Matthew 26 - Pupu Oharo Āre 1963 Genese 1970 Rute 1972

Oharo Haela Iesu harive oharo hukavaro

¹ Iesu ma oharoharo oaria kari leipe, kai areve kilea haela mari maeaeape,

² E va ore — apu passover hare orahokaila ve kihorerakilai — kai haela ve Akore ere hihila epai satauro akea ve harilai.

³ Oharo haela, avai haela hoaha, akea oharo haela rare Caiaphas ve uvi korukaiavahaeape.

⁴ Ere elare oharo hukavape ehovea Iesu leari lei muruhari harilai.

⁵ Aka ereve oharo maria, Hurai hoa va arekaea — haela elaro hihiri leivahaeaki ave.

Bethany uamari Iesu ve maea la apu ila hariripe

⁶ Iesu Bethany, Simon leper haela ve uvi aeape la hare.

⁷ Uamari ae muramura muo veveke kavapu, kavale eapapo iele, areve leia avikepe, kai areve haro ve kakaitape, are eapai lape la hoa ve.

⁸ Kilea haela lari eavi hihiri leivahaeape — ere mariape, Ma naoae naoae mai ehovealeve ha?

⁹ Ma muramura moni ilaea ra leikilava, moni eapapo koarakilai — moni uku merava haela aiaraki.

¹⁰ Aka Iesu la oharo iapai erero mari maeaeape, La uamari e ka hararuarue — are va mai mekakure araro va leive.

¹¹ Ehovea merava haela mea oaria e i apealula, ara va e i haiapo aea va ka.

¹² Are va muramura arave maea ra roroakilava, are arave apaki hoa iki la kekelaila.

¹³ O iele ara ero maeaeaive — ma arave iroro meahaiapo ita oaria la hukavakilava, ma uamari laleila horova kara hihika hukavakilai, ehovea arero iki alalakive.

Judas Iesu hilila epape

¹⁴ Aireaki kilea haela 12 ila ve haela haroapo rare Judas Iscariot oharo haela ve ita ai mari maeaeape:

¹⁵ Ara arero hihila epai ra avarakilava, e va araro le kavale leikilai? Ere va arero 30 shillings aiarakive okoare maeape.

¹⁶ Are arero hihila epakive okiharo haropape.

Iesu ve hita eapai hoa

¹⁷ Muramura aue la pai hurai ve oropa hare areve kilea haela arero kai iki mari maeape, Ela va ave passover leiki ita lahoa ve leikilai?

¹⁸ Are mariape, Karikara hihi ve auila — maria haela eavi maeaki, Haelapo ve oharo maria, Arave hoa maia iele — ara i kilea haela ila ave uvi passover leikilai.

¹⁹ Kilea haela Iesu erero maeape la horova oaria hareho hovea hukavi, kai passover ita overa kariki kari leivahaeape.

²⁰ Hailaea hoa are i kilea haela 12 ila hareho korukai avape.

²¹ Ere eapai lape hoa are mari maeaeape, O iele ara ero maeaeaive, E va haela ae va la araro hihila epakilai.

²² Ere ikihuru iele leivahaeai elare mariape, Amua e, ara ha?

²³ Are kavale maeape, Ara i hareho la haita haroapo mai avihorapaki la haela are araro hihila epakilai.

²⁴ Haela ve Akore are ve rare hape la okiharo aukilai, aka oea ehovea arero hihila epaki la haela. La haela epaki aue ra leikilava, la va heroe.

²⁵ Aire Judas, arero hihila epape la haela, arero velavela leipe maria, Haelapo, ara ha? Are arero maeape, A havahu le avi.

²⁶ Ere eapai lape la hoa — Iesu pai kaivi ivaiva lei pai haivavaelape kai areve kilea haela aiari mari maeaeape, Ai, le ila. Ma arave maea iilu hovea.

²⁷ Are hekako kaivi, thank you oharo ape — kai areve kilea akoremari aiari mari maeaeape, E va hareho arero lakaraila.

²⁸ Ehovea ma arave apu, oharo are ve i au hakaitapape, haela oaria ve mai hahaeae hapururukakive.

²⁹ Aka ara ero maeaeaive — ara va aireaki hare oaria ma vine apu le va ka, aiai ara e i hareho arave Oa ve basileia ureve are ra larilai.

Iesu kilea haela ve aireaki titavaki oharo kileape

³⁰ Ere hivi helai, mea hoai Olivet kela pekahavape.

³¹ Iesu erero aire mari maeaeape, Ma oroa hoa e oaria araro ikihairihairi leivahaeakilai. Ehovea overa hape oharo maria, Ara mamoe kiva haela harilai, kai areve mamoe oaria le titavakilai.

³² Aka ara va api ra uroukilava ara va oropa ai ero Galilee eavakilai.

³³ Peter arero kavale maeape, Haela oaria aro ikihairihairi ra leivahaeakilava, ara va aro ikihairihairi leiva ka.

³⁴ Iesu arero maeape, O iele ara aro maeaive — ma oroa kokora hi aire arilai, a va araro oropa hoa ilehoila hehepo leikilai.

³⁵ Peter arero mari maeape, Ara ka a i hareho ra apakilava, ara aro hehepo lei va ka. Kilea haela oaria hareho laria maeape.

Iesu Gethsemane leia

³⁶ Iesu ere i hareho ita rare Gethsemane kihoahukape — are kilea haela mari maeaeape, E va maia ve availa — ara va perehekai ai ivaiva leikilai.

³⁷ Are Peter, Zebedee ve akoremari orahokaila ila kari ai ikihuru iki ihaha le haiavape.

³⁸ Are erero maeaeape, Ara va ikihorahora i ikihuru eapapo, apaki hoa hovea. E va maia avai apea araro kariki.

³⁹ Are perehekai ai areve oropape ekaopape kai ivaiva lei mariape, Arave Oa e, leiki oki veveke ra leikilava, a va ma hekako arave oropa ve hareava — lae vi va, arave iki va ka, a lahua ve iki.

⁴⁰ Are kilea haela ve leia ai erero avuku eapealula eavape. Are Peter mari maeape, A va hoa haroapo araro kiva lei va haveva ha?

⁴¹ Kiva auhohi leila, ivaiva leila, ero amuraeharae leivahaeaki ave. Ove va ikivere, aka aivau va luluauka iele.

⁴² Are va kai aireaki aupe, kai ivaiva lei mari ape, Arave Oa e, ma hekako la hareavakilava ehovea ara hiki larilai, heroe, ara larilai. Ehovea ave ikivere.

⁴³ Are kai iki erero avuku i apealula kai eavape — ehovea ereve ovohae mahu iele.

⁴⁴ Are erero haitapai kai aupe kai aeka ma hoa ilehoila ivaiva ape, oropa la oharo hovea kai ape.

⁴⁵ Are aireaki kilea haela ve leia mari maeaeape, E mahau avuku hiki kai iki paparaehaila — Iapai, hoa maia iele, ere haela ve Akore hihila epai mai haeae haela avarakive.

⁴⁶ Urahukaila, elaviila aukilai. Iapai — araro hihila epaki haela me ekeve.

Ere Iesu mai paeape

⁴⁷ Are la oharo la hukavi Judas 12 haela ve haela aea la ekepe, kai haela oaria iele ea i haru ila la ekevahaeape: ere va oharo haela i haela hoaha v'ila ekevahaeape.

⁴⁸ Arero hihila epaki la haela erero ihova overa avarape maria, Ara ape popovaki la haela, are va la. Arero mai aheke paeaki.

⁴⁹ Are ai Iesu mari maeape, Haelapo, A va la, ha, kai arero ape popoape.

⁵⁰ Iesu arero maeape, Haelakaru e, a leikila la horova ve, a va laila. Ere iki Iesu ra mai pae arero lai aupe.

⁵¹ Iapai, Iesu i hareho apearoape haela haroapo mai avihorapi hoi kaivi akea oharo haela ve horova haela aeva koape, kai areve avako le koeheravape.

⁵² Iesu arero maeape, Ave hoi ita havahu aipe la. Ehovea hoi mai papaehauki la haela erero ea ila hae kari leikilai.

⁵³ Eve ikikekela lehae — ara va Oa ivaiva mave ra leikilava, are haiapo ka aneru legion 12, kepea ila, araro aikiara va ka ha?

⁵⁴ Aka laria ra leikilava, overa hape oharo learia iele lei kilai ha? Ara ma horova leikilai.

⁵⁵ Iesu helari haela oaria maeaeape, E va ea i para ila leikevahaeaila ehovea araro korea haela hovea paeakive ha? Ara hare oaria Hehe Uvi ureve ero kilea veape, e va leia araro mai au paeaila.

⁵⁶ Aka ma horova oaria ehovea peroveta haela kileavahaeape la oharo oaria, iele leikive. Areve kilea haela oaria arero harepai oaoka lei hukaupe.

Akea Oharo Haela oropa ve Iesu ve hahape hoa

⁵⁷ Iesu mai paeape la haela arero akea oharo haela Caiaphas ve oropa ve lai aupe, hohoa haealula haela, haela hoaha ila korukaiape la ita.

⁵⁸ Aka Peter arero arai ve airekai aupe, aiai akea oharo haela ve uvi: kai uvi ureve hoai horova haela i koarai avape, ehovea horova hita eavakive.

⁵⁹ Oharo haela, haela hoaha ila, counsellor haela oaria kara, Iesu ve rare ve naoae naoae opopoe hukavai haela haropape, ehovea arero harive.

⁶⁰ Aka ere va au koaraila — Iele, opopoe naoaenaoae hukavaki haela oaria ekevahaeape, aka ere va areve haeae au koaraila: aireaki oharo hukavaki haela orahokaila ekevahaeape

⁶¹ kai mari maeape, Ma hilavila mari ape, Ara ve Aualari ve Hehe Uvi kopararapa va ore, kai hare ilehoila kui epakilai.

⁶² Akea oharo haela urai arero mari maeape, A kavale oharo karia ha? Ma haela ave rare va hukava laila iele va le ha?

⁶³ Aka Iesu ve oharo ka, are muruha hiki epavape. Akea oharo haela arero aeka maeape, Ara aro ovokake Aualari ve Rare ve ahilaki — elaro kimaeaeaki — A va Keriso la, Aualari ve Akore, aka Keriso va ka ha?

⁶⁴ Iesu arero maeape, A le ara, lae vi va ara aro maeaive, Aireaki e va haela ve Akore mai ore ukai aheke ila avaki kaia ve meuru ureve ma kihoreraila eavakilai.

⁶⁵ Akea oharo haela areve pura haipararapai mariape, Are o heaha lamaeaila — ela va oharo hukavaki haela ae leve haropaki — Iapai — e va areve oharo mave iapairo.

⁶⁶ Eve iki leari kelavaro ha? Ere va kavale maeape, Heroe, are va apakive.

⁶⁷ Ere areve oropape apea koa arero haru koape — haela aea kara arero mai hara koape,

⁶⁸ kai mari ape, Peroveta oharo arive — ava Keriso, aro leita lakoaila ha?

Peter ve hehepo

⁶⁹ Peter uvi mailare ve haiavape — marihari iki areve leia mariape, A kara Iesu Galilee ve koarai aupe.

⁷⁰ Aka are ereve oropa ve hehepo leipe maria, Ara va a avila la oharo va haveva.

⁷¹ Are okiape ve hoaupe la hoa, marihari ae kai arero eavi leia haela mari maeaeape, Ma hilavila are kara Iesu Nazareth ve koarai aupe.

⁷² Are va o heaha ila hehepo mariape, Mari e, ara la haela haveva.

⁷³ Aireaki — ere i hareho epavape haela ekevahaeai Peter mari maeape, Iele havahu a kara ere i hareho veaveape ehovea ave ape oharo hihika le horerave.

⁷⁴ Are la hoa o heaha oaria maeape kai aeva mariape, Ara la haela ore va ka. La hoa havahu kokora mea hi ape.

⁷⁵ Peter Iesu maeape la oharo iki le kekelape maria, Kokora mea hi aire arilai, a va araro hoa irehoila hehepo oropa leikilai. Are mea hoai hi eapapo ape.