arero oaoka leivahaeai uki hareape, au apihaeai haela hovea.

⁵ Aneru uavila maeaeape, E va oaoka kalailue, ehovea ara va ore e va Iesu, satauro hape la haela, ra haroparo.

⁶ Are maia ka, are va overa ape hovea, le urai. Iki Amua ve la ailapila la ita ra eavaila.

⁷ E kara elavelave auila, areve kilea haela maeaeaki — areva api kai le urai. Iapaila, are va eve oropa Galilee auve; e arero leia eavakilai. Iapai — arave oharo le ara.

⁸ Ere va oaoka lei ikiveveke eapapo ila kapu ita harepai aupe. Ere va harava hukai aupe areve kilea haela la oharo maeaeakive.

⁹ Ere kilea haela maeaeakive aupe la hoa Iesu erero oki koarai mari maeaeape, Evarilae! Ere ai areve loa mai paeape, kai ekaopi arero morapaeape.

¹⁰ Iesu erero maeaeape, E va oaoka kalaivahaelue. Auila, arave apavara maeaeaki, Ara va Galilee aukilai, ere va araro leia eavakilai.

¹¹ Ere aupe hoa, iapaila, kiva haela uku karikara hoahukai ma eharu oaria oharo haela kileape.

¹² Ere va haela hoaha ila oharo hukavakive korukaiape, kai moni oaria la hevehe haela aiarape.

¹³ Ere mariape, E va mari ari — areve kilea haela oroa iki ela avuku apealula la hoa, arero korea kaivi le avaupe.

¹⁴ Ma oharo gavana haela la iapakilava, ela arero avakiaue leikilai, e ovokake leivahaeakilai.

¹⁵ Laelave ere moni avi, erero maeaeape horova lahovea leipe — ka la oharo Jew haela oaria hukavalula ikiki ma hoa kara.

Iesu Galilee kilea haela oropa ve hihika leipe

¹⁶ Kilea haela eleven Galilee auvahaeai Iesu erero overa maeaeape kela aeva la pekahavape.

¹⁷ Ere arero eavape hoa ere ekaopi arero morapaeape: Aka uku haela perehekai ikihorahora leivahaeape.

¹⁸ Iesu iki erero mari maeaeape, Ara va kaia i meahaiapo ila ve aheke oaria aeape.

¹⁹ Laelave, auila, vila ipipi oaria ra kileaila, kai erero Oa ve rare, Akore ve rare, Ove Veveke ila ve rare ila bapatiso leivahaeakive.

²⁰ Ara ero pupu hovea kileavahaeape la eharu oaria erero kileavahaeaila; Iapaila, ara mea oaria e i hareho apeakilai, aiai meahaiapo kari ra leiki la hoa.