Matthew 27 - Pupu Oharo Āre 1963 Genese 1970 Rute 1972

Iesu Pilate oropa ve

¹ Vevelare hoa oharo haela oaria karikara haela hoaha ila Iesu ve la oharo hukavape, ehovea arero harive.

² Ere arero mai hahai Pontius Pilate gavana haela ve oropa ve lai aupe.

Judas apape hari

³ Judas, arero hihila epape la haela arero heaha lei eavape, are areve mai haeae ve ikihuru leipe: are la 30 shillings aeka oharo haela i haela hoaha ila ve leia aiaupe.

⁴ Are mariape, Arave haeae eapapo, ehovea ara mai ehoe haela hihila lepaila. Ere arero kavale maeape, Ela va ka, a havahu ve haeae.

⁵ Are la 30 shillings Hehe Uvi ureve koavape, kai are ai elare maea airovo le kaeape.

⁶ Oharo haela la 30 shillings kaila mari ape, Hehe Uvi ve moni kopererea aivaupaki pupu ila — ehovea apu ve kavale.

⁷ Ere elare oharo hukavi hahu karikiki haela ve kekele uku ita lahua haela va kapu ita ve ilaea leipe.

⁸ Laelave la ita aiai ma hoa areve rare va Apu ve Kekele.

⁹ Laria Jeremiah peroveta haela maeape la oharo iele le leipe: Ere va 30 shillings ilaea leipe haela ve kavale ra kailape, Israel haela ilaea leipe la haela:

¹⁰ Ere erero hahu karikiki haela ve kekele avarape, Amua ahilape hovea.

Iesu Pilate, Gavana haela, oropa ve

¹¹ Iesu gavana haela oropa ve epavape. Gavana haela arero velavela leipe maria, A va Jew haela ve Amua ha? Iesu kai arero maeape, A le ave.

¹² Oharo haela haela hoaha ila areve la oharo maeape hoa are kavale au maeaila.

¹³ Pilate arero maeape, A va ere a v'ila laila la oharo oaria au iapakue?

¹⁴ Are arero kavale oharo au maeaila — ehoveala gavana haela ikihorahora eapapo leipe.

¹⁵ La hurai hoa gavana haela ve mai, uvi muru aeaki haela haroapo paraeakive, ereve ikivere leiki la haela.

¹⁶ La hoa haela haroapo rare Barabbas uvi muru aeape — la haela haela ore hiki.

¹⁷ Laelave ere va korukaiape hoa Pilate erero mari maeaeape, Eve ikivere ara leita haela helauka paraeakive? Barabbas aka Iesu Keriso rare avape la haela.

¹⁸ Ehovea are va ore ereva are i iri haela lai ekepe.

¹⁹ Are heheavaki haha ra haiavape hoa areve uva arero oharo paraeape maria, A va la mai ehoe haela ka heheavalue — ehovea ara mahau hare ivahi hoa heraho eapapo laleila ma haela ve.

²⁰ Oharo haela i haela hoaha ila haela harekoko hakileavahaeape Barabbas paraeaki velavela leikive, kai Iesu harive.

²¹ Gavana haela erero maeaeape, Eve ikivere ara ma haela orahokaila ve leita haroapo helauka paraeakive ha? Ere maeape, Barabbas.

²² Pilate erero maeaeape, Ara va Iesu Keriso rare itavape la haela leari leikilai ha? Ere hareho maeape, Arero satauro harive.

²³ Pilate maeaeape, Ipileve — are va haeae le la leipe ha? Aka ere ara hai itavape maria, Arero satauro harive.

²⁴ Pilate eavape areve oharo aheke au leila, aka ere oaria hahari arive maia iele, are ma la avi, haela oaria ve oropa ve areve mai huhelape, kai mariape, Ma mai ehoe haela ve apu arave haeae va ka, eve haeae.

²⁵ Haela oaria kavale maeaeape, Heroe, areve apu elave horova, elave akoremari ve kara.

²⁶ Are la hoa Barabbas helauka paraeape — ere Iesu haru ha satauro harive lai aupe.

Iesu satauro ve apape hoa

²⁷ Gavana haela ve hevehe haela Iesu lalava eapapo ureve lai aupe, kai areve leia hevehe haela harekoko korukaiavahaeape.

²⁸ Ere areve pura hauavape, kai areve maea pura ovoka orape.

²⁹ Ere va kora mamareke korona hai areve haro ve korape, kai hirivo areve mai ore ve korape; ere va hareho areve oropa ve ekaopi heheo mariape, Iapaila, Jew haela ve Amua.

³⁰ Ere areve maea apea koape, kai areve mai ve la hirivo avi areve haro koape.

³¹ Aeva ereve heheo kari lei pura ovoka hauavi are havahu ve pura kai orape, kai arero satauro harive lai aupe.

³² Ere va kihoahuka Cyrene haela ae ra eavape — areve rare Simon. Ere la haela satauro oraiavaki ahilape.

³³ Ere va ita rare Golgotha auvahaeape (la rare ve iele: Haela haro ita).

³⁴ Ere va arero ma kaeake larive avarape — are va hovave lei haure le leipe.

³⁵ Ere arero satauro hape. Ere va koae koa areve pura hamuri elarelare le aeape — ehovea peroveta haela hape la oharo iele leikilai maria, Ere arave pura hamuri elarelare aeape, kai arave pura aeva koai koape.

³⁶ Ere va leia avai arero kiva leipe.

³⁷ Areve haro akea ve arero lei hape la oharo iele hohoa haeape maria, Maia Iesu, Jew haela ve Amua.

³⁸ La hoa haroapo, ere korea haela orahokaila are i hareho satauro haeape — aeva areve mai ore ukai aeva areve mai keva ukai ve.

³⁹ Leia ekevahaeape haela oaria haro koukou avahaeai arero o heaha maeape, maria:

⁴⁰ A va Hehe Uvi ra haipararapai — hare irehoila are kukive ape haela, A havahu elare lei makuri. A Aualari ve Akore iele ra leikilava, satauro ikupa ve hatuai kihoau.

⁴¹ Oharo haela hohoa haealula haela kai haela hoaha ila kara laria arero heheo maeape:

⁴² Are haela oaria lei makukuripe. Are havahu elare lei makuri haveva. Are Israel ve Amua iele la leikilava, heroe, are mave satauro ikupa ve kihoauki — ela areve rare iele kekelakilai.

⁴³ Are Aualari kekelape — Aualari arero ikivere la leikilava, are arero mave ovokake leiki paraeaki heroe, ehovea are mariape, Ara va Aualari ve Akore.

⁴⁴ Ere are i hareho satauro haeape la korea haela kara la heheo oharo arero maeape.

Iesu apape hoa

⁴⁵ Hare hihi hoa mea eapapo hareho muru le leipe, aiai hailaea 3 o'clock.

⁴⁶ Hailaea 3 o'clock hovea Iesu ara eapapo hai ape maria, Eli, Eli, lama sabachthani? La oharo ve iele — Arave Aualari e, arave Aualari e, ehovealeve a araro haure laleila?

⁴⁷ Leia apearoape haela uku la oharo iapai mari maeape, Ma hilavila Elias rare ra itavave.

⁴⁸ Haela aeva elavelave harava vivila latite kaivi ma kaeake hivi hirivo kao ve avikape kai are larive avarape.

⁴⁹ Kepea haela mariape, Lari kalailue — ela va hoa eavakilai — Elias iki arero lei makurikilai la.

⁵⁰ Iesu aeka ara eapapo hai ape — kai ove le paraeape.

⁵¹ Iapaila, Hehe Uvi ve harihu‐urape au kovaelai hoai ipi ve le paraeape: meapuipui ekepe, have ehoaha le kovavaelape:

⁵² Kapu ita le hapape — overa apihaeape haela ve maea urahukape.

⁵³ Ereva aireaki kapu ita ve kihoahukai hehe karikara ureve haela oaria ve oropa ve loa veavelaripe.

⁵⁴ Iesu kiva leipe la hevehe centurion i hareho apearoape la haela oaria mea puipui oaria ila eavavahaeape kai oaoka eapapo leivahaeai mariape: Iele havahu — ma va Aualari ve Akore.

⁵⁵ Iesu i Galilee ve hareho koarai ekevahaeape uavila oaria leia arai ve ovohae eavape:

⁵⁶ Mary Magdalene, Mary James i Joses ila ve lou, kai Zebedee ve akoremari ve lou, ereva uku la.

Iesu ve karu ihape hoa

⁵⁷ Hailaea hoa Arimathaea erohoho haela rare Joseph ekepe. Are kara Iesu ve airekai aupe haela.

⁵⁸ Are Pilate ve oki ai Iesu ve maea hilahila leipe. Pilate la maea avarakive oharo maeape.

⁵⁹ Joseph la maea kaivi pura hauhuka veveroro kohahape:

⁶⁰ Areve kapu ita are ihape. La ita are va have ita ihape. Are have eapapo kapu ita ve okiape kariki le aupe.

⁶¹ Mary Magdalene kai Mary aea la kapu ita mahokaea ve avape.

⁶² Hurai leiki hare karia lei — la opoa hare — oharo haela i Pharisee haela ila hareho Pilate ve leia auvahaeape.

⁶³ Ere mariape, Amua e, ela va iki alalaro, la opore haela areve ovokake hoa mariape, Hare irehoila ara va kai uroukilai.

⁶⁴ Ava haela maeaeaki, Kapu ita aheke leiki aiai hare irehoila kari leiki — areve kilea haela oroa iki areve maea korea kaivaki ave, kai haela oaria mari ari ave, Are va api kai le uroupe. Lahovea oropa haeae hekai, aireaki haeae eapapo iele.

⁶⁵ Pilate erero maeaeape, Eve kiva haela le apearo — e va auila — e havahu la ita kiva auhohi leiki.

⁶⁶ Laelave ere hoahuka kapu ita kiva auhohi leipe — have okiape kokauka aheke lei haela kiva auhohi leikive maeaeape.